കായംകുളം നഗരസഭ 5, 8 വാർഡുകളിലെ റോഡുകൾ തകർന്ന് സഞ്ചാരയോഗ്യമല്ലാതായിട്ട് വർഷങ്ങൾ കഴിഞ്ഞിട്ടും നഗരസഭ കൗൺസിലർമാരുടെ അനാസ്ഥകാരണം യാതൊരു നടപടിയും ഉണ്ടാകാത്തതിൽ പ്രതിഷേധിച്ച് സിപിഐ ബ്രാഞ്ച് കമ്മിറ്റികളുടെ നേതൃത്വത്തിൽ റോഡിൽ വാഴ വെച്ചു. നഗരസഭ എട്ടാം വാർഡിലെ നായ്ക്കൽ പറമ്പ്-ചക്കാലമുക്ക് റോഡ്, അഞ്ചാം വാർഡിലെ നായ്ക്കൽപറമ്പ്- ചക്കാലപറമ്പ് റോഡ്, മുടയിൽ ചെമ്പകപ്പള്ളി റോഡ്, നൈനാരേത്ത്- ചെങ്കിലാത്ത് റോഡ് തുടങ്ങിയ റോഡുകൾ വർഷങ്ങളായി തകർന്ന് ഗതാഗത ക്ലേശം രൂക്ഷമാണ്.
പട്ടണവുമായി ബന്ധപ്പെട്ടുള്ള ഈ വാർഡുകളിൽ നിന്നും സ്കൂളുകളും കോളജും ഉൾപ്പെടെയുള്ള സ്ഥലങ്ങളിലേയ്ക്ക് ദൈനംദിനം നൂറുകണക്കിന് കുട്ടികളും പൊതുജനങ്ങളും സഞ്ചരിക്കുന്ന റോഡാണിത്. നിരവധി തവണ പരാതികൾ നൽകിയെങ്കിലും ഇത് സഞ്ചാരയോഗ്യമാക്കാൻ ജനപ്രതിനിധികൾ തയ്യാറാകാത്തതിൽ പ്രതിഷേധിച്ചാണ് റോഡിൽ വാഴ നട്ടത്. കായംകുളം നഗരസഭ ഓരോ സാമ്പത്തിക വർഷവും 9 ലക്ഷം രൂപ വീതം ഓരോ വാർഡിനും അനുവദിച്ചിട്ടും ഇതിനായി എസ്റ്റിമേറ്റ് തയ്യാറാക്കി പ്രോജക്ട് തയ്യാറാക്കാത്ത കാരണത്താൽ ഫണ്ട് ലാപ്സായി പോകുന്ന സ്ഥിതിയാണുള്ളത്.
പദ്ധതി നിർവഹണവുമായി അറിവില്ലാത്ത ജനപ്രതിനിധികൾ കാരണം ജനങ്ങൾ ഏറെ ബുദ്ധിമുട്ട് അനുഭവിക്കുകയാണ്. അടിയന്തിരമായി ഈ റോഡുകൾ നവീകരിച്ച് സഞ്ചാരയോഗ്യമാക്കാത്ത പക്ഷം ജനങ്ങളെ അണിനിരത്തി ബഹുജന പ്രക്ഷോഭത്തിന് നേതൃത്വം നൽകുമെന്ന് ലോക്കൽ കമ്മിറ്റി സെക്രട്ടറി സമീർ ചിറയിൽ അറിയിച്ചു.
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.