ഒരുമഴമേഘം പെരിയവർഷമാ-
യിളയെ നാദതരംഗമാക്കുന്ന,
അതുലതീവ്രതപസുചെയ്യുമ്പോൾ
കുളിരണിഞ്ഞ പുൽക്കൊടിയിലും നറു-
കതിരണിഞ്ഞ നെൽവയലിലും
തളിരണിഞ്ഞ നൽക്കനവിലും മൃദു -
രാഗമൂർന്നയാൺകുയിലിലും
നിറഞ്ഞുനിൽക്കയാണഭൗമശാന്തിതൻ
താളബദ്ധമാം കനിവുകൾ
നറുങ്കിനാവിന്റെ മരുന്നുമായ്
നിലച്ചിടാത്ത ചുവടുമായ്
മഞ്ഞുപർവതനെറുകയിൽ
തപസുചെയ്യുന്ന ഗായകാ
കനലുകോരിയ വിരലിനാൽ
തബലതൻനിലമുഴുതുമ്പോൾ
മന്ത്രബന്ധുരനാദതാരകൾ
സ്വർണധാന്യമായ് ചിതറുന്നു
വിശുദ്ധിതൻഘനഗഗനഗോപുരം
നിനക്കുമുന്നിൽ നമിക്കുന്നു
ഏഴുസാഗരവീചികൾ തവ
നാദധാരശ്രവിക്കുന്നു
ഏതപൂർവമാം ജന്മവേദിയിൽ
നിന്നു നിൻ തബലപാടുമ്പോൾ
ഏതുസൂര്യന്റെ പ്രകാശത്തിലാ-
ണെന്റെ കണ്ണുകൾ തെളിഞ്ഞതു്
ഒരു മഴമേഘംപോലെ നീ പെയ്തു
ഗംഗയെ നിറച്ചുപോകിലും
കനിവിനാൽ നാദഗംഗയാറിനി
വരണ്ടുപോകില്ലൊരിക്കലും
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.