സംസ്ഥാനത്തെ സർക്കാർ ഓഫീസുകളുടെ പ്രവൃത്തി ദിവസം ആഴ്ചയിൽ അഞ്ചായി ചുരുക്കുന്നത് സംബന്ധിച്ച് സർവീസ് സംഘടനകളുടെ യോഗം ചീഫ് സെക്രട്ടറി വീണ്ടും വിളിച്ചു. നാളെ രാവിലെ 10 മണിക്ക് ഓൺലൈനായാണ് ഈ നിർണായക കൂടിക്കാഴ്ച നടക്കുക. നേരത്തെ നിശ്ചയിച്ചിരുന്നതും എന്നാൽ പിന്നീട് രണ്ടു തവണ മാറ്റിവച്ചതുമായ യോഗമാണ് ഇപ്പോൾ ചേരുന്നത്. ഓരോ സംഘടനയിൽ നിന്നും ഒരു പ്രതിനിധിയെ വീതം യോഗത്തിൽ പങ്കെടുപ്പിക്കാനാണ് ചീഫ് സെക്രട്ടറി നിര്ദേശം നൽകിയിരിക്കുന്നത്.
ബാങ്ക് ജീവനക്കാരുടെ മാതൃകയിൽ തങ്ങൾക്കും അഞ്ച് ദിവസത്തെ പ്രവൃത്തി ദിനം വേണമെന്ന് സംസ്ഥാന സർക്കാർ ജീവനക്കാർ ദീർഘകാലമായി ആവശ്യപ്പെട്ടുവരികയാണ്. ഭരണ പരിഷ്കാര കമ്മിഷനും ശമ്പള കമ്മിഷനും ഇത് സംബന്ധിച്ച ശുപാർശകൾ നേരത്തെ തന്നെ സർക്കാരിന് സമർപ്പിച്ചിരുന്നു. സർക്കാർ തലത്തിൽ എടുക്കുന്ന ഈ തീരുമാനം നടപ്പിലായാൽ അത് സംസ്ഥാനത്തെ സിവിൽ സർവിസ് മേഖലയിൽ വലിയ മാറ്റങ്ങൾക്ക് വഴിയൊരുക്കും. പ്രവൃത്തി ദിവസം ആറിൽ നിന്ന് അഞ്ചായി കുറയ്ക്കുമ്പോൾ, പ്രതിദിന ജോലി സമയം ഒരു മണിക്കൂർ വീതം വർധിപ്പിക്കണമെന്നാണ് കമ്മിഷനുകൾ മുന്നോട്ടുവച്ച നിര്ദേശം. പൊതു അവധി ദിവസങ്ങൾ കുറയ്ക്കാതെ തന്നെ പ്രവൃത്തി ദിവസം അഞ്ചാക്കണമെന്നാണ് സംഘടനകളുടെ പ്രധാന ആവശ്യം.
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.