യുഎസ് ഷട്ട്ഡൗൺ അവസാനിപ്പിക്കുന്നു: സർക്കാർ ഫണ്ടിങ് നീട്ടാൻ സെനറ്റിൽ ധാരണയായി; ജീവനക്കാരുടെ പിരിച്ചുവിടൽ മരവിപ്പിക്കും

ദിവസങ്ങളായി തുടർന്നുവന്ന രാഷ്ട്രീയ പ്രതിസന്ധിക്കും ഫെഡറൽ സർക്കാർ ഷട്ട്ഡൗണിനും അന്ത്യം കുറിച്ചുകൊണ്ട് യുഎസ് സെനറ്റിൽ ഇരുപാർട്ടികളുടെയും പിന്തുണയോടെ സർക്കാർ പ്രവർത്തനങ്ങൾക്കുള്ള ഫണ്ടിങ് നീട്ടാൻ ധാരണയായി. കഴിഞ്ഞ 40 ദിവസത്തോളമായി നീണ്ടുനിന്ന രാഷ്ട്രീയ തർക്കങ്ങൾക്കൊടുവിൽ, ഡെമോക്രാറ്റുകളും റിപ്പബ്ലിക്കൻമാരും ഒരുപോലെ പിന്തുണയ്ക്കുന്ന ഒരു ‘സ്റ്റോപ്-ഗാപ്പ് ഫണ്ടിങ് ബില്ലിൻ്റെ’ വിശദാംശങ്ങൾ സെനറ്റ് നേതാക്കൾ പുറത്തുവിട്ടു. ഈ ധാരണ പ്രകാരം, നിലവിൽ തടസ്സപ്പെട്ട സർക്കാർ പ്രവർത്തനങ്ങൾ അടുത്ത ജനുവരി അവസാനം വരെ സുഗമമായി മുന്നോട്ട് കൊണ്ടുപോകാൻ ആവശ്യമായ ഫണ്ട് ലഭ്യമാക്കും. ഈ ഇടക്കാല ബില്ലിനൊപ്പം, സൈനിക നിർമ്മാണം, വെറ്ററൻസ് കാര്യങ്ങൾ, കാർഷിക വകുപ്പ് തുടങ്ങിയ പ്രധാന ഏജൻസികൾക്ക് സെപ്റ്റംബർ 30, 2026 വരെ പൂർണ്ണ വർഷത്തേക്കുള്ള ഫണ്ടിങ് നൽകുന്ന മൂന്ന് സുപ്രധാന ധനവിനിയോഗ ബില്ലുകളും അവതരിപ്പിക്കാൻ നീക്കമുണ്ട്. 

ഷട്ട്ഡൗൺ കാരണം ശമ്പളം ലഭിക്കാതെ വിഷമിച്ചിരുന്ന ലക്ഷക്കണക്കിന് ഫെഡറൽ ജീവനക്കാർക്ക് ഈ കരാർ വലിയ ആശ്വാസമാകും. സർക്കാർ ജീവനക്കാരുടെ കൂട്ട പിരിച്ചുവിടൽ മരവിപ്പാക്കാനും ധാരണയായി. യാത്രാവിമാന സർവീസുകളിലുണ്ടായ തടസ്സങ്ങൾ, ഭക്ഷ്യസഹായ പദ്ധതികളിലെ അനിശ്ചിതത്വം തുടങ്ങിയ പൊതുജനങ്ങളെ ബാധിച്ച പ്രശ്നങ്ങൾക്കും ഉടൻ പരിഹാരമാകും. രാഷ്ട്രീയ അനിശ്ചിതത്വം മാറിയതോടെ യുഎസ് ഓഹരി വിപണിയിൽ പുതിയ പ്രതീക്ഷയുടെ ചലനങ്ങൾ ദൃശ്യമായിട്ടുണ്ട്. സെനറ്റിൽ ധാരണയായിട്ടുണ്ടെങ്കിലും, ഈ പാക്കേജ് നിയമമാകുന്നതിന് മുമ്പ് സെനറ്റിലും തുടർന്ന് ജനപ്രതിനിധി സഭയായ ഹൗസ് ഓഫ് റെപ്രസന്റേറ്റീവ്സിലും വോട്ടിംഗിലൂടെ കടന്നുപോകേണ്ടതുണ്ട്. എങ്കിലും, ഇരുപാർട്ടികളും ഒരുമിച്ചെടുത്ത ഈ തീരുമാനം ബിൽ വേഗത്തിൽ പാസാകാനുള്ള സാധ്യത വർധിപ്പിക്കുന്നു. രാഷ്ട്രീയപരമായ ചില തർക്കവിഷയങ്ങൾ ഈ പാക്കേജിൽ ഉൾപ്പെടുത്തിയിട്ടില്ലെങ്കിലും, അവ പിന്നീട് ചർച്ച ചെയ്യാമെന്ന ധാരണയിലെത്തിയത് പുരോഗമനപരമായ നീക്കമായി കണക്കാക്കപ്പെടുന്നു. ദീർഘനാളത്തെ പ്രതിസന്ധിക്ക് ശേഷമുള്ള ഈ ഉടമ്പടി, യുഎസ് രാഷ്ട്രീയത്തിൽ സഹകരണത്തിൻ്റെ ഒരു പുതിയ അധ്യായം തുറക്കുന്നതിനുള്ള സുപ്രധാന ചുവടുവയ്പ്പായി ചരിത്രത്തിൽ രേഖപ്പെടുത്തും.