മെഡിറ്ററേനിയൻ കടലിലെ ഗ്രേറ്റ് വൈറ്റ് ഷാർക്കുകൾ വംശനാശത്തിന്റെ വക്കിലെന്ന് ഗവേഷകർ. യുഎസ് ശാസ്ത്രജ്ഞരും യുകെയിലെ ബ്ലൂ മറൈൻ ഫൗണ്ടേഷനും ചേർന്ന് നടത്തിയ പഠനത്തിലാണ് അന്താരാഷ്ട്ര നിയമപ്രകാരം സംരക്ഷിക്കപ്പെട്ട ഈ സ്രാവുകൾ ഉത്തരാഫ്രിക്കൻ മത്സ്യവിപണികളിൽ നിയമവിരുദ്ധമായി വിൽക്കപ്പെടുന്നതായി കണ്ടെത്തിയത്. മെഡിറ്ററേനിയൻ മേഖലയില് 20ലധികം സ്രാവുകളെ വേട്ടയാടുന്നതും വിൽക്കുന്നതും അന്താരാഷ്ട്ര നിയമപ്രകാരം കുറ്റകരമാണ്. എന്നാൽ 2025ൽ മാത്രം ഉത്തരാഫ്രിക്കൻ തീരങ്ങളിൽ 40ലധികം ഗ്രേറ്റ് വൈറ്റ് ഷാർക്കുകൾ കൊല്ലപ്പെട്ടതായി ഗവേഷകർ കണ്ടെത്തി. അൾജീരിയയിലെയും ടുണീഷ്യയിലെയും തുറമുഖങ്ങളിൽ ഇത്തരം സ്രാവുകളെ ചത്ത നിലയിൽ എത്തിക്കുന്നതിന്റെ ദൃശ്യങ്ങൾ ബിബിസിയും പുറത്തുവിട്ടു. സംരക്ഷിത വിഭാഗത്തിൽപ്പെട്ട ഷോർട്ട് ഫിൻഡ് മാക്കോ സ്രാവുകളെയും വിൽപനയ്ക്കായി തയ്യാറാക്കുന്ന ദൃശ്യങ്ങൾ സാമൂഹിക മാധ്യമങ്ങളിലൂടെ പ്രചരിക്കുന്നുണ്ട്.
വ്യവസായ അടിസ്ഥാനത്തിലുള്ള അമിതമായ മത്സ്യബന്ധനമാണ് സ്രാവുകളുടെ എണ്ണം കുറയാൻ കാരണമെന്ന് വിർജീനിയ ടെക് സർവകലാശാലയിലെ ഗവേഷകനായ ഡോ. ഫ്രാൻസെസ്കോ ഫെറെറ്റി പറഞ്ഞു. മെഡിറ്ററേനിയൻ സ്രാവുകളുടെ അവസാന താവളമെന്ന് കരുതപ്പെടുന്ന സിസിലി കടലിടുക്കിൽ രണ്ടാഴ്ചയോളം തിരച്ചിൽ നടത്തിയിട്ടും ഒരു സ്രാവിനെ പോലും കണ്ടെത്താൻ ഗവേഷകർക്ക് കഴിഞ്ഞില്ല. ഇത് സമുദ്ര ആവാസവ്യവസ്ഥ നേരിടുന്ന തകർച്ചയുടെ ആഴം വ്യക്തമാക്കുന്നു. മെഡിറ്ററേനിയൻ രാജ്യങ്ങൾ സ്രാവുകളെ സംരക്ഷിക്കാൻ ഉടമ്പടിയിൽ ഒപ്പിട്ടിട്ടുണ്ടെങ്കിലും പല രാജ്യങ്ങളിലും ഇത് കർശനമായി നടപ്പിലാക്കുന്നില്ല. ദരിദ്രമായ ഉത്തരാഫ്രിക്കൻ തീരങ്ങളിലെ മത്സ്യത്തൊഴിലാളികൾ കുടുംബത്തിന്റെ പട്ടിണി മാറ്റാനായി ഇത്തരം സ്രാവുകളെ വിൽക്കാൻ നിർബന്ധിതരാകുന്നുണ്ട്. മത്സ്യത്തൊഴിലാളികൾക്ക് സുസ്ഥിരമായ രീതിയിലുള്ള തൊഴിൽ പരിശീലനം നൽകിയാൽ മാത്രമേ സ്രാവുകളെ സംരക്ഷിക്കാനാകൂവെന്ന് ലിബിയൻ മറൈൻ ബയോളജി സൊസൈറ്റിയിലെ സാറ അൽമബ്രൂക്ക് പറഞ്ഞു. അടിയന്തര നടപടികൾ സ്വീകരിച്ചില്ലെങ്കിൽ ഗ്രേറ്റ് വൈറ്റ് ഷാർക്കുകൾ ഭൂമുഖത്തുനിന്ന് തന്നെ അപ്രത്യക്ഷമായേക്കാമെന്ന് ശാസ്ത്രജ്ഞർ മുന്നറിയിപ്പ് നൽകുന്നു.
—
**കൂടുതൽ തലക്കെട്ടുകൾ:**
* മെഡിറ്ററേനിയൻ കടലിലെ സ്രാവുകൾ വംശനാശത്തിലേക്ക്; ഉത്തരാഫ്രിക്കൻ വിപണികളിൽ നിയമവിരുദ്ധ വിൽപന സജീവം.
* വേട്ടയാടുന്നത് 2025‑ൽ മാത്രം 40 മഹാ സ്രാവുകളെ; മെഡിറ്ററേനിയൻ സമുദ്രം നേരിടുന്നത് വലിയ പ്രതിസന്ധി.
* സംരക്ഷിത സ്രാവുകളുടെ കൊന്നൊടുക്കലിനെതിരെ ശാസ്ത്രജ്ഞർ.
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.