രാജ്യത്തെ പ്രമുഖ ഇലക്ട്രിക് ഇരുചക്ര വാഹന നിർമ്മാതാക്കളായ ഒല ഇലക്ട്രിക് തങ്ങളുടെ ഔട്ട്ലെറ്റുകളുടെ എണ്ണം വൻതോതിൽ കുറയ്ക്കുന്നു. വിപണിയിൽ നേരിടുന്ന തിരിച്ചടികളും കുറഞ്ഞുവരുന്ന ഡിമാൻഡും കണക്കിലെടുത്ത് ഈ വർഷം മാർച്ച് അവസാനത്തോടെ സ്റ്റോറുകളുടെ എണ്ണം 550 ആയി പരിമിതപ്പെടുത്താനാണ് കമ്പനിയുടെ തീരുമാനം. കഴിഞ്ഞ വർഷം 4,000 ഔട്ട്ലെറ്റുകൾ എന്ന വലിയ ലക്ഷ്യം പ്രഖ്യാപിച്ച സ്ഥാനത്താണ് കമ്പനി ഇപ്പോൾ പിന്മാറ്റം നടത്തുന്നത്.
വിൽപനയിലെ വലിയ ഇടിവും വിപണി വിഹിതത്തിൽ സംഭവിച്ച കുറവുമാണ് കമ്പനിയെ ഈ കടുത്ത തീരുമാനത്തിലേക്ക് നയിച്ചത്. വാഹൻ പോർട്ടലിലെ കണക്കുകൾ പ്രകാരം, കഴിഞ്ഞ വർഷം 26 ശതമാനമുണ്ടായിരുന്ന ഒലയുടെ വിപണി വിഹിതം ജനുവരി മാസത്തിൽ വെറും 6.3 ശതമാനമായി കൂപ്പുകുത്തി. പ്രവർത്തന മാതൃകയിലും ചെലവുകളിലും മാറ്റം വരുത്തുന്നതിന്റെ ഭാഗമായി നിരവധി സ്റ്റോറുകൾ പൂട്ടിയതിനൊപ്പം ജീവനക്കാരെ പിരിച്ചുവിടുകയും ചെയ്തിട്ടുണ്ട്.
കമ്പനിയുടെ സാമ്പത്തിക നിലയും വലിയ വെല്ലുവിളിയാണ് നേരിടുന്നത്. 2025 ഡിസംബർ 31ന് അവസാനിച്ച പാദത്തിൽ 487 കോടി രൂപയുടെ നഷ്ടമാണ് ഒല രേഖപ്പെടുത്തിയത്. കഴിഞ്ഞ വർഷത്തെ അപേക്ഷിച്ച് വാഹന വിതരണത്തിൽ 61 ശതമാനത്തിന്റെ ഇടിവുണ്ടായി. ഈ കാലയളവിൽ 32,680 ഇലക്ട്രിക് ഇരുചക്ര വാഹനങ്ങൾ മാത്രമാണ് കമ്പനിക്ക് വിൽക്കാൻ സാധിച്ചത്. ഇലക്ട്രിക് വാഹന വിപണിയിൽ വലിയ ആധിപത്യം പുലർത്തിയിരുന്ന ഒലയ്ക്ക് മറ്റ് കമ്പനികളിൽ നിന്നുള്ള മത്സരം കടുത്തതും തിരിച്ചടിയായിട്ടുണ്ട്.
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.