രോഗികളുടെ ആരോഗ്യവും മരുന്നുകളുടെ സുരക്ഷയും ലംഘിക്കപ്പെടാൻ പാടില്ലാത്ത ‘ചുവപ്പ് രേഖ’യാണെന്ന് പ്രഖ്യാപിച്ചുകൊണ്ട് കുവൈറ്റ് ആരോഗ്യ മന്ത്രി ഡോ. അഹമ്മദ് അബ്ദുൽ വഹാബ് അൽ-അവദി ഫാർമസികളുടെ നിയമ ലംഘനങ്ങൾക്കെതിരെ ശക്തമായ നടപടികൾക്ക് ഉത്തരവിട്ടു. ഗുരുതരമായ നിയമലംഘനങ്ങൾ കണ്ടെത്തിയതിനെത്തുടർന്ന് മൂന്ന് സ്വകാര്യ ഫാർമസികളുടെ ലൈസൻസ് റദ്ദാക്കാനും, ഒരു ഫാർമസിയുടെ പ്രവർത്തനം ആറ് മാസത്തേക്ക് നിർത്തിവെക്കാനും തീരുമാനിച്ചു. കൂടാതെ, ഒരു ഫാർമസിക്കെതിരെയുള്ള കേസ് തുടർനടപടികൾക്കായി പബ്ലിക് പ്രോസിക്യൂഷന് കൈമാറുകയും ചെയ്തു.
ആരോഗ്യ മന്ത്രാലയത്തിന്റെ ലൈസൻസുള്ള ഫാർമസിസ്റ്റുകളുടെ അഭാവത്തിൽ പ്രവർത്തനം നടത്തുക, ഉറവിടം വ്യക്തമല്ലാത്തതും രജിസ്റ്റർ ചെയ്യാത്തതുമായ മരുന്നുകൾ വിപണനം ചെയ്യുക, ആരോഗ്യ മന്ത്രാലയത്തിന്റേതായതും വിൽക്കാൻ അനുമതിയില്ലാത്തതുമായ മരുന്നുകൾ കൈവശം വെക്കുക തുടങ്ങിയ ഗുരുതരമായ നിയമലംഘനങ്ങളാണ് പരിശോധനയിൽ കണ്ടെത്തിയത്. 2025‑ലെ 390-ാം നമ്പർ മന്ത്രിതല ഉത്തരവ് പ്രകാരം രൂപീകരിച്ച കമ്മിറ്റിയുടെ ശുപാർശകൾ അംഗീകരിച്ചുകൊണ്ടാണ് ഈ നടപടി. വാണിജ്യ മന്ത്രാലയവുമായും മറ്റ് ബന്ധപ്പെട്ട സർക്കാർ ഏജൻസികളുമായും ഏകോപിപ്പിച്ചുകൊണ്ട് ഫീൽഡ് ഇൻസ്പെക്ഷനുകൾ കർശനമായി തുടരുമെന്നും നിയമങ്ങൾ പൂർണ്ണമായി പാലിക്കുന്നുണ്ടെന്ന് ഉറപ്പുവരുത്തുമെന്നും മന്ത്രാലയം അറിയിച്ചു.
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.