രക്ത നക്ഷത്രം

കണ്ണിമ തുറക്കുമ്പോൾ ദൃശ്യമാകുമാരൂപം
കണ്ണിനുത്സവമേകുന്നൊരാരൂപം
പൂർണചന്ദ്രൻ തോൽക്കുന്ന പുഞ്ചിരി തൂകി
വർണമാർന്നിരിക്കുന്ന തേജോമയൻ

സഖാക്കൾക്കെല്ലാം സഖാവ് സ്വന്തം
സഖാവിനോ സഖാക്കളല്ലാതെ മറ്റാരുമില്ല
സഖാക്കൾക്കേറ്റക്കുറച്ചിൽ കൽപ്പിക്കാത്തവൻ
സഖാവറിയുന്നവരെ മറന്ന ചരിത്രമില്ല

ഇടതുപക്ഷത്തിന്റെ കാഹളമൂതിയവൻ
ഇടുതപക്ഷത്തിന്റെ കാവലാളായിരുന്നോൻ
ഇടതുപക്ഷ ഐക്യത്തിന്റെ ചുക്കാൻ പിടിച്ചവൻ
ഇടതുപക്ഷ സൈദ്ധാന്തികൻ കാനം

കൊടുങ്കാറ്റിലൊരുനാളുമുലയാത്ത തേരാളി
കൊടുംകനൽ വീഥികൾ താണ്ടി ജയിച്ചവൻ
കോർത്തുനിർത്തിയീ പാർട്ടിയെ ചങ്ങലപോൽ
കൊണ്ടുപോകുക നിങ്ങളീപാർട്ടിയെയതുപോൽ

ഉലയാത്ത തളരാത്ത മാർഗദർശി
ഉന്മൂലനാശത്തെയെന്നുമെതിർത്തവൻ
ഉജ്ജ്വലനിലപാടുകളിലുറച്ചു നിന്നവൻ
ഉശിരരാം സഖാക്കളേ മറക്കരുതീസഖാവിനെ

പാർട്ടിയെ നയിച്ചവൻ സ്നേഹിച്ചവൻ
പാർട്ടിതന്നെ ജീവിതവും ശരീരവും
പാർട്ടിയീമണ്ണിൽ തായ് വേരുറപ്പിച്ചവൻ
പാർട്ടി സഖാക്കളേ നമുക്കേകാം ലാൽസലാം സഖാവിന്

അന്ത്യമാരുമോർത്തില്ല സഖാവും നമ്മളും
അന്ത്യമായോതി ഞാനെത്തും സഖാക്കളേ സൗഖ്യമായ്
അന്ത്യമണഞ്ഞു വൈദ്യശാസ്ത്രം തോറ്റുപോയ്
അന്ത്യവിശ്രമത്തിനായ് സഖാവ് പോയ്‌മറഞ്ഞു

രക്തനക്ഷത്രമായ് മിന്നുന്നു നമ്മെ നോക്കി
രക്തപതാക കാക്കുന്നതും നോക്കിനിൽക്കുന്നു
രക്തനക്ഷത്രമാം സഖാവ് കാനത്തിന്
രക്തപുഷ്‌പങ്ങളാൽ ലാൽസലാമർപ്പിക്കുക

(ഇന്ന് കാനം രാജേന്ദ്രന്റെ ഒന്നാം ഓര്‍മ്മദിനം)