വേട്ട

വട്ടമിട്ടു പറക്കുന്നു
ആകാശചരിവിൽ
ഇളകി തിടുക്കപ്പെട്ട്
ആഴത്തിലുയിർകൊണ്ട
മുള്ളാണി പോൽ കണ്ണുകൾ
നിലത്തേക്കൂഴ്ന്നു കടുത്ത്
സഞ്ചാര പാതയിലിരയെ
കണ്ണിമ ചൂഴ്ന്നു നോക്കി
വീടിൻ കൂടിനരികിൽ
കിണർ വട്ടത്തിൻ നിഴലിൽ
ചിക്കിച്ചികഞ്ഞു കോഴികൾ
മുറ്റത്തെ എച്ചിൽ പരതി
നഖങ്ങളിൽ കോർത്ത്
വിശപ്പിൻഭൂപടം വരഞ്ഞ്
പിന്നിൽ നടക്കുന്നു
പൂച്ച, കുഞ്ഞാട്, വളർത്തുനായ
കാവൽ, കരുതൽ, വാത്സല്യം
പകുത്ത വികാരനേരുകൾ
പതിയെ ഇരയെത്തേടി
പരുന്തു കണ്ണുകൾ
ജീവിത വട്ടത്തിൽ
നേർത്തില്ലാതായ ജൈവ രേഖകൾ
വിശപ്പു വെടിയുണ്ട തീർത്ത
യുദ്ധ ക്ഷോഭങ്ങളിൽ
ഇരയെ തളയ്ക്കുന്ന
ക്രൂരവേട്ടയുടെ
ചരിത്രാവർത്തനം
കെടുതിയിലിരവിന്റെ
പകലിന്റെ ആർത്തനാദം
പച്ചമാംസച്ചൂരിലുറങ്ങുന്ന
അസ്വസ്ഥജന്യ നേരങ്ങൾ
മാംസം കോർത്തെടുത്ത
ചോര പുരണ്ട പരുന്തു നഖങ്ങൾ
വേട്ടയ്ക്കൊരുങ്ങുന്നു
കാലദർപ്പണത്തിൽ
കൂർത്ത നഖങ്ങൾ ചേർത്തു വച്ച്