പുതുവത്സരാഘോഷങ്ങൾക്കായി നഗരത്തിലേക്കെത്തുന്ന ജനത്തിരക്ക് പരിഗണിച്ച് കൊച്ചി മെട്രോ, വാട്ടർ മെട്രോ, ഫീഡർ ബസ് സർവീസുകളിൽ വിപുലമായ ക്രമീകരണങ്ങൾ ഏർപ്പെടുത്തി. ഡിസംബർ 31ന് അർധരാത്രിക്ക് ശേഷവും യാത്രക്കാർക്ക് സർവീസുകൾ ലഭ്യമാകും. കൊച്ചി മെട്രോ ട്രെയിനുകൾ പുലർച്ചെ 1.30 വരെ 20 മിനിറ്റ് ഇടവേളകളിൽ സർവീസ് നടത്തും. ആലുവ, തൃപ്പൂണിത്തുറ സ്റ്റേഷനുകളിൽ നിന്നുള്ള അവസാന ട്രെയിനുകൾ പുലർച്ചെ 1.30ന് പുറപ്പെടും. തിരക്ക് കണക്കിലെടുത്ത് ഇടപ്പള്ളി സ്റ്റേഷനിൽ നിന്ന് രണ്ട് ഭാഗത്തേക്കുമുള്ള അവസാന സർവീസുകൾ പുലർച്ചെ രണ്ട് മണിക്ക് ലഭ്യമാകുമെന്നും അധികൃതർ അറിയിച്ചു.
വാട്ടർ മെട്രോ റൂട്ടുകളിലും മാറ്റങ്ങൾ വരുത്തിയിട്ടുണ്ട്. ഡിസംബർ 31ന് രാത്രി 7 മണിയോടെ പതിവ് സർവീസുകൾ അവസാനിക്കുമെങ്കിലും, ജനുവരി ഒന്നിന് പുലർച്ചെ 12 മുതൽ 4 മണി വരെ ഹൈക്കോർട്ട്-മട്ടാഞ്ചേരി, ഹൈക്കോർട്ട്-വൈപ്പിൻ റൂട്ടുകളിൽ പ്രത്യേക സർവീസുകൾ ഉണ്ടാകും. ആഘോഷങ്ങൾ കഴിഞ്ഞ് മടങ്ങുന്നവർക്കായി വൈപ്പിൻ‑ഹൈക്കോർട്ട് റൂട്ടിലും, ഹൈക്കോർട്ട്-എം.ജി റോഡ് സർക്കുലർ റൂട്ടിലും ഇലക്ട്രിക് ഫീഡർ ബസുകൾ പുലർച്ചെ 4 മണി വരെ ലഭ്യമാകും. മെട്രോ, റെയിൽവേ സ്റ്റേഷനുകളിലേക്ക് എത്തുന്ന യാത്രക്കാർക്ക് ഈ അധിക സർവീസുകൾ ഏറെ സഹായകമാകും.
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.