സംസ്ഥാനത്ത് ഇടവിട്ട് മഴ തുടരുന്ന സാഹചര്യത്തില് ഡെങ്കിപ്പനിയ്ക്കെതിരെ ജാഗ്രത പാലിക്കണമെന്ന് ആരോഗ്യ വകുപ്പ് മന്ത്രി വീണാ ജോര്ജ്. ഡെങ്കിപ്പനി വ്യാപിക്കാതിരിക്കാന് എല്ലാവരും മുന്കരുതലുകളെടുക്കണം. എറണാകുളം, തിരുവനന്തപുരം ഉള്പ്പെടെയുള്ള ജില്ലകളില് പ്രതിരോധ പ്രവര്ത്തനങ്ങള് ശക്തമാക്കണം. മഴക്കാല പൂര്വ ശുചീകരണ പ്രവര്ത്തനങ്ങള് ഊര്ജിതമാക്കാന് മുഖ്യമന്ത്രിയുടെ നേതൃത്വത്തിലാണ് യോഗം ചേര്ന്നത്. ഇതുകൂടാതെ തദ്ദേശ സ്വയംഭരണ വകുപ്പിന്റെ നേതൃത്വത്തിലുള്ള പ്രവര്ത്തനങ്ങളും ആരോഗ്യ ജാഗ്രതാ കലണ്ടര് പ്രകാരമുള്ള ആരോഗ്യ വകുപ്പിന്റെ പ്രവര്ത്തനങ്ങളും നടന്നു. കൊതുക് നശീകരണ പ്രവര്ത്തനങ്ങള്ക്കും ഉറവിട നശീകരണ പ്രവര്ത്തനങ്ങള്ക്കും പ്രധാന്യം നല്കണം. അവബോധ പ്രവര്ത്തനങ്ങള് കൂടുതല് ശക്തമാക്കാനും ആരോഗ്യ വകുപ്പ് ഡയറക്ടര്ക്ക് മന്ത്രി നിര്ദേശം നല്കി.
വീടിന്റെ അകത്തും പുറത്തും ചെറുതും വലുതുമായ ഇടങ്ങളില് വെള്ളം കെട്ടി നില്ക്കാതെ നോക്കണം. വീടിന്റെ ചുറ്റുപാട്, ടെറസ് എന്നിവിടങ്ങളിലും വെള്ളം കെട്ടിനില്ക്കാതെ നോക്കണം. അലക്ഷ്യമായി വലിച്ചെറിയുന്ന പ്ലാസ്റ്റിക്ക്, ചിരട്ട മുതലായവയില് വെള്ളം കെട്ടി നിന്ന് കൊതുക് വളരാം. വീട്ടിനകത്തെ ചെടികള് വയ്ക്കുന്ന ട്രേ കൊതുകിന്റെ ഉറവിടമാകാറായി കാണുന്നുണ്ട്. അതിനാല് ചെടിച്ചട്ടികളുടെയും ഫ്രിഡ്ജിലേയും ട്രേയിലെ വെള്ളം ആഴ്ച തോറും മാറ്റണം.
അടഞ്ഞുകിടക്കുന്ന വീടുകള്, സ്ഥാപനങ്ങള്, ഉപയോഗശൂന്യമായ ടയറുകള്, ബ്ലോക്കായ ഓടകള്, വീടിനകത്തെ ചെടികള്, വെള്ളത്തിന്റെ ടാങ്കുകള്, ഹാര്ഡ് വെയര് കടകളിലേയും, അടഞ്ഞ് കിടക്കുന്ന വീടുകളിലേയും ക്ലോസറ്റുകള്, പഴയ വാഹനങ്ങള് എന്നിവയും ശ്രദ്ധിക്കണം. നിര്മ്മാണ പ്രവര്ത്തനങ്ങള് നടക്കുന്ന സ്ഥലങ്ങളില് കൂത്താടി പ്രജനനം നടക്കുന്നുണ്ടോ എന്ന് പ്രത്യേകം ശ്രദ്ധിക്കണം. സ്ഥാപനങ്ങള്, ആശുപത്രികള്, ഹോസ്റ്റലുകള് എന്നിവ കൃത്യമായി ശുചീകരിക്കണം. അതിഥി തൊഴിലാളികളുടെ താമസ സ്ഥലങ്ങളും പ്രത്യേകം ശ്രദ്ധിക്കണം. പനി ബാധിച്ചാല് സ്വയം ചികിത്സ പാടില്ല. നീണ്ടുനില്ക്കുന്ന പനി ശ്രദ്ധിക്കണം. അതിനാല് പനി ബാധിച്ചാല് മറ്റ് പകര്ച്ചപ്പനികളല്ലെന്ന് ഉറപ്പ് വരുത്തേണ്ടതാണ്.
English Summary;Care must be taken not to spread dengue fever: Minister Veena George
You may also like this video
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.