വിരമിച്ചവർക്കുള്ള ആനുകൂല്യം വിതരണം ചെയ്യുന്നതിന് കെഎസ്ആർടിസി മുന്നോട്ട് വച്ച നിർദേശം ഹൈക്കോടതി അംഗീകരിച്ചു. ഒരു ലക്ഷം രൂപ 45 ദിവസത്തിനുള്ളിൽ നൽകാമെന്ന നിലപാടാണ് കോടതി അംഗീകരിച്ചത്. ബാക്കി തുക ഫണ്ട് കിട്ടുന്ന മുറയ്ക്ക് മുൻഗണന അനുസരിച്ചു നൽകുമെന്നും കെഎസ്ആര്‍ടിസി ഹൈക്കോടതിയെ അറിയിച്ചു. വിരമിച്ചവർക്ക് ആനുകൂല്യം നൽകാത്തത് മനുഷ്യാവകാശ ലംഘനമാണെന്ന് നിരീക്ഷിച്ച കോടതി, ഇടപെടാതിരിക്കാൻ ആകില്ല എന്ന് വ്യക്തമാക്കി. 3200 കോടി രൂപയുടെ വായ്പയുണ്ടെന്ന് കെഎസ്ആർടിസി അറിയിച്ചു. ഹർജിക്കാർക്ക് മാത്രം 50 ശതമാനം ആനുകൂല്യങ്ങൾ നൽകാൻ എട്ടു കോടി വേണ്ടിവരുമെന്നും അറിയിച്ചു. പത്തുമാസം കൊണ്ട് മുഴുവൻ പേർക്കുള്ള ആനുകൂല്യവും നൽകിക്കൂടേ എന്നായിരുന്നു കോടതിയുടെ ചോദ്യം. വിരമിച്ചവർക്കുള്ള ആനുകൂല്യ വിതരണത്തിനായി വരുമാനത്തിന്റെ 10 ശതമാനം മാറ്റിവയ്ക്കണമെന്നത് കോടതി ഉത്തരവാണ്.

ആരോട് ചോദിച്ചിട്ടാണ് അത് നിർത്തിയതെന്ന് കോടതി ചോദിച്ചു. ഏപ്രിൽ മുതൽ വീണ്ടും മാറ്റിവയ്ക്കാമെന്ന് കെഎസ്ആർടിസി അറിയിച്ചു. മാർച്ച് മുതൽ നിർബന്ധമായും ചെയ്യണമെന്ന് കോടതി നിർദേശിച്ചു. തുടർന്നാണ് ഒരു ലക്ഷം രൂപ വീതം 45 ദിവസത്തിനുള്ളിൽ നൽകാമെന്ന കെഎസ്ആർടിസിയുടെ മറുപടി കോടതി അംഗീകരിച്ചത്. മക്കളുടെ വിവാഹം, ആശുപത്രി ആവശ്യങ്ങൾ എന്നിവകൂടി പരിഗണിച്ച് ആനുകൂല്യങ്ങൾ വിതരണം ചെയ്യുന്നതിൽ മുൻഗണന നിശ്ചയിക്കണമെന്നും കോടതി നിർദേശിച്ചു.

മാനേജിങ് ഡയറക്ടർക്ക് പെൻഷൻ ആനുകൂല്യത്തിന് അർഹതയുള്ളവർ കത്ത് നൽകിയാൽ രണ്ടാഴ്ചക്കുളളിൽ തീരുമാനം എടുക്കണം. ഹർജികൾ പിന്നീട് പരിഗണിക്കാനായി മാറ്റി. ഏപ്രിലിൽ കെഎസ്ആർടിസി കോർപ്പസ് ഫണ്ട് പുനഃസ്ഥാപിക്കണമെന്നും ഹൈക്കോടതി പറഞ്ഞു. ഇതിൽ ഫണ്ട് വന്നാൽ എത്രയും വേഗം ബാക്കി യുള്ളവർക്ക് പണം നൽകണമെന്നും കോടതി നിർദേശിച്ചു. ഈ മാസം 28ന് മുമ്പ് പെൻഷൻ ആനുകൂല്യം വിതരണം ചെയ്യണമെന്ന ഉത്തരവ് ഭേദഗതി ചെയ്താണ് പുതിയ ഇടക്കാല ഉത്തരവ്. മാർച്ച് 31ന് ഹർജി വീണ്ടും പരിഗണിക്കും.

English Summary: ksrtc to give 1 lakh rupees each to retired employees balance amount in instalments
You may also like this video