അനധികൃത ഖനനം നികത്താനാവാത്ത ആഘാതങ്ങൾ സൃഷ്ടിക്കുമെന്ന് നിരീക്ഷിച്ചുകൊണ്ട്, ആരവല്ലി പർവ്വതനിരകളിലെ ഖനനവുമായി ബന്ധപ്പെട്ട വിഷയങ്ങൾ സമഗ്രമായി പരിശോധിക്കാൻ ഒരു വിദഗ്ദ്ധ സമിതിയെ രൂപീകരിക്കുമെന്ന് സുപ്രീം കോടതി അറിയിച്ചു. ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ്മാല്യ ബാഗ്ചി, ജസ്റ്റിസ് വിപുൽ എം പഞ്ചോളി എന്നിവരടങ്ങിയ ബെഞ്ചാണ് ബുധനാഴ്ച ഈ സുപ്രധാന തീരുമാനം എടുത്തത്. ഖനന മേഖലയിൽ വൈദഗ്ധ്യമുള്ള പരിസ്ഥിതി പ്രവർത്തകരുടെയും ശാസ്ത്രജ്ഞരുടെയും പേരുകൾ നാലാഴ്ചയ്ക്കകം നിർദ്ദേശിക്കാൻ അഡീഷണൽ സോളിസിറ്റർ ജനറൽ ഐശ്വര്യ ഭാട്ടി, അമിക്കസ് ക്യൂറി കെ പരമേശ്വർ എന്നിവരോട് കോടതി നിർദ്ദേശിച്ചു. കോടതിയുടെ നേരിട്ടുള്ള മേൽനോട്ടത്തിലായിരിക്കും ഈ സമിതി പ്രവർത്തിക്കുക.
ആരവല്ലി കുന്നുകളുടെയും നിരകളുടെയും ഏകീകൃത നിർവചനം അംഗീകരിച്ച നവംബർ 20ലെ ഉത്തരവ് താൽക്കാലികമായി മരവിപ്പിച്ചത് കോടതി നീട്ടിയിട്ടുണ്ട്. കുന്നുകളുടെ ഉയരം, അവ തമ്മിലുള്ള ദൂരം എന്നിവ അടിസ്ഥാനമാക്കിയുള്ള പുതിയ നിർവചനം നിലവിൽ വന്നാൽ വലിയൊരു വിഭാഗം പ്രദേശം പരിസ്ഥിതി സംരക്ഷണ പരിധിയിൽ നിന്ന് പുറത്താകുമോ എന്ന ആശങ്ക നിലനിൽക്കുന്നതിനാലാണ് ഈ നടപടി. കുന്നുകൾ തമ്മിലുള്ള അകലം 500 മീറ്ററിൽ കൂടുതലാണെങ്കിൽ അവയെ ആരവല്ലി നിരയുടെ ഭാഗമായി കണക്കാക്കാതിരിക്കുന്നത് ഗുരുതരമായ പ്രത്യാഘാതങ്ങൾ ഉണ്ടാക്കുമെന്ന് കോടതി വിലയിരുത്തി.
ആരവല്ലി മേഖലയിൽ ചില ഇടങ്ങളിൽ ഇപ്പോഴും അനധികൃത ഖനനം നടക്കുന്നുണ്ടെന്ന വിവരം കോടതിയുടെ ശ്രദ്ധയിൽപ്പെട്ടു. എന്നാൽ രാജസ്ഥാനിൽ ഇത്തരത്തിലുള്ള അനധികൃത ഖനനങ്ങൾ അനുവദിക്കില്ലെന്ന് സംസ്ഥാന സർക്കാരിന് വേണ്ടി ഹാജരായ അഡീഷണൽ സോളിസിറ്റർ ജനറൽ കെ എം നടരാജ് ഉറപ്പുനൽകി. ഡൽഹി, ഹരിയാന, രാജസ്ഥാൻ, ഗുജറാത്ത് എന്നീ സംസ്ഥാനങ്ങളിലായി വ്യാപിച്ചുകിടക്കുന്ന ആരവല്ലി മേഖലയിൽ വിദഗ്ദ്ധ സമിതിയുടെ റിപ്പോർട്ട് വരുന്നത് വരെ പുതിയ ഖനന ലൈസൻസുകൾ നൽകുന്നത് കോടതി നേരത്തെ നിരോധിച്ചിരുന്നു.
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.