ലൈംഗികാരോപണവുമായി ബന്ധപ്പെട്ട് മുകേഷിനെതിരെ കേസെടുത്ത സാഹചര്യത്തില് ചലച്ചിത്ര കോണ്ക്ലേവിന്റെ നയരൂപീകരണ സമിതിയില്നിന്ന് നടനും എംഎൽഎയുമായ എം മുകേഷിനെ ഒഴിവാക്കി. പത്തംഗ സമിതിയില് മുകേഷിനെ ഉള്പ്പെടുത്തരുതെന്ന് ശക്തമായ ആവശ്യം ഉയര്ന്നതിനുപിന്നാലെയാണ് നീക്കം.
ഫെഫ്ക ജനറല് സെക്രട്ടറി ബി ഉണ്ണികൃഷ്ണനെ മാറ്റണമെന്ന് സംവിധായകന് വിനയന് ഉള്പ്പെടെ ആവശ്യപ്പെട്ടിരുന്നു. എന്നാല് ഇതു സര്ക്കാര് തള്ളി. മുകേഷ് എംഎല്എ സ്ഥാനം രാജിവയ്ക്കേണ്ടതില്ലെന്നും അതേസമയം സിനിമാ നയരൂപീകരണ സമിതിയില്നിന്ന് ഒഴിയണമെന്നാണ് നിലപാടെന്നും സിപിഎം സംസ്ഥാന സെക്രട്ടറി എം വി ഗോവിന്ദന് പറഞ്ഞിരുന്നു. തുടര്ന്ന് പാര്ട്ടിയുടെ നിര്ദേശപ്രകാരമാണ് ഇപ്പോള് മുകേഷിനെ ഒഴിവാക്കിയിരിക്കുന്നത്.
സിനിമാ മേഖലയിലെ പ്രശ്നങ്ങൾ ചർച്ച ചെയ്യാൻ നടത്തുന്ന കോൺക്ലേവിനു മുന്നോടിയായാണ് ഷാജി എൻ കരുൺ ചെയർമാനായി നയരൂപീകരണ സമിതി സർക്കാർ രൂപീകരിച്ചത്. മഞ്ജു വാര്യര്, സംവിധായകന് ബി.ഉണ്ണികൃഷ്ണന്, പത്മപ്രിയ, നിഖില വിമല്, രാജീവ് രവി, സന്തോഷ് കുരുവിള, സി അജോയ് എന്നിവരാണ് സമിതിയിലെ മറ്റ് അംഗങ്ങള്. അതേസമയം സംവിധായകന് ബി ഉണ്ണികൃഷ്ണന് സമിതിയില് തുടരും.
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.