സിവില്‍ സര്‍വീസ് പരീക്ഷയില്‍ ആദ്യ നാല് റാങ്കുകളും പെണ്‍കുട്ടികള്‍ക്ക്. ഡല്‍ഹി യൂണിവേഴ്സിറ്റിയില്‍ നിന്ന് ബിരുദം നേടിയ ഇഷിത കിഷോറിനാണ് ഒന്നാം റാങ്ക്. ഇഷിത തന്റെ മൂന്നാമത്തെ ശ്രമത്തിലാണ് ഒന്നാമതെത്തിയത്. ഗരിമ ലോഹ്യ രണ്ടാം റാങ്ക് നേടി. ഉമ ഹരതി മൂന്നാം റാങ്കും സ്മൃതി മിശ്ര നാലാം റാങ്കും നേടി. ഗരിമയും സ്മൃതിയും ഡല്‍ഹി യൂണിവേഴ്സിറ്റിയില്‍ നിന്നും ബിരുദ പഠനം പൂര്‍ത്തിയാക്കിയവരാണ്. കിരോരിമല്‍ കോളജില്‍ നിന്നാണ് ഗരിമ ലോഹ്യ കൊമേഴ്‌സില്‍ ബിരുദ പഠനം പൂര്‍ത്തിയാക്കിയത്.

ഇഷിത കിഷോര്‍, ഗരിമ ലോഹ്യ

സ്മൃതി മിശ്ര മിറാൻഡ ഹൗസ് കോളജിലെ ബിഎസ്‌സി വിദ്യാര്‍ത്ഥിയായിരുന്നു. ഉമ ഹരതി ഐഐടി ഹൈദരാബാദില്‍ നിന്നാണ് ബിടെക് പഠനം പൂര്‍ത്തിയാക്കിയത്. മയൂര്‍ ഹസാരികയ്ക്കാണ് അഞ്ചാം റാങ്ക്. 933 പേരാണ് വിവിധ സർവീസുകളിലേക്കുള്ള അവസാന റാങ്ക് പട്ടികയില്‍ ഇടം പിടിച്ചിരിക്കുന്നത്. ജനറൽ വിഭാഗത്തിൽനിന്ന് 345 പേർക്കാണ് യോഗ്യത.

സിവിൽ സർവീസ് പരീക്ഷയില്‍ മലയാളിത്തിളക്കം

യുപിഎസ്‍സി സിവിൽ സർവീസ് പരീക്ഷ റാങ്ക് പട്ടികയിൽ മലയാളിത്തിളക്കം. ആദ്യ പത്തു റാങ്കിൽ ഇടംപിടിച്ച കോട്ടയം പാലാ സ്വദേശി ഗഹന നവ്യ ജയിംസാണ് കേരളത്തിൽ ഒന്നാമത്. ദേശീയതലത്തിൽ ഗഹനയ്ക്ക് ആറാം റാങ്കാണ്. ഗഹന ഉൾപ്പെടെ ആറു പേരാണ് കേരളത്തിൽ നിന്നും ആദ്യ നൂറിൽ ഇടംപിടിച്ചത്. പാലാ സെന്റ് തോമസ് കോളജ് റിട്ട. ഹിന്ദി പ്രഫ. സി കെ ജയിംസ് തോമസിന്റെയും അധ്യാപിക ദീപാ ജോർജിന്റെയും മകളാണ് ഗഹന. തിരുവനന്തപുരം ബാലരാമപുരം സ്വദേശി ആര്യ വി എം 36-ാം റാങ്ക് നേടി.

നെയ്യാറ്റിൻകര ജില്ലാ ആശുപത്രിയിലെ റിട്ട. ഹെഡ് ക്ലാർക്ക് വെങ്കടേശൻ പോറ്റിയുടേയും നേമം ഗവ. യുപി സ്കൂളിലെ റിട്ട. അധ്യാപിക മിനി വി ആറിന്റേയും ഏക മകളാണ്. ചൈതന്യ അശ്വതി (37), അനൂപ് ദാസ് (38), എസ് ഗൗതം രാജ് (63), മാലിനി എസ് (81) എന്നിവരും ആദ്യ നൂറുപേരുടെ പട്ടികയിൽ ഇടം നേടി.

ജോയൽ എബ്രഹാം (167), ഫെബിൻ ജോസ് തോമസ് (254), അഞ്ജന കൃഷ്ണ വി എസ് (355), അർജുൻ ഉണ്ണികൃഷ്ണൻ (375), വിഷ്ണു ശശികുമാർ (394), ആരാധിക നായർ (491), മുഹമ്മദ് അഫ്‌സൽ (599), ആർദ്ര അശോക് (681), നിഹാല കെ ഷരീഫ് (706), അഖില ബി എസ് (760), ഫാത്തിമ ഹാരിസ് (774), കാജൽ രാജു (910), ഷെറിൻ ഷഹാന ടി കെ (913) എന്നിവരാണ് റാങ്ക് പട്ടികയിൽ ഇടം പിടിച്ച മറ്റു മലയാളികൾ.

English Summary;Civil Service Exam Result Declared; First four ranks are for girls