ഗാസ നഗരത്തിലെ കരയാക്രമണം കൂടുതല് വ്യാപിപ്പിക്കാനൊരുങ്ങി ഇസ്രയേല്. കൂടുതല് സെെനികരും ടാങ്കുകളും ഗാസ നഗരത്തിലേക്ക് പ്രവേശിച്ചതായി അല് ജസീറ റിപ്പോര്ട്ട് ചെയ്തു. കഴിഞ്ഞ കുറച്ച് ദിവസങ്ങളിലായി വ്യോമസേനയും പീരങ്കി യൂണിറ്റുകളും നഗരത്തിൽ 150 തവണ ആക്രമണം നടത്തിയതായി ഇസ്രായേൽ സൈന്യം അറിയിച്ചു. ആയിരക്കണക്കിന് പലസ്തീനികൾ അഭയം തേടുന്ന ടെന്റ് ക്യാമ്പുകൾ സ്ഥിതിചെയ്യുന്ന പ്രദേശങ്ങളിലെ ഉയർന്ന കെട്ടിടങ്ങളാണ് ആക്രമണത്തിൽ തകർന്നത്. സൈനികരെ നിരീക്ഷിക്കാൻ ഹമാസ് ഈ കെട്ടിടങ്ങള് ഉപയോഗിക്കുന്നുണ്ടെന്ന് ഇസ്രയേൽ അവകാശപ്പെടുന്നു.
ഇന്നലെ നടന്ന ആക്രമണത്തില് സ്ത്രീകളും കുട്ടികളും ഉൾപ്പെടെ 16 പേർ രാത്രിയിൽ കൊല്ലപ്പെട്ടതായി ആശുപത്രി അധികൃതർ അറിയിച്ചു. ഇതോടെ, ഇസ്രയേല് ആക്രമണത്തില് കൊല്ലപ്പെട്ട പലസ്തീനികളുടെ എണ്ണം 65,062 ആയി. 1,65,697 പേർക്ക് പരിക്കേറ്റതായും ഗാസ ആരോഗ്യ മന്ത്രാലയം അറിയിച്ചു. കരയാക്രമണം വ്യാപിപ്പിച്ചതോടെ ഗാസ നഗരത്തില് നിന്നുള്ള കൂട്ടപലായനം തുടരുകയാണ്. കൂടുതൽ ആളുകളെ ഒഴിപ്പിക്കാൻ അനുവദിക്കുന്നതിനായി ബുധനാഴ്ച മുതൽ രണ്ട് ദിവസത്തേക്ക് ഗാസ നഗരത്തിന് തെക്ക് മറ്റൊരു ഇടനാഴി ഇസ്രയേൽ തുറന്നിരുന്നു. എന്നാൽ വടക്കൻ പ്രദേശങ്ങളിലെ പലസ്തീനികൾ പുറം ലോകവുമായുള്ള ബന്ധം അറ്റ നിലയിലാണ്. ഇന്റർനെറ്റ്, ടെലിഫോൺ സേവനങ്ങൾ തടസപ്പെട്ടതായി അധിനിവേശ വെസ്റ്റ് ബാങ്ക് ആസ്ഥാനമായുള്ള പലസ്തീൻ ടെലികമ്മ്യൂണിക്കേഷൻസ് റെഗുലേറ്ററി അതോറിട്ടി പറഞ്ഞു.
ഒഴിപ്പിക്കൽ മുന്നറിയിപ്പുകൾ ആരംഭിക്കുന്നതിന് മുമ്പ് ഗാസ സിറ്റിയില് ഏകദേശം 10 ലക്ഷം പലസ്തീനികളാണ് താമസിച്ചിരുന്നത്. 3,50,000 ആളുകൾ നഗരം വിട്ടുപോയതായി ഇസ്രയേൽ സൈന്യം കണക്കാക്കുന്നു. കഴിഞ്ഞ ഒരു മാസത്തിനിടെ നഗരത്തിൽ താമസിക്കുന്ന 2,38,000ത്തിലധികം പലസ്തീനികൾ വടക്കൻ ഗാസയിൽ നിന്ന് പലായനം ചെയ്തതായി യുഎൻ കണക്കാക്കുന്നു. ലക്ഷക്കണക്കിന് പേർ ഇപ്പോഴും അവിടെ തുടരുന്നു.
ഗാസ സിറ്റിയിൽ ഇസ്രയേൽ നടത്തുന്ന ആക്രമണം തടയാൻ കൂടുതൽ ശക്തമായ നടപടികൾ സ്വീകരിക്കണമെന്ന് പ്രമുഖ സഹായ സംഘങ്ങളുടെ ഒരു കൂട്ടായ്മ അന്താരാഷ്ട്ര സമൂഹത്തോട് ആവശ്യപ്പെട്ടു. ഗാസയിൽ നമ്മൾ കാണുന്നത് അഭൂതപൂർവമായ ഒരു മാനുഷിക ദുരന്തം മാത്രമല്ല, വംശഹത്യയാണെന്നും സംഘടനകള് ചൂണ്ടിക്കാട്ടുന്നു. നോർവീജിയൻ അഭയാർത്ഥി കൗൺസിൽ, അനേര, സേവ് ദി ചിൽഡ്രൻ എന്നിവയുൾപ്പെടെ ഗാസയിൽ പ്രവർത്തിക്കുന്ന 20ലധികം സഹായ സംഘടനകളുടെ നേതാക്കൾ പ്രസ്താവനയില് ഒപ്പുവച്ചു. ഗാസയിൽ ഇസ്രയേൽ നടത്തിയ കരസേനാ ആക്രമണത്തെ ഖത്തര് ശക്തമായ ഭാഷയില് അപലപിച്ചു. പലസ്തീനികള്ക്കെതിരായ വംശഹത്യ വിപുലീകരിക്കുന്നതിന്റെ സൂചനയാണ് സെെനിക നടപടിയെന്ന് ഖത്തര് വിദേശകാര്യ മന്ത്രാലയം പറഞ്ഞു. നിലവിലെ പ്രവർത്തനം അവസാനിക്കുമ്പോഴേക്കും തീരപ്രദേശത്തെ വലിയൊരു ഭാഗം ഒഴികെ ഗാസാ മുനമ്പിന്റെ മുഴുവൻ നിയന്ത്രണവും ഇസ്രയേല് സെെന്യത്തിന്റെ കെെകളിലാകുമെന്നാണ് കരുതുന്നത്. ഗാസ നഗരത്തിൽ 2,000 മുതൽ 3,000 വരെ ഹമാസ് അംഗങ്ങള് അവശേഷിക്കുന്നുണ്ടെന്നാണ് സെെന്യം പറയുന്നത്. ഹമാസിന്റെ സൈനികശേഷി വളരെയധികം കുറഞ്ഞു. ഇപ്പോൾ അവർ പ്രധാനമായും ഗറില്ലാ ശൈലിയിലുള്ള ആക്രമണങ്ങൾ നടത്തുന്നു. ചെറിയ പോരാളികളുടെ സംഘങ്ങൾ സ്ഫോടകവസ്തുക്കൾ സ്ഥാപിക്കുകയോ സൈനിക ഔട്ട്പോസ്റ്റുകൾ ആക്രമിക്കുകയോ ചെയ്യുന്നുവെന്നും ഉദ്യോഗസ്ഥര് അവകാശപ്പെടുന്നു.
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.