കർണാടകയിലെ സങ്കീർണമായ നേതൃത്വ പ്രതിസന്ധി പരിഹരിക്കേണ്ടതിന്റെ ആവശ്യകത കോൺഗ്രസ് ഹൈക്കമാൻഡ് ഗൗരവത്തോടെ എടുത്തുവെന്ന് തോന്നുന്നു. പ്രശ്നം പരിഹരിക്കുന്നതിനായി മുഖ്യമന്ത്രി സിദ്ധരാമയ്യയെയും ഉപമുഖ്യമന്ത്രി ഡി കെ ശിവകുമാറിനെയും എഐസിസി അധ്യക്ഷന് മല്ലികാർജുൻ ഖാർഗെ ഡൽഹിയിലേക്ക് വിളിപ്പിച്ചു. പാർട്ടി നേതൃത്വത്തെ കാണാനും അഭിപ്രായം പങ്കിടാനും നിയമസഭാംഗങ്ങൾക്ക് സ്വാതന്ത്ര്യമുണ്ടെന്നും, ആശയക്കുഴപ്പത്തില് അന്തിമ തീരുമാനമെടുക്കുന്നത് പാർട്ടി ഹൈക്കമാൻഡ് ആയിരിക്കുമെന്നും സിദ്ധരാമയ്യ ഉറപ്പിച്ചു പറഞ്ഞിരുന്നതാണ്. ശിവകുമാറിന്റെ അനുയായികളാകട്ടെ, തങ്ങളുടെ നേതാവിന് മുഖ്യമന്ത്രിയാകാൻ കഴിയുന്ന തരത്തിൽ അഞ്ച് വർഷ കാലാവധിയുടെ പകുതിയിൽ സിദ്ധരാമയ്യ മാറിനിൽക്കുമെന്ന് കരാറുള്ളതായി പറയുന്നു. എന്നാല് സിദ്ധരാമയ്യ ക്യാമ്പ് അത്തരമൊരു കരാറിനെ ശക്തമായി നിഷേധിക്കുന്നു, പകരം ഭൂരിപക്ഷം എംഎൽഎമാരുടെയും പിന്തുണയുണ്ടെന്ന് വാദിക്കുന്നു. സിദ്ധരാമയ്യയെ മാറ്റുന്നത് അഹിന്ദ (പിന്നാക്ക) വോട്ട് ബാങ്കിനെ പാർട്ടിക്കെതിരെ തിരിച്ചുവിടുമെന്ന് കോൺഗ്രസ് കരുതുന്നു. സിദ്ധരാമയ്യയോട് രാഹുൽ ഗാന്ധിക്ക് ബഹുമാനമുണ്ടെന്നതും രഹസ്യമല്ല. അഹിന്ദ വോട്ടുകള് സിദ്ധരാമയ്യക്കൊപ്പമാണെന്നിരിക്കെ, കോൺഗ്രസിനും ജെഡി (എസ്) യുവിനുമായി ഭിന്നിച്ച് കിടക്കുന്ന വൊക്കലിഗകളുടെ പൂർണ പിന്തുണ ശിവകുമാറിന് ലഭിക്കുന്നുമില്ല.
ഒബിസി സമുദായത്തിൽ നിന്നുള്ള ഏക മുഖ്യമന്ത്രിയാണ് സിദ്ധരാമയ്യ. കർണാടകയിലെ ജാതി സെൻസസ് സുഗമമായി പൂർത്തിയാക്കുന്നതിൽ അദ്ദേഹം നിർണായക പങ്കുവഹിച്ചു. അടുത്ത വർഷം കേരളവും തമിഴ്നാടും തെരഞ്ഞെടുപ്പിലേക്ക് പോകാൻ ഒരുങ്ങുന്ന സമയത്ത്, അദ്ദേഹത്തെ മാറ്റി, വൊക്കലിഗ മുഖ്യമന്ത്രിയെ (ശിവകുമാർ) നിയോഗിച്ചാല് രാഹുൽ ഗാന്ധിയുടെ സാമൂഹിക നീതി പദ്ധതി അട്ടിമറിക്കപ്പെടുമെന്ന് പാർട്ടി കരുതുന്നു. അതുകൊണ്ട് തല്ക്കാലം നേതൃമാറ്റമില്ലെന്ന തിരുമാനത്തില് എത്തിച്ചേരുകയായിരുന്നു. കഴിഞ്ഞദിവസം മുഖ്യമന്ത്രിയുടെ ഔദ്യോഗിക വസതിയില് നടന്ന കൂടിക്കാഴ്ചയ്ക്ക് ശേഷം ഒരുമിച്ച് പ്രവര്ത്തിക്കുമെന്ന് സിദ്ധരാമയ്യയും ഡി കെ ശിവകുമാറും അറിയിച്ചു. നേതൃത്വത്തില് ഇപ്പോള് മാറ്റമില്ലെന്നും മുഖ്യമന്ത്രിസ്ഥാനത്തെക്കുറിച്ച് ചര്ച്ച ചെയ്തിട്ടില്ലെന്നും ഇരുവരും വ്യക്തമാക്കി. 2028ലെ നിയമസഭാ തെരഞ്ഞെടുപ്പില് സ്വീകരിക്കേണ്ട തന്ത്രങ്ങളെപ്പറ്റിയും നിയമസഭാ സമ്മേളനത്തില് ബിജെപി അവിശ്വാസ പ്രമേയം അവതരിപ്പിച്ചാല് നേരിടാനുള്ള വഴികളെക്കുറിച്ചും ചര്ച്ച ചെയ്തതായും പറഞ്ഞു.
കോൺഗ്രസ് ഒറ്റയ്ക്ക് മത്സരിക്കാൻ ആഗ്രഹിക്കുന്ന മഹാരാഷ്ട്രയിലെ രാഷ്ട്രീയ സാഹചര്യത്തിൽ വലിയ മാറ്റങ്ങളാണ് കാണുന്നത്. ഉദ്ധവ് താക്കറെയുടെ നേതൃത്വത്തിലുള്ള ശിവസേന (യുബിടി), രാജ് താക്കറെയുടെ നേതൃത്വത്തിലുള്ള മഹാരാഷ്ട്ര നവനിർമ്മാൺ സേന (എംഎൻഎസ്) യുമായി സഖ്യമുണ്ടാക്കാൻ പദ്ധതിയിടുന്നു. അടുത്ത വർഷത്തെ ബ്രിഹൻ മുംബൈ മുന്സിപ്പൽ കോർപറേഷൻ (ബിഎംസി) തെരഞ്ഞെടുപ്പിൽ ശരദ് പവാർ തങ്ങളുടെ പിന്തുണ തേടുമെന്ന് ഇരുപക്ഷവും പ്രതീക്ഷിക്കുന്നുമുണ്ട്. മഹാനഗരത്തിൽ എൻസിപി (എസ്പി)ക്ക് അടിത്തറ പരിമിതമായതിനാൽ, പവാറിന് ഇതിലേതെങ്കിലും ഒന്നുമായി സഖ്യമുണ്ടാക്കേണ്ടിവരും. ബിജെപിയെ പരാജയപ്പെടുത്താൻ സമാന ചിന്താഗതിക്കാര് മുന്നോട്ടുവരണമെന്ന് പവാർ പറയുന്നു. ഔദ്യോഗിക പ്രഖ്യാപനം നടത്തിയിട്ടില്ലെങ്കിലും, രാജ് താക്കറെയുടെ നേതൃത്വത്തിലുള്ള എംഎൻഎസ് ഉദ്ധവിന്റെ സേനയിൽ ചേർന്നാൽ, അവർ എംവിഎയുടെ ഭാഗമാകുമെന്ന് പ്രതീക്ഷിക്കുന്നു. അതേസമയം ഈ നീക്കത്തെക്കുറിച്ച് പല കോൺഗ്രസ് നേതാക്കളും പരസ്യമായി സംശയം പ്രകടിപ്പിച്ചിട്ടുണ്ട്. ബിഎംസിയിലും മറ്റ് തദ്ദേശ സ്വയംഭരണ സ്ഥാപനങ്ങളിലുമുള്ള സഖ്യം സംബന്ധിച്ച് എൻസിപി (എസ്പി), ശിവസേനയുമായി (യുബിടി) ചർച്ചകൾ നടത്തിവരികയാണെന്ന് പാര്ട്ടി വൃത്തങ്ങൾ പറഞ്ഞു. ബിഎംസി തെരഞ്ഞെടുപ്പ് തീയതികൾ പ്രഖ്യാപിച്ചുകഴിഞ്ഞാൽ, രാഷ്ട്രീയ സാഹചര്യം അടിസ്ഥാനമാക്കി എൻസിപി അന്തിമ തീരുമാനമെടുക്കുമെന്ന് പ്രതീക്ഷിക്കുന്നു.
ആർജെഡി നേതാവ് റാബ്രി ദേവിക്ക് മറ്റൊരു വീട് അനുവദിച്ചുകൊണ്ട് ബിഹാർ സർക്കാർ കത്ത് നൽകിയെങ്കിലും പട്നയിലെ നിലവിലെ 10, സർക്കുലർ റോഡ് എന്ന വിലാസത്തിൽ നിന്ന് മാറില്ലെന്ന് ആർജെഡി പറഞ്ഞു. സര്ക്കാര് തീരുമാനം രാഷ്ട്രീയപ്രേരിതവും കെട്ടിച്ചമച്ചതുമാണെന്നും അവർ അവകാശപ്പെട്ടു. സംസ്ഥാന കെട്ടിട നിർമ്മാണ വകുപ്പ് പുറപ്പെടുവിച്ച വിജ്ഞാപനമനുസരിച്ച്, റാബ്രി ദേവിക്ക് 39, ഹാർഡിങ്കെ റോഡില് വസതി അനുവദിച്ചിട്ടുണ്ട്. 2005 മുതൽ അവർ താമസിക്കുന്ന വസതി, മുഖ്യമന്ത്രിയുടെ വസതിക്കും രാജ്ഭവനും സമീപമായതിനാല് കൂടുതൽ പ്രാധാന്യമുള്ളതാണ്. രാഷ്ട്രീയ ജനതാദൾ (ആർജെഡി) പ്രവർത്തനങ്ങളുടെ കേന്ദ്രമായി ഇത് പ്രവർത്തിക്കുന്നു. പ്രധാന യോഗങ്ങളും ചർച്ചകളും നടക്കുന്നതിവിടെയാണ്. മുഖ്യമന്ത്രി സ്ഥാനം ഒഴിഞ്ഞതിനു ശേഷം ഭർത്താവും ആർജെഡി അധ്യക്ഷനും മുൻ മുഖ്യമന്ത്രിയുമായ ലാലു പ്രസാദിനൊപ്പം റാബ്രി ദേവി ഇവിടെയാണ് താമസിക്കുന്നത്. ഇപ്പോൾ സിംഗപ്പൂരിലുള്ള അവരുടെ മകൾ രോഹിണി ആചാര്യ, നിതീഷ് കുമാർ സർക്കാർ ‘ലാലു പ്രസാദിനെ അപമാനിക്കാൻ തന്റെ കുടുംബത്തെ ലക്ഷ്യം വയ്ക്കുകയാണ്’ എന്ന് ആരോപിക്കുന്നു. ‘സർക്കാരിന് ചെയ്യാൻ തോന്നുന്നതെന്തും ചെയ്യട്ടെ, റാബ്രി ദേവി വീട് ഒഴിയില്ല’ എന്നാണ് ആർജെഡി സംസ്ഥാന പ്രസിഡന്റ് മംഗ്നി ലാൽ മണ്ഡൽ പറയുന്നത്.
നിയമസഭാ തെരഞ്ഞെടുപ്പിലെ പാർട്ടിയുടെ മോശം പ്രകടനത്തെക്കുറിച്ചുള്ള ആദ്യ അവലോകനത്തിൽ, നിതീഷ് കുമാർ വനിതകൾക്ക് നല്കിയ 10,000 രൂപ, ഇന്ത്യ സഖ്യത്തില് സീറ്റ് വിഭജനത്തിലെ കാലതാമസം, സ്ഥാനാർത്ഥികളുടെ മാറ്റം, പട്ടികയിലെ പൊരുത്തക്കേടുകൾ, ആഭ്യന്തര ഭിന്നത, എസ്ഐആർ, തെരഞ്ഞെടുപ്പ് ക്രമക്കേടുകൾ എന്നിവയാണ് പാർട്ടിയുടെ പരാജയത്തിന് കാരണമായതെന്ന് ബിഹാറിലെ കോൺഗ്രസ് നേതാക്കൾ കേന്ദ്രനേതൃത്വത്തെ അറിയിച്ചു. കോൺഗ്രസ് ആസ്ഥാനമായ ഇന്ദിരാ ഭവനില് നടന്ന യോഗത്തിൽ പാർട്ടി അധ്യക്ഷന് മല്ലികാർജുൻ ഖാർഗെ, ലോക്സഭാ പ്രതിപക്ഷ നേതാവ് രാഹുൽ ഗാന്ധി, ജനറൽ സെക്രട്ടറി കെ സി വേണുഗോപാൽ എന്നിവർ സ്ഥാനാർത്ഥികളുമായി സംവദിച്ചു. സംസ്ഥാന പാര്ട്ടി മേധാവി രാജേഷ് റാം, ബിഹാർ ചുമതലയുള്ള കൃഷ്ണ അല്ലാവരു, എംപിമാരായ അഖിലേഷ് പ്രസാദ് സിങ്, താരിഖ് അൻവർ, പൂർണിയയിൽ നിന്നുള്ള സ്വതന്ത്ര എംപി പപ്പു യാദവ് എന്നിവരുമായും നേതൃത്വം കൂടിക്കാഴ്ച നടത്തി.
ബിഹാറിലെ എൻഡി എ സഖ്യകക്ഷിയായ രാഷ്ട്രീയ ലോക് മോർച്ച (ആർഎൽഎം) തലവന് ഉപേന്ദ്ര കുശ്വാഹയുടെ മകൻ ദീപക് പ്രകാശിനെ നിതീഷ് കുമാർ മന്ത്രിസഭയിൽ ഉൾപ്പെടുത്താനുള്ള തീരുമാനം പാര്ട്ടിയില് രാജിപരമ്പരയ്ക്ക് കാരണമായി. നേതാവിന്റെ മകനെ കാബിനറ്റ് മന്ത്രിയാക്കാനുള്ള തീരുമാനത്തിൽ പ്രതിഷേധിച്ച്, സംസ്ഥാന അധ്യക്ഷന് മഹേന്ദ്ര കുശ്വാഹ, ഉപാധ്യക്ഷന് ജിതേന്ദ്ര നാഥ് ഉൾപ്പെടെ ഏഴ് നേതാക്കൾ രാജിവച്ചു. സോഷ്യലിസ്റ്റ് തത്വങ്ങൾ പിന്തുടരുന്നതിനുപകരം കുശ്വാഹ ‘പരിവാർവാദ് (വംശപരമ്പര) രാഷ്ട്രീയം’ അവലംബിക്കുന്നുവെന്ന് ആരോപിച്ചാണ് രാജി. നിയമസഭാ തെരഞ്ഞെടുപ്പിൽ എൻഡിഎയുടെ ഭാഗമായി ആറ് സീറ്റുകളിൽ മത്സരിച്ച്, നാലെണ്ണം ആർഎൽഎം നേടി. സംസ്ഥാനത്ത് എൻഡിഎ വൻ വിജയം നേടിയതോടെ ഒരു മന്ത്രി സ്ഥാനവും ലഭിച്ചു. കുടുംബരാഷ്ട്രീയത്തിന്റെ പേരിൽ ആർജെഡിയെയും അതിന്റെ സ്ഥാപകൻ ലാലു പ്രസാദിനെയും വിമര്ശിച്ചിരുന്നയാളാണ് കുശ്വാഹ.
(ഐപിഎ)
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.