രാജ്യത്ത് കോവിഡ് വ്യാപനം ശമിക്കുന്നതായി വിദഗ്ധര്‍. കഴിഞ്ഞ 24 മണിക്കൂറിനിടെ 58,077 പേര്‍ക്കാണ് രാജ്യത്ത് രോഗം സ്ഥിരീകരിച്ചത്. ഒട്ടുമിക്ക സംസ്ഥാനങ്ങളിലും രോഗവ്യാപനം കുറഞ്ഞിട്ടുണ്ട്. ഇതോടെ നിയന്ത്രണങ്ങളില്‍ കൂടുതല്‍ ഇളവുകളും നല്‍കിത്തുടങ്ങി.
ഒരു മാസത്തിനിടയിലെ ഏറ്റവും കുറഞ്ഞ രോഗവ്യാപനമാണ് ഇന്ന് രേഖപ്പെടുത്തിയത്. 10 ശതമാനത്തിന് മുകളിലെത്തിയ ടിപിആര്‍ നാലായി കുറഞ്ഞു. വിവിധ സംസ്ഥാനങ്ങളിലായി 6.97 ലക്ഷം പേരാണ് ചികിത്സയില്‍ കഴിയുന്നത്. 1.50 ലക്ഷം പേര്‍ പുതുതായി രോഗമുക്തി നേടി. 657 മരണം കോവിഡ് മൂലം ഇന്ന് രാജ്യത്ത് സംഭവിച്ചു. കഴിഞ്ഞ ദിവസം പ്രതിദിന മരണം ആയിരത്തിന് മുകളിലായിരുന്നു. ഇതോടെ മഹാമാരിയില്‍ ജീവന്‍ നഷ്ടമായവര്‍ 5,07,177 ആയി.
രോഗവ്യാപനം ഏറ്റവും രൂക്ഷമായി തുടര്‍ന്ന കേരളത്തിലും മഹാരാഷ്ട്രയിലും രോഗശമനമുണ്ട്. നിലവില്‍ ഏറ്റവും അധിക സജീവ കേസുകള്‍ കേരളത്തിലാണ്. 2.33 ലക്ഷം. രോഗികളുടെ എണ്ണം ഉയര്‍ന്ന് നിന്നിരുന്ന കര്‍ണാടക, മഹാരാഷ്ട്ര, തമിഴ്നാട് എന്നിവിടങ്ങളില്‍ ചികിത്സയില്‍ കഴിയുന്നവര്‍ ഒരു ലക്ഷത്തില്‍ താഴെയെത്തി. ഇതുവരെ 171.79 കോടി ഡോസ് വാക്സിനാണ് രാജ്യത്ത് നല്‍കിയിട്ടുള്ളത്.
രോഗവ്യാപനത്തിന്റെ അളവായ ആര്‍ വാല്യുവില്‍ കഴിഞ്ഞദിവസങ്ങളിലായി കുറവ് രേഖപ്പെടുത്തിയിട്ടുണ്ട്. അതേസമയം വിവിധ സംസ്ഥാനങ്ങളിലായി കോവിഡ് ബാധിതരാകുന്നവരിൽ 97 ശതമാനം പേർക്കും പിടിപെടുന്നത് ഒമിക്രോൺ വകഭേദമാണ്. ചെറിയൊരു ശതമാനം പേരിൽ ഡെൽറ്റ വകഭേദവും പിടിപെടുന്നു.
കഴിഞ്ഞ ആഴ്ചയിൽ ലോകത്താകമാനം രോഗബാധിതരുടെ എണ്ണത്തിൽ 17 ശതമാനം കുറവുണ്ടായതായി ലോകാരോഗ്യ സംഘടനയും വ്യക്തമാക്കി. അമേരിക്കയിൽ മാത്രം പുതിയ കോവിഡ് ബാധിതരുടെ എണ്ണത്തിൽ അമ്പത് ശതമാനമാണ് കുറവുണ്ടായത്. അന്താരാഷ്ട്ര തലത്തിൽ കോവിഡ് മരണങ്ങളിൽ ഏഴു ശതമാനത്തിന്റെ കുറവുണ്ടായതായും പ്രതിവാര അവലോകനത്തില്‍ ലോകാരോഗ്യ സംഘടന വ്യക്തമാക്കി.
English Summary: Covid third wave: Health experts say the spread of the disease is declining
You may like this video also
ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.