പത്തനംതിട്ട
November 17, 2023 5:57 pm
മണ്ഡല പൂജയ്ക്കു തുടക്കം കുറിച്ച് വൃശ്ചിക പുലരിയില് ശബരിമലയില് അയ്യനെ കണ്ട് തൊഴാന് സന്നിധാനത്ത് ആയിരക്കണക്കിന് അയ്യപ്പഭക്തര് എത്തി. പുലര്ച്ചേ മൂന്നിന് ക്ഷേത്രനട ശബരിമല മേല്ശാന്തി പി എന് മഹേഷ് തുറന്നു, മാളികപ്പുറം ക്ഷേത്രനട മേല്ശാന്തി പി ജി മുരളി നമ്പൂതിരി തുറന്നു. ദര്ശനത്തിനായി തമിഴ്നാട്, കര്ണാടക സംസ്ഥാനങ്ങളില് നിന്നുള്ള അയ്യപ്പന്മാരാണ് വലിയ തോതില് എത്തിയത്.
പുലര്ച്ചെ മൂന്നു മണിക്കു നട തുറന്നപ്പോള് ദര്ശനത്തിനായി അയ്യപ്പഭക്തരുടെ വലിയ നിര വലിയ നടപ്പന്തലിലും സോപാനത്തും ഇടംപിടിച്ചിരുന്നു. സുഖദര്ശനത്തിനായി മികച്ച ക്രമീകരണമാണ് സംസ്ഥാന സര്ക്കാരിന്റെ നേതൃത്വത്തില് ദേവസ്വം ബോര്ഡും വിവിധ വകുപ്പുകളും സന്നദ്ധ സംഘടനകളും ചേര്ന്ന് ഏര്പ്പെടുത്തിയിട്ടുള്ളത്.
ദേവസ്വം മന്ത്രി കെ. രാധാകൃഷ്ണന്, എംഎല്എമാരായ അഡ്വ. പ്രമോദ് നാരായണ്, അഡ്വ. കെ.യു. ജനീഷ് കുമാര്, തിരുവിതാംകൂര് ദേവസ്വം ബോര്ഡ് പ്രസിഡന്റ് പി എസ് പ്രശാന്ത്, ദേവസ്വം സ്പെഷ്യല് സെക്രട്ടറി എം ജി രാജമാണിക്യം, തുടങ്ങിയവര് സന്നിഹിതരായിരുന്നു.
ദേവസ്വം ബോര്ഡിന്റെ അന്നദാന മണ്ഡപത്തില് ഭക്ഷണം സൗജന്യമായി നല്കുന്നതിന് ഏര്പ്പെടുത്തിയിട്ടുള്ള വിപുലമായ ക്രമീകരണം തീര്ഥാടകര്ക്ക് വലിയ അനുഗ്രഹമാണ്. തീര്ഥാടകര് എത്തുന്ന മുറയ്ക്ക് ഉപ്പുമാവും ഉരുളക്കിഴങ്ങുകറിയും ചെറു ചൂടുള്ള കുടിവെള്ളവും രാവിലെ ഇവിടെ വിതരണം ചെയ്തു.
നിലയ്ക്കല് ബേയ്സ് ക്യാമ്പില് വിരിവയ്ക്കുന്നതിനും വാഹന പാര്ക്കിംഗിനും ഉള്പ്പെടെ മികച്ച സൗകര്യങ്ങള് ഏര്പ്പെടുത്തിയതും തീര്ഥാടകര്ക്ക് ഏറെ ഗുണകരമായി മാറിയിട്ടുണ്ട്. തീര്ഥാടകര് എത്തുന്ന മുറയ്ക്ക് നിലയ്ക്കല് നിന്നു പമ്പയിലേക്കും തിരിച്ചും കെഎസ്ആര്ടിസി ആവശ്യത്തിന് സര്വീസ് നടത്തുന്നുണ്ട്.
English Summary: Pilgrimage season at Sabarimala
You may also like this video
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.