വിഴിഞ്ഞം അന്താരാഷ്ട്ര തുറമുറഖം കമ്മീഷന് ചെയ്തതോടെ സംസ്ഥാനത്തിന്റെ സ്വപ്നസാക്ഷാത്കാരത്തിന്റെ നിമിഷമെന്ന് മുഖ്യമന്ത്രി പിണറായി വിജയന്കേരളത്തിന്റെ സ്വപ്നസാഫല്യമാണിത്. നാടിന്റെ അഭിമാനമുഹൂര്ത്തമാണിത്. ഇതു കേവലം ഒരു തുറമുഖ കവാടം തുറക്കലല്ല; വികസന സാധ്യതകളിലേക്കുള്ള രാജ്യത്തിന്റെ മഹാകവാടം തുറക്കലാണ്. ഇന്ത്യയെ സാര്വദേശീയ മാരിടൈം വ്യാപാര ലോജിസ്റ്റിക്സ് ഭൂപട ശൃംഖലയില് കണ്ണിചേര്ക്കുന്ന മഹാസംരംഭമാണ് വിഴിഞ്ഞമെന്ന് മുഖ്യമന്ത്രി പറഞ്ഞു. രാജ്യത്തിന്റെ ചരിത്രത്തിന്റെ വിസ്മൃതിയില് നിന്ന് വിഴിഞ്ഞത്തെ വീണ്ടെടുത്ത് നവീകരിച്ചു വികസിപ്പിച്ചു സാര്വദേശീയ തുറമുഖമാക്കി മാറ്റിയത് കേരളത്തിലെ എൽഡി എഫ് സര്ക്കാരിന്റെ ഇച്ഛാശക്തിയാണ്; നിശ്ചയദാര്ഢ്യമാണ് മുഖ്യമന്ത്രി പറഞ്ഞു
വിഴിഞ്ഞത്തിന് ഒരുപാടു സവിശേഷതകളുണ്ട്. ആദ്യമായാണ് ഇന്ത്യയില് ഒരു സംസ്ഥാനത്തിന്റെ മുന്കൈയില് ഒരു ബൃഹത് തുറമുഖ നിര്മ്മാണം നടക്കുന്നത്. ചെലവിനറെ ഏറിയ ഭാഗവും കേരളമാണു വഹിക്കുന്നതെന്നും മുഖ്യമന്ത്രി ചൂണ്ടിക്കാട്ടി. 8,686 കോടിയില് 5,370.86 കോടി. ബാക്കി 2,497 കോടി അദാനി വിഴിഞ്ഞം പോര്ട് പ്രൈവറ്റ് ലിമിറ്റഡാണു മുടക്കുന്നത്. 818 കോടിയുടെ വയബിലിറ്റി ഗ്യാപ് ഫണ്ടാണു കേന്ദ്രം നൽകുന്നു. ഈ തുറമുഖത്തോടെ 220 ദശലക്ഷം ഡോളറിന്റെ പ്രതിവര്ഷ രാഷ്ട്ര നഷ്ടം നികന്നു തുടങ്ങുകയായി.75 ശതമാനം കണ്ടയിനര് ട്രാന്സ്ഷിപ്പ്മെന്റ് കാര്ഗോ വിദേശ തുറമുഖങ്ങളിലേക്കു തിരിച്ചു വിടുകയായിരുന്നു ഇക്കാലമത്രയും. ഇത് അവസാനിക്കുകയാണ്. രാഷ്ട്ര നഷ്ടം വലിയൊരളവില് പരിഹരിക്കാന് കേരളത്തിനു കഴിയുന്നു എന്നതു കേരളീയര്ക്കാകെ അഭിമാനകരമാണെന്നും അദ്ദേഹം പറഞ്ഞു.കരാര് പ്രകാരം 2045 ല് മാത്രമേ ഇതു പൂര്ത്തിയാവേണ്ടതുള്ളു. എന്നാൽ നമ്മള് അതിനു കാത്തുനിന്നില്ല. 2024 ല് തന്നെ കൊമേഴ്സ്യല് ഓപ്പറേഷനാരംഭിച്ചു. മദര്ഷിപ്പിനെ സ്വീകരിച്ചു. തുടര്ന്നിങ്ങോട്ട് 250 ലേറെ കപ്പലുകള് വിഴിഞ്ഞത്തു നങ്കൂരമിട്ടു. ഇപ്പോഴിതാ ഒന്നാം ഘട്ടം പതിറ്റാണ്ടു മുമ്പു പൂര്ത്തിയാക്കി കമ്മീഷന് ചെയ്യുന്നു. 2028 ല് ഇതിന്റെ എല്ലാ ഘട്ടങ്ങളും പൂര്ത്തിയാക്കുമെന്നും മുഖ്യമന്ത്രി ഉറപ്പു നൽകി.
ഒരുപാടു പ്രതികൂല ഘടകങ്ങളുണ്ടായതായും അദ്ദേഹം പറഞ്ഞു. മഹാപ്രളയം, ഇതര പ്രകൃതിക്ഷോഭങ്ങള്, കോവിഡ് അടക്കമുള്ള മഹാവ്യാധികള്, എന്നിവയൊക്കെ സമ്പദ് ഘടനയെ ഉലച്ചു. എന്നാല്, കേരളം അവിടെ തളര്ന്നുനിന്നില്ല. നിർമാണ കമ്പനിയും നല്ല രീതിയിൽ സഹകരിച്ച് മുന്നോട്ട് പോയതായി അദ്ദേഹം വ്യക്തമാക്കി.1996 ലെ ഇടതുപക്ഷ ജനാധിപത്യ മുന്നണി സര്ക്കാര് രൂപപ്പെടുത്തിയ പദ്ധതിയാണിവിടെ യാഥാര്ത്ഥ്യമാവുന്നത്. ഇടക്കാലത്ത് അനിശ്ചിതത്വത്തിലായ പദ്ധതി. പദ്ധതിപഠനത്തിനായി 2009 ല് ഇന്റര്നാഷണല് ഫിനാന്സ് കോര്പ്പറേഷനെ നിയോഗിച്ചു. 2010 ല് ടെന്ഡര് നടപടികളിലേക്കു കടന്നെങ്കിലും കേന്ദ്രം ആ ഘട്ടത്തിൽ അനുമതി നിഷേധിച്ചു. തുടര്ന്നുള്ള ഘട്ടം പദ്ധതിക്കായുള്ള മനുഷ്യച്ചങ്ങല അടക്കമുള്ള പ്രക്ഷോഭങ്ങളുടേതായിരുന്നു.2015 ല് ഒരു കരാറുണ്ടായി. എന്നാല്, പല തലങ്ങളിലുള്ള വിമര്ശനങ്ങള് അതു നേരിട്ടു. വിമര്ശനങ്ങളെല്ലാം നിലനില്ക്കുമ്പൊഴും വിഴിഞ്ഞം പദ്ധതി നടപ്പാവുക തന്നെ വേണം എന്ന നിലപാടാണ് ഞങ്ങള് കൈക്കൊണ്ടതെന്നും മുഖ്യമന്ത്രി അഭിപ്രായപ്പെട്ടു
വികസന കാര്യത്തില് രാഷ്ട്രീയ വേര്തിരിവു വേണ്ട എന്ന നയമാണു കൈക്കൊണ്ടത്. അതു പ്രകാരമാണ് 2016 ല് അധികാരത്തില് വന്നതിനെത്തുടര്ന്നുള്ള ഘട്ടത്തില് ബൃഹദ് തുറമുഖമായി വിഴിഞ്ഞം വളരുന്നതിനുള്ള നിലപാടുകള് എടുത്തത്. അതാണ് വിഴിഞ്ഞത്തെ ഇന്നത്തെ നിലയിൽ യാഥാര്ത്ഥ്യമാക്കി മാറ്റിയതെന്നും അദ്ദേഹം പറഞ്ഞു.സ്ഥാപിത താല്പര്യക്കാര് പടര്ത്താന് ശ്രമിച്ച തെറ്റിദ്ധാരണകളെ, ജനങ്ങളെ വിശ്വാസത്തിലെടുത്ത് അതിജീവിച്ചതായും മുഖ്യമന്ത്രി വ്യക്തമാക്കി. നിയമക്കുരുക്കുകളടക്കം നീക്കി. തീരദേശ പുനരധിവാസ – ജീവനോപാധി പ്രശ്നങ്ങള് 120 കോടി ചെലവാക്കി പരിഹരിച്ചു. അവിടുത്തെ പെണ്കുട്ടികളെ ക്രെയിന് പ്രവര്ത്തിപ്പിക്കുന്ന ജോലിയടക്കം ഏല്പ്പിച്ചു. തദ്ദേശീയ സ്ത്രീകള്ക്കായി സ്കില്ലിങ് സെന്റര് തുറന്നു. ഇങ്ങനെ പ്രശ്നങ്ങള് പരിഹരിച്ച് സങ്കടങ്ങള്ക്ക് അറുതിയുണ്ടാക്കിയാണു സര്ക്കാര് നീങ്ങിയതെന്നും അദ്ദേഹം പറഞ്ഞു.5,000 ത്തിലധികം തൊഴിലവസരങ്ങളാണ് ഈ തുറമുഖത്തിന്റെ ഭാഗമായി നേരിട്ടു ലഭ്യമാകുന്നത്. കൂടുതല് പേര്ക്ക് ഇത് പ്രയോജനകരമാകുന്നു എന്നുറപ്പുവരുത്തുകയാണ്. കേരളത്തിന്റെ, അതിനപ്പുറം ഇന്ത്യയുടെയാകെ വികസനത്തെ ഈ തുറമുഖം വലിയ തോതില് ഭദ്രമാക്കുമെന്ന കാര്യത്തില് സംശയമില്ലെന്നും പറഞ്ഞാണ് മുഖ്യമന്ത്രി പിണറായി വിജയൻ തന്റെ പ്രസംഗം അവസാനിപ്പിച്ചത്
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.