ഏജന്റിക് എഐ: ചിന്തിക്കുന്ന നിർമ്മിത ബുദ്ധി

ഇന്ത്യയിലെ വിദ്യാർത്ഥികൾ മുതൽ തൊഴിലാളികൾ വരെയും എല്ലാരുടെയും കൈയിൽ ഇന്നൊരു പുതിയ സഹായിയാണ് എഐ (Arti­fi­cial Intel­li­gence). അതിൽ ഏറ്റവും ജനപ്രിയമായത് ചാറ്റ്‌ബോട്ടുകൾ – അതായത് ജനറേറ്റിവ് എഐ. എന്നാൽ, അടുത്ത തലമുറയിൽ കാൽവയ്ക്കുകയാണ് മറ്റൊരു ശക്തൻ. അതാണ് ഏജന്റിക് എഐ. നമുക്ക് അറിയാവുന്ന Chat­G­PT പോലുള്ളവ ജനറേറ്റിവ് എഐയിലാണ് പ്രവർത്തിക്കുന്നത്. കവിത എഴുതുന്നു, ലേഖനം തയ്യാറാക്കുന്നു. ചിത്രങ്ങൾ സൃഷ്ടിക്കുന്നു, കോഡ് എഴുതുന്നു. എന്നാൽ ഏജന്റിക് എഐ ഇതല്ല. ചിന്തിച്ചും തീരുമാനിച്ചും മുന്നേറുന്ന ബുദ്ധിയാണ്.

ഇത് പുതിയ തലമുറ എഐ ആണ്.
ഒരു ലക്ഷ്യം നൽകിയാൽ, അതിലേക്ക് എത്താൻ വഴികൾ കണ്ടെത്താൻ, സ്വയം തീരുമാനമെടുക്കാനും നടപ്പാക്കാനും തിരുത്താനും ഇതിന് കഴിയും. ‘ഒരു യാത്ര പ്ലാൻ ചെയ്യൂ’ എന്ന നിർദേശം നൽകുന്നു എന്ന് വയ്ക്കുക. നിങ്ങളുടെ ഇ‑മെയിൽ പരിശോധിച്ച് ഒഴിവുള്ള തീയതികൾ കാണും, വിമാന ചാർജുകൾ പരിശോധിക്കും, ഹോട്ടൽ റിവ്യൂസ് വായിക്കും, ഒടുവിൽ ഒരു പൂർണ യാത്രാ പദ്ധതി തയ്യാറാക്കും — നിങ്ങൾ ഇടപെടാതെ തന്നെ. ഇന്ന് നമ്മളെ ആശ്ചര്യപ്പെടുത്തുന്ന Chat­G­PT പോലുള്ള ടൂളുകൾ ഏജന്റിക് എഐ വരുന്നതതോടെ അപ്രത്യക്ഷമാകും. ഏജന്റിക് എഐ വരും കാലത്തിന്റെ സൂപ്പർ ഹീറോ ആയിരിക്കും.

ആർട്ടിഫിഷ്യൽ ഇന്റലിജൻസ് (AI) രംഗത്ത് അതിവേഗം വളരുന്ന ഒരു സാങ്കേതികവിദ്യയാണ് ഏജന്റിക് എഐ എന്ന് പറയാം. നിലവിലുള്ള ജനറേറ്റീവ് എഐയുടെ സാധ്യതകളെക്കാൾ ഒരു പടി മുന്നിൽ നിൽക്കുന്ന ഈ കണ്ടുപിടുത്തം, ഭാവിയിൽ നമ്മുടെ ജീവിതത്തിൽ വലിയ മാറ്റങ്ങൾ കൊണ്ടുവരാൻ സാധ്യതയുണ്ടെന്ന് വിദഗ്ധർ അഭിപ്രായപ്പെടുന്നു. സാധാരണ എഐ സിസ്റ്റങ്ങളിൽ നിന്ന് വ്യത്യസ്തമായി, ഏജന്റ് എഐക്ക് സ്വന്തമായി തീരുമാനങ്ങൾ എടുക്കാനും ഒരു പ്രത്യേക ലക്ഷ്യം പൂർത്തിയാക്കാനും ചുറ്റുപാടുകളുമായി ഇടപെഴകാനും കഴിയും. ഒരു മനുഷ്യൻ ഒരു ജോലി ചെയ്യാൻ സ്വയം ആലോചിച്ച് പ്രവർത്തിക്കുന്നതിന് സമാനമാണിത്. സ്വന്തമായി കാര്യങ്ങൾ ചെയ്യാനുള്ള കഴിവ്, പുതിയ കാര്യങ്ങൾ പഠിച്ചെടുക്കാനുള്ള കഴിവ്, ചുറ്റുപാടുമായി ഇടപെടാനുള്ള കഴിവ്, ഒരു പ്രത്യേക ലക്ഷ്യത്തിൽ ശ്രദ്ധ കേന്ദ്രീകരിക്കാനുള്ള കഴിവ്, ദീർഘകാലം പ്രവർത്തിക്കാനുള്ള കഴിവ് എന്നിവയെല്ലാം ഏജന്റ് എഐയുടെ പ്രധാന പ്രത്യേകതകളാണ്.

ഇപ്പോൾ പ്രചാരത്തിലുള്ള Chat­G­PT, ഡീപ് സീ, ജെമിനി പോലുള്ള ജനറേറ്റീവ് എഐ കൾ നമ്മൾ നൽകുന്ന വിവരങ്ങൾ ഉപയോഗിച്ച് പുതിയ കണ്ടന്റുകൾ സൃഷ്ടിക്കാൻ കഴിവുള്ളവയാണ്. എന്നാൽ, ഇവയ്ക്ക് സ്വന്തമായി ഒരു ജോലി പൂർത്തിയാക്കാനോ, തീരുമാനങ്ങൾ എടുക്കാനോ കഴിയില്ല. ഏജന്റ് എഐ ഈ പരിമിതികളെ മറികടക്കുന്നു. ഏജന്റ് എഐയുടെ സാധ്യതകൾ വളരെ വലുതാണ്. ഓട്ടോമേഷൻ, ശാസ്ത്രീയ ഗവേഷണം, വ്യവസായം, ആരോഗ്യ സംരക്ഷണം, വിദ്യാഭ്യാസം തുടങ്ങി വിവിധ മേഖലകളിൽ ഇത് വിപ്ലവം സൃഷ്ടിക്കാൻ സാധ്യതയുണ്ട്. ബുദ്ധിമുട്ടുള്ള ജോലികൾ മനുഷ്യസഹായമില്ലാതെ പൂർത്തിയാക്കാനും, പുതിയ കണ്ടുപിടുത്തങ്ങൾ നടത്താനും ഉത്പാദനക്ഷമത വർധിപ്പിക്കാനും വ്യക്തിഗത ചികിത്സാരീതികൾ നൽകാനും പഠനം കൂടുതൽ എളുപ്പമാക്കാനും ഏജന്റ് എഐക്ക് കഴിയും. അതേസമയം, ഏജന്റ് എഐയുടെ വികസനവും ഉപയോഗവും ചില വെല്ലുവിളികളും ഉയർത്തുന്നുണ്ട്. ഇത് വികസിപ്പിക്കാൻ ഉയർന്ന വൈദഗ്ധ്യം ആവശ്യമാണ്. കൂടാതെ, ഇത് സ്വന്തമായി തീരുമാനങ്ങൾ എടുക്കുന്നതിനാൽ ഇതിന്റെ സുരക്ഷയും വിശ്വാസ്യതയും ഉറപ്പാക്കേണ്ടത് പ്രധാനമാണ്. ഇതിന്റെ ഉപയോഗം തൊഴിൽ നഷ്ടം, സ്വകാര്യത ലംഘനം തുടങ്ങിയ ധാർമ്മിക പ്രശ്നങ്ങൾക്ക് കാരണമായേക്കാം എന്ന ആശങ്കകളും നിലവിലുണ്ട്.

ഏജന്റ് എഐ ടൂളുകൾ ഇപ്പോഴും ഗവേഷണത്തിന്റെ ആദ്യ ഘട്ടത്തിലാണ്. സാധാരണക്കാർക്ക് ഉപയോഗിക്കാൻ പറ്റിയ ടൂളുകൾ ഇപ്പോൾ വ്യാപകമായി ലഭ്യമല്ല. എന്നാൽ, ഓട്ടോണമസ് വാഹനങ്ങൾ, ചില സ്മാർട്ട് അസിസ്റ്റന്റുകൾ എന്നിവ ഏജന്റ് എഐയുടെ ലളിതമായ രൂപങ്ങളായി കണക്കാക്കാം. ഭാവിയിൽ, കൂടുതൽ വിപുലമായ ഏജന്റ് എഐ ടൂളുകൾ നമ്മുടെ ദൈനംദിന ജീവിതത്തിന്റെ ഭാഗമായി മാറിയേക്കാം.
ഏജന്റ് എഐ, ആർട്ടിഫിഷ്യൽ ഇന്റലിജൻസ് രംഗത്തെ ഒരു സുപ്രധാന മുന്നേറ്റമാണ് എന്നതിൽ സംശയമില്ല. വരും കാലത്ത് ഇത് ലോകത്തെ എങ്ങനെ മാറ്റും എന്ന് കാത്തിരുന്ന് കാണേണ്ടിയിരിക്കുന്നു. അതേസമയം, ഇതിന്റെ വികസനത്തിലും ഉപയോഗത്തിലും സുരക്ഷയും ധാർമ്മികതയും ഉറപ്പാക്കേണ്ടത് അത്യാവശ്യമാണെന്ന് വിദഗ്ധർ മുന്നറിയിപ്പ് നൽകുന്നു.