2023 ലെ പികെവി പുരസ്ക്കാരം സിപിഐ സംസ്ഥാന സെക്രട്ടറിയും മുൻ എംപിയുമായ ബിനോയ് വിശ്വത്തിന്. മഹാത്മാഗാന്ധി യൂണിവേഴ്സിറ്റിയുടെ മുൻ വൈസ് ചാൻസിലറും എഴുത്തുകാരനുമായ ഡോ. ബാബു സെബാസ്റ്റ്യൻ ചെയർമാനും മുതിർന്ന പത്രപ്രവർത്തകന്‍ വി ജയകുമാർ, പി എസ് സി അംഗം സി ബി സ്വാമിനാഥൻ എന്നിവർ അംഗങ്ങളുമായ ജൂറിയാണ് പൊതുജനങ്ങളിൽ നിന്നും ലഭിച്ച നാമനിർദ്ദേശങ്ങളിൽ നിന്നും പുരസ്കാരജേതാവിനെ തെരഞ്ഞെടുത്തത്.

പികെവിയുടെ രാഷ്ട്രീയ പ്രവർത്തനത്തേയും പൊതുജീവിതത്തെയും പിൻതുടരുന്ന കറപുരളാത്ത പൊതുപ്രവർത്തകനാണ് ബിനോയ് വിശ്വം എന്ന് ജൂറി വിലയിരുത്തി. 18ന് വൈകിട്ട് 4.30 ന് കിടങ്ങൂർ ഗവ. ബോയ്സ് എൽ പി സ്കൂൾ അങ്കണത്തിൽ പികെവി സെന്ററിന്റെ പ്രസിഡന്റ് ജി വിശ്വനാഥൻ നായരുടെ അദ്ധ്യക്ഷതയിൽ ചേരുന്ന സമ്മേളനത്തിൽ വെച്ച് സി പി ഐ (എം) സംസ്ഥാന സെക്രട്ടറി എം വി ഗോവിന്ദൻ പുരസ്കാരം സമർപ്പിക്കും. ജോസ് കെ മാണി എം പി, മുഖ്യപ്രഭാഷണവും തിരുവഞ്ചൂർ രാധാകൃഷ്ണൻ എംഎൽഎ അനുമോദനപ്രഭാഷണവും നടത്തും.

വിദ്യാർത്ഥികൾക്കുള്ള സ്കോളർഷിപ്പുകൾ മോൻസ് ജോസഫ് എംഎൽഎയും ചികിത്സാസഹായങ്ങൾ ജോസ്മോൻ മുണ്ടയ്ക്കലും വിതരണം ചെയ്യും. സിപിഐ സംസ്ഥാന എക്സിക്യൂട്ടീവ് അംഗം സി കെ ശശിധരൻ, ജില്ലാ സെക്രട്ടറി അഡ്വ. വി ബി ബിനു, സിപിഐഎം ജില്ലാ സെക്രട്ടറി എ വി റസൽ, സിപിഐ ജില്ലാ എക്സിക്യൂട്ടീവ് അംഗം ബാബു കെ ജോർജ്, മണ്ഡലം സെക്രട്ടറി പി കെ ഷാജകുമാർ എന്നിവർ അനുസ്മരണ പ്രഭാഷണങ്ങൾ നടത്തും. പി കെ വി സെന്ററിന്റെ സെക്രട്ടറി അഡ്വ. തോമസ് വി റ്റി സ്വാഗതം ആശംസിക്കും. സ്വാഗതസംഘം സെക്രട്ടറി സിറിയക് കാക്കനാട്ട് കൃതജ്ഞത രേഖപ്പെടുത്തും.

English Summary:PKV award to Binoy Viswam