കൊല്ലത്ത് ബുള്ളറ്റിൽ നിന്ന് തീപടർന്ന് നാല് വാഹനങ്ങൾ കത്തി നശിച്ചു; കത്തി നശിച്ചത് രണ്ട് ഇരുചക്രവാഹനങ്ങളും കാറും ഓട്ടോറിക്ഷയും

യാത്രയ്ക്കിടെ തീപിടിച്ചത് ശ്രദ്ധയിൽപ്പെട്ടതിനെ തുടർന്ന് റോഡ് വശത്തേക്ക് ഒതുക്കി നിർത്തിയ ബുള്ളറ്റിൽ നിന്ന് തീപടർന്ന് നിർത്തിയിട്ടിരുന്ന നാല് വാഹനങ്ങൾ കത്തി നശിച്ചു. ഇന്ന് ഉച്ചയ്ക്ക് 12.30 ഓടെ കൊല്ലം തിരുമംഗലം ദേശീയപാതയിൽ കിളികൊല്ലൂർ സോണൽ ഓഫീസിന് സമീപം കോയിക്കൽ ജംഗ്‌ഷനിലാണ് സംഭവം. കൊല്ലത്ത് നിന്ന് കല്ലുംതാഴത്തേക്ക് പോകുന്നതിനിടെയാണ് യുവാക്കൾ സഞ്ചരിച്ചിരുന്ന ബുള്ളറ്റിന് തീപിടിച്ചത്.

വശത്തേക്ക് ഒതുക്കി നിർത്തിയപ്പോൾ തന്നെ തൊട്ടടുത്ത് പാർക്ക് ചെയ്തിരുന്ന സ്‌കൂട്ടറിലേക്കും ബൈക്കിലേക്കും തീപടരുകയായിരുന്നു. തുടർന്ന് സമീപത്തുണ്ടായിരുന്ന ഓട്ടോറിക്ഷയിലേക്കും കാറിലേക്കും തീപടർന്നു. വെള്ളിയാഴ്ചയായതിനാൽ തൊട്ടടുത്തുള്ള മസ്ജിദിൽ നിസ്കാരത്തിനായി എത്തിയവരുടേതായിരുന്നു ഇരുചക്രവാഹനങ്ങളും ഓട്ടോറിക്ഷയും. സോണൽ ഓഫീസ് ജീവനക്കാരന്റേതാണ് കത്തി നശിച്ച കാർ.

കടപ്പാക്കട അഗ്നിരക്ഷാനിലയത്തിൽ നിന്ന് രണ്ട് യൂണിറ്റെത്തിയാണ് തീകെടുത്തിയത്. സമീപത്ത് മറ്റ് സ്ഥാപനങ്ങളും വാഹനങ്ങളും ഇല്ലാതിരുന്നതിനാൽ കൂടുതൽ നാശനഷ്ടങ്ങൾ ഒഴിവായി. തീപിടുത്തമുണ്ടായതിനെ തുടർന്ന് ഇതുവഴിയുള്ള ഗതാഗതം ഒരുമണിക്കൂറോളം പൂർണമായും തടസപ്പെട്ടു.

Eng­lish Sum­ma­ry: Four vehi­cles were gut­ted in Kol­lam due to bul­let fire

You may also like this video