ശബരിമല മാസ്റ്റര് പ്ലാനിലൂടെ ഒരുങ്ങുന്നത് ആയിരത്തിലധികം കോടി രൂപയുടെ വികസനം. പമ്പ, പരമ്പരാഗത പാത, നിലയ്ക്കല് എന്നിവയുടെ സമഗ്ര വികസനമാണ് ശബരിമല മാസ്റ്റര്പ്ലാന് ലക്ഷ്യമിടുന്നതെന്ന് മുഖ്യമന്ത്രി പിണറായി വിജയന് പറഞ്ഞു. 2050 വരെയുള്ള വികസന സാധ്യതകള് മുന്നില്ക്കണ്ടു കൊണ്ടാണ് ശബരിമല മാസ്റ്റര് പ്ലാന് തയ്യാറാക്കിയിരിക്കുന്നത്. തീര്ത്ഥാടകരുടെ വര്ധനയ്ക്കനുസരിച്ച് സുഗമമായ യാത്രാസൗകര്യം, പാര്ക്കിങ്ങ്, ശുദ്ധജലലഭ്യത, സാനിറ്റേഷന് സംവിധാനങ്ങള്, വിശ്രമ കേന്ദ്രങ്ങള്, ചികിത്സാ സൗകര്യങ്ങള് ഒക്കെ വേണം. ഇവ പ്രകൃതിയുടെ മനോഹാരിതയ്ക്ക് കോട്ടം തട്ടാതെയും, പരിസ്ഥിതിക്ക് പോറലേല്പ്പിക്കാതെയും ആവണം. എരുമേലി അടക്കമുള്ള സമീപപ്രദേശങ്ങളും ഇതിന്റെ ഭാഗമായി വികസിപ്പിക്കണം.
സന്നിധാനം, പമ്പ, ട്രക്ക് റൂട്ട് എന്നിവയുടെ വികസനത്തിനായി ലേ ഔട്ട് പ്ലാനുകള് പ്രകാരം ആകെ ചെലവ് കണക്കാക്കിയിരിക്കുന്നത് 1,033.62 കോടി രൂപയാണ്. ശബരിമല മാസ്റ്റര്പ്ലാനില് ഉള്പ്പെടുത്തി 2025–2030 കാലയളവില് 314.96 കോടി രൂപയുടെ പദ്ധതികളാണ് തീര്ത്ഥാടകര്ക്കുള്ള സൗകര്യങ്ങള് വര്ധിപ്പിക്കുന്നതിനുവേണ്ടി ആവിഷ്കരിച്ചിട്ടുള്ളത്.ശബരിമല സന്നിധാനത്തിന്റെ ആത്മീയവും സാംസ്കാരികവുമായ പൈതൃകത്തെ മാനിച്ചുകൊണ്ടാണ് ലേ ഔട്ട് പ്ലാന് തയ്യാറാക്കിയിരിക്കുന്നത്. അതോടൊപ്പം സുരക്ഷയും സൗന്ദര്യാത്മക മെച്ചപ്പെടുത്തലുകളും ലേ ഔട്ട് പ്ലാന് ഉറപ്പാക്കുന്നുണ്ട്. കേരളത്തിന്റെ പരമ്പരാഗത വാസ്തുവിദ്യാ ശൈലിക്ക് അനുസൃതമായ മാര്ഗനിര്ദേശങ്ങളും സവിശേഷതകളും ലേ ഔട്ട് പ്ലാന് മുന്നോട്ടുവയ്ക്കുന്നതായും മുഖ്യമന്ത്രി പറഞ്ഞു.
ശബരിമല സന്നിധാനത്തിന്റെ വികസനത്തിനായി 2022–2027 വരെയുള്ള ആദ്യ ഘട്ടത്തിന് 600.47 കോടി രൂപയും, 2028–2033 വരെയുള്ള രണ്ടാം ഘട്ടത്തിന് 100.02 കോടി രൂപയും 2034–2039 വരെയുള്ള മൂന്നാം ഘട്ടത്തിന് 77.68 കോടി രൂപയും ഉള്പ്പെടെ, ആകെ 778.17 കോടി രൂപയാണ് ലേ ഔട്ട് പ്ലാന് പ്രകാരം ചെലവ് കണക്കാക്കിയിരിക്കുന്നത്. ശബരിമല തീര്ത്ഥാടനത്തിനുള്ള ഒരു ട്രാന്സിറ്റ് ക്യാമ്പായിട്ടാണ് പമ്പയെ ലേ ഔട്ട് പ്ലാനില് വിഭാവനം ചെയ്തിട്ടുള്ളത്. തീര്ത്ഥാടകര്ക്ക് സന്നിധാനത്തേക്ക് കയറുന്നതിനും സന്നിധാനത്തു നിന്നു തിരിച്ചിറങ്ങുന്നതിനും ഒരു പ്രത്യേക സര്ക്കുലേഷന് റൂട്ട് പിന്തുടരുന്നുവെന്ന് ഉറപ്പാക്കി അതുവഴി ഭാവിയില് ഉണ്ടായേക്കാവുന്ന തിരക്ക് ഒഴിവാക്കുവാനുതകുന്ന രീതിയാണ് അവലംബിച്ചിരിക്കുന്നത്. ലേ ഔട്ട് പ്ലാന് പ്രകാരം പമ്പയുടെ വികസനത്തിനായി 2022–2027 വരെയുള്ള ആദ്യ ഘട്ടത്തിന് 184.75 കോടി രൂപയും 2028–2033 വരെയുള്ള രണ്ടാം ഘട്ടത്തിന് 22.73 കോടി രൂപയും ഉള്പ്പെടെ ആകെ 207.48 കോടി രൂപയും, ട്രക്ക് റൂട്ടിന്റെ വികസനത്തിനായി 2022–2025 വരെയുള്ള ആദ്യ ഘട്ടത്തിന് 32.88 കോടി രൂപയും 2024–2026 വരെയുള്ള രണ്ടാം ഘട്ടത്തിന് 15.09 കോടി രൂപയും ഉള്പ്പെടെ ആകെ 47.97 കോടി രൂപയുമാണ് ഉള്ക്കൊള്ളിച്ചിരിക്കുന്നത്.
പമ്പ ഗണപതിക്ഷേത്രം മുതല് പമ്പ ഹില്ടോപ്പ് വരെ പമ്പാ നദിക്ക് കുറുകെ നിര്മ്മിക്കുന്ന സുരക്ഷാപാലം, നിലയ്ക്കല് ഇടത്താവളത്തിലെ കോര് ഏരിയയുടെ വികസനം. കുന്നാറില് നിന്നും ശബരിമല സന്നിധാനത്തേക്കുള്ള കുടിവെള്ള പൈപ്പ് ലൈന് സ്ഥാപിക്കല്, നിലയ്ക്കല് ഇടത്താവളത്തിലെ റോഡുകളുടെയും അനുബന്ധ പാലങ്ങളുടെയും നിര്മ്മാണം, ശബരിമല സന്നിധാനത്തെ തീര്ത്ഥാടന സൗകര്യ കേന്ദ്രം, തന്ത്രിമഠം, പ്രസാദ നിര്മ്മാണ‑വിതരണ സമുച്ചയം എന്നിവയുടെ നിര്മ്മാണം, ശബരിമല സന്നിധാനത്ത് അഗ്നിശമന സംവിധാനങ്ങള് ഏര്പ്പെടുത്തുന്ന പ്രവൃത്തി, കൂടാതെ ശബരിമല സന്നിധാനത്തെ തീര്ത്ഥാടക നിര്ഗമന പാലം, നിലയ്ക്കല് ഇടത്താവളത്തിലെ ജലസ്രോതസുകളുടെ സംരക്ഷണവും പരിപാലനവും എന്നിവയ്ക്കായി വിശദമായ പദ്ധതിരേഖ തയ്യാറാക്കുന്നതിനുള്ള നടപടികളും സ്വീകരിച്ചുവരികയാണെന്നും മുഖ്യമന്ത്രി അറിയിച്ചു.
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.