ഓൺലൈൻ ഗെയിമിംഗ് നിയന്ത്രിക്കുന്ന പുതിയ നിയമത്തിന്റെ പരിധിയിൽ നിന്ന് പതിവായുള്ള മത്സരങ്ങളെയും ടൂർണമെന്റുകളെയും ഒഴിവാക്കിയേക്കുമെന്ന് സുപ്രീം കോടതി സൂചന നൽകി. ഇവ പന്തയം വെക്കൽ, ചൂതാട്ടം എന്നീ നിർവചനങ്ങളിൽ ഉൾപ്പെടുന്നില്ലെന്ന നിരീക്ഷണമാണ് ജസ്റ്റിസുമാരായ ജെ ബി പർദിവാല, കെ വി വിശ്വനാഥൻ എന്നിവരടങ്ങിയ ബെഞ്ച് നടത്തിയത്. പുതിയ ഓൺലൈൻ ഗെയിമിംഗ് നിയമത്തെ ചോദ്യം ചെയ്തുകൊണ്ടുള്ള ഒരു കൂട്ടം ഹർജികൾ പരിഗണിക്കുന്നതിനിടെയാണ് കോടതി ഈ അഭിപ്രായം അറിയിച്ചത്. ഓൺലൈൻ ചെസ് കളിക്കാരനായ ഒരു ഹർജിക്കാരന് വേണ്ടി ഹാജരായ അഭിഭാഷകനോട്, ടൂർണമെന്റുകൾക്ക് നിയമപ്രകാരം പ്രശ്നമുണ്ടാകാൻ സാധ്യതയില്ലെന്ന് കോടതി വ്യക്തമാക്കി.
നിയമപ്രകാരം ‘റിയൽ മണി ഗെയിമുകൾ’, അതുമായി ബന്ധപ്പെട്ട ബാങ്കിംഗ് സേവനങ്ങൾ, പരസ്യങ്ങൾ എന്നിവ നിരോധിച്ചിട്ടുണ്ട്. എന്നാൽ ഈ പുതിയ നിയമം തങ്ങളുടെ പ്രവർത്തനങ്ങളെ തടസ്സപ്പെടുത്തുന്നുവെന്നും ജീവനക്കാരെ പിരിച്ചുവിടാൻ കമ്പനികൾ നിർബന്ധിതരാകുന്നുവെന്നും ഓൺലൈൻ ഗെയിമിംഗ് പ്ലാറ്റ്ഫോമുകൾക്ക് വേണ്ടി ഹാജരായ അഭിഭാഷകൻ കോടതിയെ അറിയിച്ചു. ഓൺലൈൻ ഗെയിമുകൾ വ്യക്തികൾക്കും സമൂഹത്തിനും ഉണ്ടാക്കുന്ന ദോഷങ്ങൾ കണക്കിലെടുത്താണ് നിയമം കൊണ്ടുവന്നതെന്ന് കേന്ദ്ര സർക്കാർ കോടതിയെ അറിയിച്ചിട്ടുണ്ട്. കേസ് വിശദമായി പരിഗണിക്കുന്നതിനായി നവംബർ 26ന് കോടതി മാറ്റിവെച്ചു.
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.