കഴിഞ്ഞ വര്ഷം ഗാസ സമ്പദ്വ്യവസ്ഥ 83% ഇടിവ് നേരിട്ടതായി റിപ്പോര്ട്ട്. ഇത് 23 ലക്ഷം ഗാസ നിവാസികളെ ദാരിദ്രത്തിലേക്ക് തള്ളിവിട്ടതായി യുഎന് കോണ്ഫറന്സ് ഓണ് ട്രേഡ് ആന്റ് ഡെവലപ്മെന്റ് (യുഎൻസിടിഎഡി) വ്യക്തമാക്കി. ഇസ്രയേല് ആക്രമണത്തെതുടര്ന്നുണ്ടായ ഘടനാപരമായ നാശനഷ്ടങ്ങളും കടുത്ത സാമ്പത്തിക പ്രതിസന്ധിയും പതിറ്റാണ്ടുകളുടെ വികസനത്തെ ഇല്ലാതാക്കുകയും മേഖലയെ അനിശ്ചിതത്വത്തിലേക്ക് തള്ളിവിടുകയും ചെയ്തു.
2024 ൽ ഗാസയുടെ മൊത്ത ആഭ്യന്തര ഉല്പാദനം (ജിഡിപി) 36.2 കോടി ഡോളറായി കുറഞ്ഞു. 2023 ലും 2024 ലും മൊത്തം നഷ്ടം 87% ആയി. പ്രതിശീർഷ ജിഡിപി 161 ഡോളറായി കുറഞ്ഞു. സാമ്പത്തിക പ്രതിസന്ധി ജിഡിപി കണക്കുകൾക്കപ്പുറത്തേക്ക് വ്യാപിച്ചു. ണപ്പെരുപ്പം 238% ആയി ഉയർന്നു. തൊഴിലില്ലായ്മ 80% ആയി. ഇതിന്റെ നേരിട്ടുള്ള അനന്തരഫലമായി മുനമ്പില് താമസിക്കുന്ന 23 ലക്ഷം ആളുകളും ദാരിദ്ര്യരേഖയ്ക്ക് താഴെയായി. 69 വർഷത്തെ മനുഷ്യവികസനത്തെ തുടച്ചുനീക്കി. ഇതുവരെ രേഖപ്പെടുത്തിയതിൽ വച്ച് ഏറ്റവും ഗുരുതരമായ സാമ്പത്തിക പ്രതിസന്ധിയായിട്ടാണ് യുഎൻസിടിഎഡി ഈ പ്രതിസന്ധിയെ വിശേഷിപ്പിച്ചത്.
ഇസ്രയേലിന്റെ നിയന്ത്രണമില്ലാത്ത ആക്രമണത്തെത്തുടർന്ന്, 2025 ഏപ്രിലോടെ, ഗാസയിലെ എല്ലാ ഘടനകളുടെയും ഏകദേശം 70% കേടുപാടുകൾ സംഭവിക്കുകയോ നശിപ്പിക്കപ്പെടുകയോ ചെയ്തു. അതിൽ ഫാക്ടറികൾ, വീടുകൾ, ആശുപത്രികൾ, സ്കൂളുകൾ, ബാങ്കുകൾ, ഊർജം, വെള്ളം, ടെലികമ്മ്യൂണിക്കേഷൻ, കൃഷി എന്നിവയ്ക്കുള്ള പ്രധാന അടിസ്ഥാന സൗകര്യങ്ങൾ എന്നിവ ഉൾപ്പെടുന്നു. സാമ്പത്തിക പ്രവർത്തനത്തിന്റെ സൂചകമായ ഗാസയിലുടനീളമുള്ള രാത്രികാല പ്രകാശം 2023 ഒക്ടോബറിനും 2025 മെയ് മാസത്തിനും ഇടയിൽ 73% കുറഞ്ഞുവെന്ന് ഉപഗ്രഹ വിശകലനം കാണിക്കുന്നു. അധിനിവേശ പലസ്തീന് പ്രദേശത്തെ മുഴുവൻ സാമ്പത്തിക സ്ഥിതിയും ഗണ്യമായി വഷളായി. 2019 നും 2025 ഏപ്രിലിനും ഇടയിൽ, 176 കോടി ഡോളറിന്റഎ സാമ്പത്തിക കൈമാറ്റങ്ങൾ തടഞ്ഞുവയ്ക്കുകയോ കുറയ്ക്കുകയോ ചെയ്തു. ഇത് 2024 ലെ പലസ്തീൻ ജിഡിപിയുടെ 12.8 ശതമാനത്തിന് തുല്യമാണ്. പൊതു കടവും കുടിശികയും ഏകദേശം 420 കോടി ഡോളറായി ഉയര്ന്നു.2024 ലെ ജിഡിപി 1,095.96 കോടി ഡോളറായിരുന്നു. 2022 ലെ 15,635 കോടി ഡോളറിൽ നിന്ന് ഇത് ഗണ്യമായ ഇടിവാണ്. ഈ ഇടിവ് ജിഡിപിയെ 2010 ലെ നിലവാരത്തിലേക്ക് തിരികെ കൊണ്ടുപോയി.
വെറും 15 മാസത്തിനുള്ളിൽ 22 വർഷത്തെ സാമ്പത്തിക പുരോഗതി ഇല്ലാതാക്കി. ദേശീയ മാനവ വികസന സൂചിക 0.716 ൽ നിന്ന് 0.643 ആയി കുറയുമെന്നും ഇത് ഏകദേശം 25 വർഷത്തെ പുരോഗതി ഇല്ലാതാക്കുമെന്നും പ്രവചിക്കപ്പെടുന്നു. സഞ്ചാര നിയന്ത്രണങ്ങൾ, അരക്ഷിതാവസ്ഥ, ഉല്പാദന ശേഷി നഷ്ടം എന്നിവയാൽ അധിനിവേശ വെസ്റ്റ് ബാങ്ക് ഇതുവരെ ഉണ്ടായിട്ടില്ലാത്തത്ര രൂക്ഷമായ സാമ്പത്തിക മാന്ദ്യം അനുഭവിക്കുകയാണ്. മാനുഷിക പ്രത്യാഘാതങ്ങൾ രൂക്ഷമാണ്. ഗാസയിലെ ജനസംഖ്യ ക്രമേണ അടിയന്തരാവസ്ഥയിലേക്കും ക്ഷാമസമാനമായ അവസ്ഥകളിലേക്കും എത്തിയതായി ഭക്ഷ്യസുരക്ഷാ ഡാറ്റകള് വ്യക്തമാക്കുന്നു. ഗാസ പുനർനിർമ്മാണത്തിന് 7000 കോടി ഡോളറിലധികം വേണ്ടിവരുമെന്ന് യുഎൻസിടിഎഡി കണക്കാക്കുന്നു. ദീർഘകാല വെടിനിർത്തൽ, അടിയന്തര മാനുഷിക സഹായം, സുസ്ഥിരമായ അന്താരാഷ്ട്ര ധനസഹായം എന്നിവയും ഏജന്സി ആവശ്യപ്പെടുന്നു.
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.