മമ്മതും രഘുവും

മമ്മതും രഘുവും
ഒരേ ക്ലാസെ ഒറ്റബെഞ്ചിന്റെ
സന്തതികൾ
മമ്മതിന്റെ മീൻകൂട്ടാനും
രഘുവിന്റെ പുളിശേരിയും
ഉച്ചക്കഞ്ഞിയുടെ
വിരിഞ്ഞ പാത്രത്തിൽ
ഒന്നിച്ചു കിടന്നു
ഭരണഘടനയിലെ
മതേതരത്വത്തെ വാഴ്ത്തും
ബട്ടൺ പൊട്ടി ചുളിഞ്ഞ
യൂണിഫോം ഷർട്ടിന്റെ
കീശയിൽ നിന്നും
മീൻചുട്ട അടുപ്പിലെ
കനലിൽ വെന്ത പുളിങ്കുരു
ആഭിജാത്യമില്ലാതെ
പരസ്പരം ഉമിനീര് കൈമാറും
പെരുന്നാളും ഉത്സവവും
ഒന്നിച്ചുകൂടി
തോളിൽ കൈയിട്ടു നടക്കുമ്പോൾ
മതങ്ങൾ സമത്വസുന്ദര
രാഷ്ട്രത്തിന്റെ പ്രകടന പത്രിക പുറത്തിറക്കും
മമ്മതിന്റെ പള്ളിയിലെ
ബാങ്ക് വിളി കേൾക്കുമ്പോൾ
രഘുവിന്റെയമ്മ ഉമ്മറത്തു
തിരിവയ്ക്കാൻ ഓർക്കും
നിസ്കാരവും നാമജപവും
രണ്ടായി ചെയ്യുമ്പോഴും
ഒന്നിലേക്കാണൊഴുക്കെന്ന ബാലപാഠം
ഉമ്മയും അമ്മയും
ഒന്നെന്നെ സ്നേഹത്തിലൂടെ
തിരിച്ചറിയും
ഒരു മതിലിനിപ്പുറം
ചക്കയുടെ മുറിയും
മാങ്ങയുടെ പൂളും
പട്ടിണിയുടെ തായ് വേരറുത്തു
സോഷ്യലിസ്റ്റുകളാകും
കാലം പോകെ
മമ്മതും രഘുവും
തമ്മിൽ മിണ്ടാതെയാകും
പെരുന്നാളും ഉത്സവവും
തമ്മിലടികൂടി പിരിയും
ഉമ്മയും അമ്മയും
മാതൃസ്നേഹത്തിന്റെ
ഏറ്റക്കുറച്ചിലുകൾ പുലമ്പി
രണ്ടു ശത്രു രാജ്യങ്ങളാകും
മതം വിതറുന്ന കറുപ്പിൽ മയങ്ങി
ബഹുസ്വരത വറ്റിയ
പൊടിമണ്ണിനടിയിൽ
മമ്മതും രഘുവും വീണ്ടും
മതനിരപേക്ഷരാകും