മുൻനിര കമ്പനികളിലെ പ്രായോഗിക അനുഭവത്തിലൂടെ യുവാക്കളെ ജോലിക്ക് തയ്യാറാക്കുന്നതിനുള്ള നരേന്ദ്ര മോഡി സർക്കാരിന്റെ പദ്ധതികളിലൊന്നായ പ്രധാനമന്ത്രി ഇന്റേൺഷിപ്പ് പദ്ധതിക്ക് യുവാക്കള്ക്കിടയില് തണുത്ത പ്രതികരണം. പദ്ധതിയുടെ പൈലറ്റ് ഘട്ടത്തിലെ ആദ്യ രണ്ട് റൗണ്ടുകളിൽ ഉദ്യോഗാര്ത്ഥികളിൽ നിന്നുള്ള തണുത്ത പ്രതികരണം കാരണം പദ്ധതിയില് മാറ്റം ആലോചിക്കുകയാണെന്ന് സർക്കാർ വൃത്തങ്ങൾ പറഞ്ഞു. പദ്ധതി ആരംഭിച്ച് ഒരു വർഷത്തിന് ശേഷമാണ് ഈ നീക്കം. ഈ വർഷം അവസാനം ഇന്റേൺഷിപ്പ് പദ്ധതി പൂർണ തോതിൽ ആരംഭിക്കുന്നതോടെ, ഇന്റേൺഷിപ്പ് കാലയളവില് വ്യത്യാസവും ഇന്റേണുകൾക്കുള്ള സ്റ്റൈപ്പന്റ് വർധനവും ഉൾപ്പെടുത്തുമെന്ന് സര്ക്കാര് വൃത്തങ്ങള് പറഞ്ഞു. ആവശ്യമായ മാറ്റങ്ങൾ നിലവിൽ വന്നുകഴിഞ്ഞാൽ, അന്തിമ നയരേഖ മന്ത്രിസഭയ്ക്ക് അയയ്ക്കും. കഴിഞ്ഞ വർഷം ഒക്ടോബറിൽ ആരംഭിച്ച പദ്ധതി പൈലറ്റ് ഘട്ടത്തിൽ ഇന്റേൺഷിപ്പുകളുടെ കാലാവധി 12 മാസമായി നിശ്ചയിച്ചു. ഒറ്റത്തവണ കേന്ദ്ര ഗ്രാന്റായി 6,000 രൂപയും സർക്കാരിൽ നിന്ന് 4,500 രൂപയും അതത് കമ്പനികളിൽ നിന്ന് 500 രൂപയും ഉൾപ്പെടെ 5,000 രൂപ പ്രതിമാസ സ്റ്റൈപ്പന്റും ലഭിക്കും. പ്രധാനമായും കമ്പനികളുടെ സിഎസ്ആർ ഫണ്ടുകളിൽ നിന്ന് തുക വകയിരുത്തും. 21നും 24നും ഇടയിൽ പ്രായമുള്ള ഇന്ത്യക്കാർക്ക് വ്യവസായങ്ങളിലോ യഥാർത്ഥ കോർപറേറ്റ് പരിതസ്ഥിതികളിലോ അനുഭവം നേടുന്നതിന് പിഎംഐഎസ് പോർട്ടൽ അല്ലെങ്കിൽ മൊബൈൽ ആപ്ലിക്കേഷൻ വഴി ഓൺലൈനായി അപേക്ഷിക്കാം. പക്ഷേ പദ്ധതിയില് 280 കമ്പനികൾ മാത്രമാണ് വിദ്യാർത്ഥികൾക്ക് 82,000 ഇന്റേൺഷിപ്പുകൾ വാഗ്ദാനം ചെയ്തത്. 28,000 പേര് മാത്രമാണ് അവസരങ്ങൾ സ്വീകരിച്ചത്. 8,725 പേര് മാത്രമാണ് ഇന്റേൺഷിപ്പിനായി ചേർന്നത്. പൈലറ്റ് ഘട്ടത്തിൽ ഉദ്യോഗാര്ത്ഥികളിൽ നിന്നും വ്യവസായ പങ്കാളികളിൽ നിന്നും ലഭിച്ച ഫീഡ്ബാക്കിന്റെ അടിസ്ഥാനത്തിൽ, സ്റ്റൈപ്പെന്റിന്റെയും ഇന്റേൺഷിപ്പ് കാലാവധിയുടെയും കാര്യത്തിൽ പ്രധാന മാറ്റങ്ങൾ വരുത്തുമെന്ന് സർക്കാർ ഉദ്യോഗസ്ഥര് പറഞ്ഞു. 2025 ജനുവരിയിൽ ആരംഭിച്ച പൈലറ്റിന്റെ രണ്ടാം റൗണ്ടിലും മങ്ങിയ പ്രതികരണമാണ് ഉണ്ടായത്. 2025 ഓഗസ്റ്റിൽ പാർലമെന്റിൽ സർക്കാർ നൽകിയ ഏറ്റവും പുതിയ ഡാറ്റ പ്രകാരം, 327 കമ്പനികൾ ഇതുവരെ ഏകദേശം 82,000 ഓഫറുകൾ നൽകിയിട്ടുണ്ട്. ഇതുവരെ 24,000 ഉദ്യോഗാര്ത്ഥികൾ മാത്രമേ ഓഫറുകൾ സ്വീകരിച്ചിട്ടുള്ളൂ. ഡാറ്റാ എൻട്രി, ഫയലിങ് തുടങ്ങി കമ്പനികൾ ഇന്റേണുകൾക്ക് നൽകുന്ന ജോലികൾക്കൊപ്പം, കുറഞ്ഞ നിലവാരമുള്ള ജോലിയും ഉയർന്ന നിരക്കിലുള്ള കൊഴിഞ്ഞുപോക്കിന് കാരണമാകുന്നു. എല്ലാ കമ്പനികളിലെയും എല്ലാ ഇന്റേണുകൾക്കും സ്കീമിന് കീഴിലുള്ള ജോലിയുടെ ഗുണനിലവാരം ഉയർന്ന നിലയിൽ നിലനിർത്തുന്നതിനുള്ള സംവിധാനം അന്തിമ നയ ഡ്രാഫ്റ്റിൽ ഉണ്ടെന്ന് അധികൃതര് കൂട്ടിച്ചേർത്തു.
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.