കേരളത്തില് ആദ്യമായി തിരുവനന്തപുരം മെഡിക്കല് കോളജില് സ്കിന് ബാങ്ക് ഒരു മാസത്തിനകം ആരംഭിക്കുമെന്ന് ആരോഗ്യ മന്ത്രി വീണാ ജോര്ജ്. ഇതിനാവശ്യമായ സജ്ജീകരണങ്ങള് അന്തിമഘട്ടത്തിലാണ്. അവയവദാന പ്രക്രിയയിലൂടെ ത്വക്ക് ലഭ്യമാക്കാനായി കെ സോട്ടോയുടെ അനുമതി ആവശ്യമാണ്. കെ സോട്ടോയുടെ അനുമതി ഉടന് ലഭ്യമാക്കി, മറ്റ് നടപടിക്രമങ്ങള് പാലിച്ച് ഒരു മാസത്തിനകം കമ്മിഷന് ചെയ്യും. കോട്ടയം മെഡിക്കല് കോളജില് കൂടി സ്കിന് ബാങ്ക് സ്ഥാപിക്കാനുള്ള നടപടികള് പുരോഗമിക്കുകയാണ്. ഇത് സ്ഥാപിക്കാനുള്ള സ്റ്റാന്റേര്ഡ് ഗൈഡ്ലൈന് രൂപീകരിക്കാനും നിര്ദേശം നല്കിയിട്ടുണ്ട്. ബേണ്സ് യൂണിറ്റുകളെ ശക്തിപ്പെടുത്താനായി ചേര്ന്ന ഉന്നതതല യോഗത്തില് സംസാരിക്കുകയായിരുന്നു മന്ത്രി.
ശരീരത്തിലെ ഏറ്റവും വലിയ അവയവമായ ത്വക്ക് ശേഖരിച്ച് സൂക്ഷിച്ചുവച്ച് ആവശ്യമുള്ള രോഗികള്ക്ക് നൂതന സാങ്കേതിക വിദ്യയുടെ സഹായത്തോടെ വച്ചുപിടിപ്പിക്കുകയാണ് സ്കിന് ബാങ്കിലൂടെ ചെയ്യുന്നത്. അപകടങ്ങളാലും പൊള്ളലേറ്റും ത്വക്കിന് കേടുപാട് സംഭവിച്ചവര്ക്ക് പകരം വച്ചുപിടിപ്പിച്ചാല് അണുബാധയുണ്ടാകാതെ ജീവന് രക്ഷിക്കാനാകും. രോഗിയെ വൈരൂപ്യത്തില് നിന്നും രക്ഷിക്കാനുമാകും. മറ്റ് അവയവങ്ങള് പോലെ ത്വക്ക് ദാനം ചെയ്യാനുള്ള അവബോധം ശക്തമാക്കണം. കോഴിക്കോട് മെഡിക്കല് കോളജില് ബേണ്സ് യൂണിറ്റ് സജ്ജമാക്കാനുള്ള പ്രവര്ത്തനങ്ങള് പുരോഗമിക്കുന്നു. കൊല്ലം, ആലപ്പുഴ, കണ്ണൂര് മെഡിക്കല് കോളജുകളില് കൂടി ബേണ്സ് യൂണിറ്റുകള് ആരംഭിക്കുന്നതിനുള്ള പ്രൊപ്പോസല് സമര്പ്പിക്കാന് നിര്ദേശം നല്കി. ബേണ്സ് യൂണിറ്റുകള് സ്റ്റാന്റേഡൈസ് ചെയ്യാനുള്ള പ്രൊപ്പോസല് 15 ദിവസത്തിനകം വര്ക്കിങ് ഗ്രൂപ്പ് ചേര്ന്ന് സമര്പ്പിക്കണം.
ഏകീകൃത ചികിത്സാ പ്രോട്ടോകോള് രൂപീകരിക്കുമെന്നും മെഡിക്കല് വിദ്യാഭ്യാസ ഡയറക്ടറേറ്റില് കേന്ദ്രാവിഷ്കൃത പദ്ധതികള് ഏകോപിപ്പിക്കാനുള്ള സംവിധാനമൊരുക്കാനും മന്ത്രി നിര്ദേശം നല്കി. മെഡിക്കല് കോളജുകളിലെ ബേണ്സ് ഐസിയുവില് സജ്ജമാക്കിയ തീവ്ര പരിചരണ സംവിധാനത്തിലൂടെ അണുബാധയേല്ക്കുന്നത് പരമാവധി കുറയ്ക്കാനും എത്രയും വേഗം രോഗിക്ക് ആശ്വാസം ലഭിക്കാനും ജീവിതത്തിലേക്ക് മടക്കിക്കൊണ്ടു വരുവാനും സഹായിക്കുന്നു. 20 ശതമാനം മുതല് പൊള്ളലേറ്റ രോഗികള്ക്കുള്ള വിദഗ്ധ ചികിത്സയാണ് ബേണ്സ് ഐസിയുവിലൂടെ നല്കുന്നത്. ആരോഗ്യ വകുപ്പ് അഡീഷണല് ചീഫ് സെക്രട്ടറി, മെഡിക്കല് വിദ്യാഭ്യാസ വകുപ്പ് ഡയറക്ടര്, ജോ. ഡയറക്ടര്, വിവിധ മെഡിക്കല് കോളജുകളിലെ പ്രിന്സിപ്പല്മാര്, സൂപ്രണ്ടുമാര്, ബേണ്സ് യൂണിറ്റ് നോഡല് ഓഫിസര്മാര് എന്നിവര് യോഗത്തില് പങ്കെടുത്തു.
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.