വഴികൾ
വ്യത്യസ്തമാവുമ്പോഴും
പരിചയമുള്ള
ഒരു നീർച്ചാൽ
ഇടയിലൂടെ തണുപ്പിച്ച്
കടന്നു പോവും
കാറ്റിന്റെ ദിശകൾ
അലോസരപ്പെടുത്തുമെങ്കിലും
പറക്കാൻ മടിക്കുന്ന
അപ്പൂപ്പൻതാടി
ഏത് വഴിയിലേക്കൊതുങ്ങണം
എന്നറിയാതെ
ഇലയില്ലാ കമ്പിൽ
തൂങ്ങിയ
നിറവർണ്ണപ്പട്ടത്തിന്റെ
കൂട്ടിനെത്തും
പറഞ്ഞ് പറഞ്ഞ്
പതം വന്ന വാക്കുകളാൽ
പ്രണയം കുറിച്ചപ്പോഴേയ്ക്കും
ഒരു കളിത്തിര
വന്നത് മായ്ച്ചുവോ?
കളിത്തിരയെന്ന് കാറ്റും
ജീവിതമെന്ന്
അപ്പൂപ്പൻതാടിയും
ഒടുവിൽ
നിന്റെ കൈകളിലെന്നും
സ്ഥിരതയില്ലാതെ
ഞാൻ പറക്കാം എന്ന
തീർപ്പിൻമേൽ
ഇപ്പോഴും
കാഴ്ചകളിലമർന്ന്
അവർ കഥ പറഞ്ഞു
കൊണ്ടേയിരിക്കുന്നു
എങ്കിലും
മണൽത്തരിയിലെ
സൗഹൃദക്കാഴ്ചകളിൽ
പാദങ്ങളുടെ
അകലം കുറയുന്നത്
ഓരോ
കാൽവയ്പും
ഭൂമിയിലമരുന്ന
വെള്ളാരം കല്ലുകളോട്
അറിയാതെ
പറയുന്നുണ്ട്
തിക്കിലും തിരക്കിലും
കണ്ണുകൾ
തിരയുമ്പോഴും
പരിചയമില്ലാത്ത
ഒരു ശീതക്കാറ്റിലെ
മേഘക്കറുപ്പിലും
തെളിഞ്ഞത്
എല്ലാം നിഷ്പ്രഭമാക്കുന്ന
മിന്നൊലൊളി;
ആ പ്രഭാപൂരം!
അതൊരു ആശ്വാസമാണ്
കെട്ടു കാഴ്ചകൾക്കതീതമായൊരു
കെടാവിളക്കിന്റെ
തെളിവെട്ടം പോലെ
ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.