സൂപ്പര് താരം ലയണല് മെസ്സി അടങ്ങിയ ലോകകപ്പ് ജേതാക്കളായ അർജന്റീന ഫുട്ബോൾ ടീമിനെ ഇന്ത്യയിലെത്തിക്കാനുള്ള അവസരം ഇന്ത്യന് ഫുട്ബോള് അസോസിയേഷൻ വേണ്ടെന്നുവച്ചതായി റിപ്പോര്ട്ട്. അര്ജന്റീന താരങ്ങൾ വരുമ്പോഴുള്ള ഭാരിച്ച ചെലവ് താങ്ങാനാകാത്തതിനെ തുടര്ന്നാണ് തീരുമാനമെന്നാണ് പുറത്തുവരുന്ന റിപ്പോര്ട്ടുകള് വ്യക്തമാക്കുന്നത്.
രാജ്യാന്തര സൗഹൃദ മത്സരങ്ങളുടെ ഭാഗമായി അർജന്റീന ചൈനയിലും ഇന്തൊനീഷ്യയിലും കളിക്കാനെത്തിയിരുന്നു. ഏഷ്യയിൽ രണ്ട് സൗഹൃദ മത്സരങ്ങൾ കളിക്കാനായിരുന്നു അർജന്റീനയുടെ തീരുമാനം. ഇതിനായി ഇന്ത്യയേയും ബംഗ്ലാദേശിനെയുമാണ് അവര് തിരഞ്ഞെടുത്തത്. അര്ജന്റീന ഫുട്ബോള് അസോസിയേഷന്റെ ഇന്റര്നാഷണല് റിലേഷന്സ് തലവന് പാബ്ലോ ജാക്വിന് ഡിയാസ്, ഇക്കാര്യം അഖിലേന്ത്യാ ഫുട്ബോള് അസോസിയേഷനുമായി സംസാരിക്കുകയും ചെയ്തു. പക്ഷേ കളത്തിലിറങ്ങുന്നതിനായി അര്ജന്റീന ഫുട്ബോള് അസോസിയേഷന് ആവശ്യപ്പെട്ടത് വലിയ തുകയായിരുന്നു. ഇത് കണ്ടെത്താന് സാധിക്കാതെ വന്നതോടെ ഇന്ത്യ സൗഹൃദ മത്സരത്തില് നിന്ന് പിന്മാറുകയായിരുന്നു. 32 കോടിക്കും 40 കോടിക്കും ഇടയിലുള്ള ഒരു തുകയാണ് കളിക്കാന് അര്ജന്റീന ആവശ്യപ്പെട്ടതെന്ന് റിപ്പോര്ട്ടില് പറയുന്നു.
”അര്ജന്റീന ഫുട്ബോള് അസോസിയേഷന് ഒരു സൗഹൃദ മത്സരത്തിനായി ഞങ്ങളെ സമീപിച്ചിരുന്നു. പക്ഷേ ഇത്രയും വലിയ തുക കണ്ടെത്താന് സാധിക്കുമായിരുന്നില്ല. അത്തരമൊരു മത്സരം ഇവിടെ സംഘടിപ്പിക്കണമെങ്കില് ഞങ്ങള്ക്ക് ശക്തമായ ഒരു പങ്കാളിയുടെ പിന്തുണ ആവശ്യമാണ്. കളിക്കുന്നതിനായി അര്ജന്റീന ആവശ്യപ്പെട്ട തുക വളരെ വലുതാണ്. ഫുട്ബോളിലെ ഞങ്ങളുടെ സാമ്പത്തിക സ്ഥിതിയുടെ കാര്യത്തില് ഞങ്ങള്ക്ക് പരിമിതികളുണ്ട്.” — എഐഎഫ്എഫ് സെക്രട്ടറി ജനറൽ ഷാജി പ്രഭാകരൻ പ്രതികരിച്ചു.
English Summary: India turn down chance to host world champions Argentina
You may also like this video
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.