തൃണമൂൽ കോൺഗ്രസിന്റെ മഹുവ മൊയ്ത്രയെ എംപി സ്ഥാനത്തുനിന്നും അയോഗ്യയാക്കണമെന്ന് പാർലമെന്ററി എത്തിക്സ് കമ്മിറ്റിയുടെ ശുപാര്ശ. ഇന്നത്തെ യോഗത്തില് അവതരിപ്പിക്കാന് തയ്യാറാക്കിയ 500 പേജുള്ള റിപ്പോർട്ടിന്റെ പ്രസക്തഭാഗങ്ങള് ഇന്നലെ മാധ്യമങ്ങള്ക്ക് ലഭിച്ചു. പാര്ലമെന്റില് ചോദ്യം ഉന്നയിക്കാന് പണവും പാരിതോഷികങ്ങളും കൈപ്പറ്റിയെന്ന ആരോപണത്തില് മഹുവയ്ക്കെതിരെ നിയമപരവും ശക്തവും സമയബന്ധിതവുമായ അന്വേഷണം നടത്തണമെന്നും സമിതി ശുപാർശ ചെയ്തിട്ടുണ്ട്. ബിജെപി നേതാവ് വിനോദ് സോംകറാണ് എത്തിക്സ് കമ്മിറ്റി ചെയര്മാന്. നവംബർ രണ്ടിന് കമ്മിറ്റി മുമ്പാകെ ഹാജരായെങ്കിലും കമ്മിറ്റി ചെയര്മാന് നിലവാരമില്ലാത്ത ചോദ്യങ്ങള് ചോദിച്ചുവെന്നാരോപിച്ച് മഹുവ ഇറങ്ങിപ്പോകുകയായിരുന്നു.
അതേസമയം കോഴ ആരോപണത്തില് മഹുവ മൊയ്ത്രയ്ക്കെതിരെ സിബിഐ അന്വേഷണത്തിന് ലോക്പാല് ഉത്തരവിട്ടതായി ബിജെപി എംപി നിഷികാന്ത് ദുബെ പറഞ്ഞു. രാജ്യസുരക്ഷയിൽ വിട്ടുവീഴ്ച വരുത്തിയ മഹുവ മൊയ്ത്രയുടെ അഴിമതിയെക്കുറിച്ച് തന്റെ പരാതിയുടെ അടിസ്ഥാനത്തിലാണ് സിബിഐ അന്വേഷണത്തിന് ലോക്പാൽ ഉത്തരവെന്ന് ബിജെപി എംപി സമൂഹമാധ്യമമായ എക്സിലൂടെ അറിയിച്ചു.
പ്രധാനമന്ത്രി നരേന്ദ്ര മോഡിയെയും അഡാനി ഗ്രൂപ്പിനെയും ലക്ഷ്യമിട്ട് പാർലമെന്റിൽ ചോദ്യങ്ങൾ ചോദിക്കാൻ വ്യവസായി ദർശൻ ഹിരാനന്ദാനിയിൽ നിന്ന് മൊയ്ത്ര പണം സ്വീകരിച്ചുവെന്നായിരുന്നു ദുബെയുടെ ആരോപണം. പാർലമെന്ററി ലോഗിൻ പാസ്വേഡ് പങ്കുവച്ച് മെഹുവ ദേശീയ സുരക്ഷയിൽ വിട്ടുവീഴ്ച വരുത്തിയതായും ബിജെപി എംപി ആരോപിക്കുന്നു.
English Summary:Allegation of bribery for the question; BJP MP says CBI has ordered inquiry against Mahua Moitra
You may also like this video
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.