കാലാവസ്ഥാ വ്യതിയാനത്തിന്റെ ഫലമായി ഇന്ത്യയുടെ ആഭ്യന്തര മൊത്ത ഉല്പാദന (ജിഡിപി) വളര്‍ച്ച തകരുമെന്ന് ഏഷ്യന്‍ ഡവലപ്മെന്റ് ബാങ്ക് (എഡിബി). ഏഷ്യന്‍ മേഖലയിലും പസഫിക് രാജ്യങ്ങളിലും ജിഡിപി നിരക്ക് 2070 ഓടെ 16.9 ശതമാനം ഇടിയുമെന്നും എഡിബി റിപ്പോര്‍ട്ടില്‍ പറയുന്നു. ഇന്ത്യയ്ക്ക് 24.7 ശതമാനം ജിഡിപി നഷ്ടമുണ്ടാകും.
സമുദ്ര ജലനിരപ്പിലുണ്ടാകുന്ന വര്‍ധന, തൊഴില്‍ ഉല്പാദനക്ഷമതയിലുള്ള ഇടിവ് എന്നിവമൂലം ലോല സാമ്പത്തിക മേഖല വന്‍ തകര്‍ച്ചയെ അഭിമുഖീകരിക്കും. എഡിബിയുടെ ഏഷ്യ — പസഫിക് ക്ലൈമറ്റ് റിപ്പോര്‍ട്ടിലാണ് ഇന്ത്യയടക്കമുള്ള രാജ്യങ്ങളില്‍ കാലാവസ്ഥാ വ്യതിയാനം ഗുരുതര ഭവിഷ്യത്ത് സൃഷ്ടിക്കുമെന്ന് മുന്നറിയിപ്പ് നല്‍കുന്നത്. സമുദ്ര ജലനിരപ്പ് വര്‍ധിക്കുന്നത് 300 ദശലക്ഷം ജനങ്ങളുടെ ജീവന്‍ അപകടത്തിലാക്കും. കോടികള്‍ വിലപ്പിടിപ്പുള്ള കടലോര വിഭവങ്ങള്‍ നാമാവശേഷകുമെന്നും റിപ്പോര്‍ട്ടില്‍ പറയുന്നു.
കാലാവസ്ഥാ വ്യതിയാനത്തിന്റെ അനന്തരഫലമായി അതിവൃഷ്ടി, ഉഷ്ണതരംഗം, വെള്ളപ്പൊക്കം എന്നിവ മേഖലയെ പ്രതികൂലമായി ബാധിക്കും. ഇത് സാമ്പത്തിക തകര്‍ച്ചയ്ക്കും മനുഷ്യജീവനും ഭീഷണിയാകുന്ന നിലയിലേക്കും എത്തിച്ചേരുമെന്ന് എഡിബി പ്രസിഡന്റ് മസാത്‌സുഗു അസകാവ പറഞ്ഞു. കാലാവസ്ഥ വ്യതിയാനത്തെ പ്രതിരോധിക്കാന്‍ വൈകരുതെന്നും വൈകുന്ന ഓരോ നിമിഷവും വിലപ്പെട്ടതാണെന്നും അദ്ദേഹം മുന്നറിയിപ്പ് നല്‍കി.
ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.