സംസ്ഥാന സ്കൂൾ കലോൽസത്തിൽ സ്വന്തം സ്കൂൾ മികച്ച നേട്ടം കൊയ്തതിന്റെ ആഹ്ലാദത്തിൽ വിദ്യാർത്ഥികൾ ആഘോഷിച്ചപ്പോൾ ആരുമറിയാതെ പകർത്തിയ ഗോപികയുടെ നൃത്ത വീഡിയോ സോഷ്യൽ മീഡിയയിൽ വൈറലാവുകയാണ്. പാലക്കാടിനെയും തിരുവനന്തപുരത്തെയും പിന്നിലാക്കി95 പോയിന്റോടെ സംസ്ഥാന സ്കൂൾ കലോൽസവത്തിൽ ഓവറോൾ ചാമ്പ്യൻമാരായി ആലപ്പുഴയുടെ അഭിമാനമായി മാറിയ മാന്നാർ നായർ സമാജം ഹയർ സെക്കന്ഡറി സ്കൂൾ പ്ലസ് ടു സയൻസ് വിദ്യാർത്ഥിനി ഗോപിക അദ്ധ്യാപകർക്ക് മുന്നിൽ നടത്തിയ ആഹ്ളാദ നൃത്തമാണ് ദിവസങ്ങൾക്കുള്ളിൽ സോഷ്യൽ മീഡിയയിൽ വൈറലായി മാറിയത്. മൂന്ന് ദിവസം കൊണ്ട് ലക്ഷക്കണക്കിന് പേർകണ്ടു കഴിഞ്ഞ വീഡിയോ ആയിരക്കണക്കിന് പേരാണ് ഷെയർ ചെയ്തിരിക്കുന്നത്.
സ്കൂൾ കലോത്സവത്തിലെ വിജയാഘോഷത്തിന്റെ ഭാഗമായി ട്രോഫികളോടൊപ്പമുള്ള അദ്ധ്യാപകരുടെയും വിദ്യാർത്ഥികളുടെയും സന്തോഷ നിമിഷങ്ങൾ പകർത്താനെത്തിയ മാന്നാർ പ്രണവ് സ്റ്റുഡിയോ ഉടമ പ്രണവ് മണിയാണ് ഗോപികയുടെ ആഹ്ലാദ നൃത്തം കാമറയിൽ ഒപ്പിയെടുത്ത് തന്റെ ഫേസ്ബുക്കിലൂടെ പോസ്റ്റ് ചെയ്തത്. നിമിഷങ്ങൾക്കുള്ളിൽ ആ വീഡിയോ സോഷ്യൽ മീഡിയ ഏറ്റെടുക്കുകയായിരുന്നു. ചെട്ടികുളങ്ങര കണ്ണമംഗലം വടക്ക് ഗോവർദ്ധനത്തിൽഗോപിക — ദേവകി ദമ്പതികളുടെ ഏക മകളായ ഗോപിക നൃത്തം അഭ്യസിച്ചിട്ടുണ്ടെങ്കിലും കലോൽസവ വേദികളിലൊന്നും പങ്കെടുത്തിരുന്നില്ല.
തന്റെ വിദ്യാലയം സംസ്ഥാന തലത്തിൽ ഒന്നാമതെത്തിയപ്പോൾ ഉണ്ടായ ആഹ്ലാദത്തിൽ മതിമറന്ന് നൃത്തം ചെയ്തതാണെന്നും അത് കാമറയിൽ പകർത്തിയത് അറിഞ്ഞിരുന്നില്ലെന്നും ഗോപിക പറഞ്ഞു. തന്റെ പേരൊഴിവാക്കിയാണ് വീഡിയോ പലരും കോപ്പി ചെയ്ത് പോസ്റ്റ് ചെയ്യുന്നതെങ്കിലും വീഡിയോ വൈറലായതിൽ ഏറെ അഭിമാനിക്കുന്നതായി പ്രണവ് മണി പറഞ്ഞു. വീഡിയോ വൈറലായതോടെ സ്കൂൾ പ്രിൻസിപ്പൽ വി.മനോജും മറ്റ് അദ്ധ്യാപകരും ഗോപികയെ അഭിനന്ദിച്ചു.
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.