കളഞ്ഞുപോയ പുഞ്ചിരി
ഇന്നലെയെനിക്കു തിരികെ കിട്ടി
വലിഞ്ഞു മുറുകിയ ഞരമ്പുകൾക്കിടയിൽ
മുഖത്തിൽ തന്നെ
അതൊളിച്ചിരിക്കുകയായിരുന്നു
നിറമിഴികളിൽ തീവ്രനൊമ്പരങ്ങളുമായി
നിരാശയുടെ ശൂന്യമായ
മാറാപ്പിൽ,
വിധിവാക്യങ്ങളോർത്ത്
വിലപിച്ചിരിക്കുകയായിരുന്നു
പൊയ്മുഖങ്ങളണിഞ്ഞവർക്കിടയിൽ,
മായാത്ത പൊള്ളലുകളെ,
ഉരുൾപൊട്ടലുകളെ
ഭയന്നൊളിച്ചിരിക്കുകയായിരുന്നു
ചിതലരിച്ചുതുടങ്ങിയ
ഉന്മാദ ചിന്തകളുടെ
ഗോപുര മുകളിൽനിന്ന്
പഴിചാരലുകളുടെ
കുമ്പസാരക്കൂടുകളിലേയ്ക്ക്
നിപതിക്കുമ്പോൾ നെടുവീർപ്പുകളുമായി
വിലക്കപ്പെട്ട പറുദീസകളിൽനിന്നും
നിസ്സഹായതയോടെ ഓടിയൊളിക്കുകയായിരുന്നു
താളംതെറ്റിയ ചിന്തകളിൽ
വരദാനമായി കിട്ടിയ നന്മകളത്രയും
ഹൃത്തിൽ നിറച്ചപ്പോൾ,
അശാന്തി പടർത്തുന്ന
ഓർമ്മകളിൽനിന്നും
സമാധാനത്തിന്റെ പുതിയ നിയമങ്ങളുമായി
ഹൃദയത്തിൽ പൂത്തുലയുന്ന
സ്നേഹോദ്യാനത്തിന്റെ കവാടത്തിനരികെ,
കളഞ്ഞുപോയ പുഞ്ചിരിയി-
ന്നലെ തിരികെയെനിക്കു കിട്ടി.
ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.