ടി20 പരമ്പരയിലെ ആദ്യ അങ്കത്തില്‍ ബംഗ്ലാദേശിനെ തകര്‍ത്ത് ഇന്ത്യ. ഏഴ് വിക്കറ്റ് വിജയമാണ് സൂര്യകുമാറും സംഘവും സ്വന്തമാക്കിയത്. യുവ ബൗളിങ് നിരയുമായിറങ്ങിയ ഇന്ത്യ ബംഗ്ലാദേശിനെ 127 റണ്‍സിന് ഓള്‍ഔട്ടാക്കി. മൂന്നു വിക്കറ്റ് വീതം വീഴ്ത്തിയ വരുൺ ചക്രവർത്തി, അർഷ്ദീപ് സിങ് എന്നിവരുടെ നേതൃത്വത്തിലാണ് ഇന്ത്യൻ ബൗളർമാർ ബംഗ്ലദേശിനെ താരതമ്യേന ചെറിയ സ്കോറിൽ ഒതുക്കിയത്. അരങ്ങേറ്റക്കാരന്‍ മായങ്ക് യാദവ് ഒരു വിക്കറ്റ് നേടി. മറുപടി ബാറ്റിങ്ങില്‍ ഇന്ത്യ 11.5 ഓവറില്‍ മൂന്ന് വിക്കറ്റ് നഷ്ടത്തില്‍ വിജയലക്ഷ്യത്തിലെത്തി. ഇതോടെ മൂന്ന് മത്സര പരമ്പരയില്‍ 1–0ന് ഇന്ത്യ മുന്നിലെത്തി.

ഇന്ത്യക്കായി അഭിഷേക് ശര്‍മ്മയ്ക്കൊപ്പം സഞ്ജു സാംസണാണ് ഓപ്പണറായത്. തകര്‍ത്തടിച്ചു തുടങ്ങിയ അഭിഷേക് ഏഴ് പന്തില്‍ 16 റണ്‍സുമായി മടങ്ങി. പിന്നാലെയെത്തിയ സൂര്യകുമാര്‍ യാദവും വെടിക്കെട്ട് ബാറ്റിങ് പുറത്തെടുത്തു. 14 പന്തില്‍ 29 റണ്‍സ് നേടിയാണ് താരം മടങ്ങിയത്. സ്കോര്‍ 80ല്‍ നില്‍ക്കെ സഞ്ജു മെഹ്ദ ഹസന്‍ മിറാസിന്റെ പന്തില്‍ പുറത്തായി. 19 പന്തില്‍ ആറ് ഫോറുള്‍പ്പെടെ 29 റണ്‍സ് നേടിയാണ് സഞ്ജുവിന്റെ മടക്കം. പിന്നാലെയെത്തിയ നിതിഷ് റെഡ്ഡിയും ഹാര്‍ദിക് പാണ്ഡ്യയും ചേര്‍ന്ന് ഇന്ത്യയെ ലക്ഷ്യത്തിലെത്തിക്കുകയായിരുന്നു. ഹാര്‍ദിക് 16 പന്തില്‍ 39 റണ്‍സും നിതിഷ് 15 പന്തില്‍ 16 റണ്‍സുമായും പുറത്താകാതെ നിന്നു.

മോശം തുടക്കമായിരുന്നു ബംഗ്ലാദേശിന്റേത്. സ്കോര്‍ബോര്‍ഡില്‍ 14 റണ്‍സ് മാത്രമുള്ളപ്പോള്‍ ഓപ്പണര്‍മാരായ ലിറ്റണ്‍ ദാസ് (4), പര്‍വേസ് ഹുസൈന്‍ ഇമോന്‍ (8) എന്നിവരുടെ വിക്കറ്റുകള്‍ ബംഗ്ലാദേശിന് നഷ്ടമായി. പിന്നീട് നജ്മുല്‍ ഹുസൈന്‍ ഷാന്റോ (27) — തൗഹിദ് ഹൃദോയ് (12) സഖ്യം 26 റണ്‍സ് കൂട്ടിച്ചേര്‍ത്തു. എന്നാല്‍ ഹൃദോയിയെ പുറത്താക്കി വരുണ്‍ ഇന്ത്യക്ക് ബ്രേക്ക് ത്രൂ നല്‍കി. മഹ്മുദുള്ള (1), ജാക്കര്‍ അലി (8) എന്നിവര്‍ക്ക് തിളങ്ങാനായതുമില്ല.
അരങ്ങേറ്റ മത്സരത്തിലെ ആദ്യ ഓവർ മെയ്ഡനാക്കിയാണ് മയാങ്ക് യാദവ് ബൗളിങ്ങിന് തുടക്കമിട്ടത്. അജിത് അഗാർക്കർ, അർഷ്ദീപ് സിങ് എന്നിവർക്കു ശേഷം രാജ്യാന്തര ടി20യിൽ അരങ്ങേറ്റ മത്സരത്തിലെ ആദ്യ ഓവർ മെയ്ഡനാക്കുന്ന ആദ്യ ഇന്ത്യൻ താരമാണ് മയാങ്ക്.