ട്രെയിന് ഗതാഗതവുമായി ബന്ധപ്പെട്ട് കേരളം ഉന്നയിച്ച വിഷയങ്ങള് പരിഹരിക്കാന് അടിയന്തര നടപടികള് സ്വീകരിക്കുമെന്ന് റെയില്വേ ഉന്നത അധികൃതര് ഉറപ്പ് നല്കി. സംസ്ഥാനത്തെ റെയില്വേയുടെ ചുമതലയുള്ള മന്ത്രി വി അബ്ദുറഹിമാന്റെ അധ്യക്ഷതയില് ചേര്ന്ന ഉന്നതതല യോഗത്തിലാണ് ഇക്കാര്യം അറിയിച്ചത്.
സംസ്ഥാന സര്ക്കാരിന്റെ അഭ്യര്ത്ഥന പ്രകാരം പരശുറാം എക്സ്പ്രസിന് രണ്ട് കോച്ചുകള് കൂടിയും അനുവദിച്ചിട്ടുണ്ട്. തിരക്കുള്ള മറ്റു ട്രെയിനുകളിലും ആവശ്യമായ കൂടുതല് സൗകര്യങ്ങള് ഏര്പ്പെടുത്താന് നടപടി സ്വീകരിക്കുമെന്ന് ഡിവിഷണല് റെയില്വേ മാനേജര് ഡോ. മനീഷ് തപ്ല്യാല് പറഞ്ഞു. ഷൊര്ണൂര്-കണ്ണൂര് പാസഞ്ചര് കാസര്കോട് വരെ നീട്ടുന്ന കാര്യവും പരിഗണിക്കുമെന്ന് അദ്ദേഹം അറിയിച്ചു.
അവധിക്കാലങ്ങളില് അധിക സര്വീസ് ഏര്പ്പെടുത്തുന്നതിന് സഹായകമാകുന്ന തരത്തില് സംസ്ഥാന സര്ക്കാര് ഒരു കലണ്ടര് തയ്യാറാക്കി റെയില്വേയ്ക്ക് സമര്പ്പിക്കും. ഇതുപ്രകാരം സ്പെഷ്യല് സര്വീസുകള് നടത്താനും ഈ സര്വീസുകള് സംബന്ധിച്ച് മുന്കൂട്ടി അറിയിപ്പുകള് നല്കാനും ധാരണയായി. ട്രെയിനുകളിലെ സുരക്ഷാ സംവിധാനങ്ങള് മെച്ചപ്പെടുത്തുന്നതിന് സംസ്ഥാന സര്ക്കാരുമായി കൂടിയാലോചിച്ച് നടപടികള് സ്വീകരിക്കാമെന്ന് റെയില്വേയും അറിയിച്ചിട്ടുണ്ട്. വന്ദേഭാരതിനായി മറ്റു ട്രെയിനുകള് മണിക്കൂറുകള് പിടിച്ചിടുന്നത് ഒഴിവാക്കുന്ന കാര്യത്തില് പരിശോധിച്ച് നടപടിയെടുക്കും. മലപ്പുറം ജില്ലയിലെ ജനസംഖ്യയും ട്രെയിന് യാത്രികരുടെ എണ്ണവും പരിഗണിച്ച് രാജധാനി എക്സ്പ്രസിന് ജില്ലയില് സ്റ്റോപ്പ് അനുവദിക്കുന്ന കാര്യവും റെയില്വേ ബോര്ഡിന്റെ പരിഗണനയ്ക്ക് സമര്പ്പിക്കാന് തീരുമാനിച്ചു.
English Summary: Train transport: Railways will consider the issues raised by Kerala
You may also like this video
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.