കേരളത്തിലെ കേബിൾ ടെലിവിഷൻ വിപണിയിൽ തങ്ങളുടെ ആധിപത്യം ദുരുപയോഗം ചെയ്തു എന്ന പരാതിയിൽ കോമ്പറ്റീഷൻ കമ്മീഷൻ ഓഫ് ഇന്ത്യ നടത്തുന്ന അന്വേഷണം തടയണമെന്ന ജിയോ സ്റ്റാറിന്റെ ആവശ്യം സുപ്രീം കോടതി തള്ളി. ജസ്റ്റിസുമാരായ ജെ ബി പർദിവാല, സന്ദീപ് മേത്ത എന്നിവരടങ്ങിയ ബെഞ്ചാണ് ഉത്തരവ് പുറപ്പെടുവിച്ചത്. അന്വേഷണം പ്രാഥമിക ഘട്ടത്തിലാണെന്നും റെഗുലേറ്ററെ അതിന്റെ ജോലി ചെയ്യാൻ അനുവദിക്കണമെന്നും കോടതി വ്യക്തമാക്കി.
കേരളത്തിലെ ടെലിവിഷൻ ബ്രോഡ്കാസ്റ്റിംഗ് രംഗത്തുള്ള തങ്ങളുടെ വലിയ സ്വാധീനം ഉപയോഗിച്ച് ജിയോ സ്റ്റാർ വിവേചനപരമായ രീതിയിൽ പ്രവർത്തിക്കുന്നു എന്നാണ് ഏഷ്യാനെറ്റ് ഡിജിറ്റൽ നെറ്റ്വർക്ക് ലിമിറ്റഡ് പരാതിപ്പെട്ടത്. കേരള കമ്മ്യൂണിക്കേറ്റേഴ്സ് കേബിൾ ലിമിറ്റഡിന് അനധികൃതമായ മുൻഗണനയും അമിതമായ ഡിസ്കൗണ്ടുകളും ജിയോ സ്റ്റാർ നൽകുന്നു എന്നതാണ് പ്രധാന ആരോപണം. ട്രായ് നിയമപ്രകാരം ബ്രോഡ്കാസ്റ്റർമാർക്ക് പരമാവധി 35 ശതമാനം വരെ മാത്രമേ ഡിസ്കൗണ്ട് നൽകാൻ അനുവാദമുള്ളൂ. എന്നാൽ ജിയോ സ്റ്റാർ മറ്റ് കരാറുകളിലൂടെ 50 ശതമാനത്തിലധികം ഡിസ്കൗണ്ട് നൽകിയെന്നും ഇതിലൂടെ ചുരുങ്ങിയ മാസങ്ങൾക്കുള്ളിൽ ഏഷ്യാനെറ്റിന്റെ ഉപഭോക്താക്കൾ വൻതോതിൽ കുറഞ്ഞുവെന്നും പരാതിയിൽ പറയുന്നു.
സെക്ടറൽ റെഗുലേറ്ററായ ട്രായിയുടെ നിയമങ്ങൾ പാലിക്കാൻ തങ്ങൾ ബാധ്യസ്ഥരാണെന്നും സി സി ഐ അന്വേഷണത്തിന്റെ പരിധിയിൽ ഇത് വരില്ലെന്നും ജിയോ സ്റ്റാറിന് വേണ്ടി ഹാജരായ മുതിർന്ന അഭിഭാഷകൻ മുകുൾ റോത്തഗി വാദിച്ചു. എന്നാൽ ഈ വിഷയം വിശദമായി പരിശോധിക്കേണ്ടതുണ്ടെന്ന് കോടതി നിരീക്ഷിച്ചു. അന്വേഷണത്തിന് സ്റ്റേ നൽകാൻ വിസമ്മതിച്ച കേരള ഹൈക്കോടതിയുടെ മുൻപത്തെ ഉത്തരവിനെതിരെയാണ് ജിയോ സ്റ്റാർ സുപ്രീം കോടതിയെ സമീപിച്ചത്. ഇതോടെ കോമ്പറ്റീഷൻ കമ്മീഷന്റെ അന്വേഷണ വിഭാഗം ഡയറക്ടർ ജനറലിന് ജിയോ സ്റ്റാറിനെതിരെയുള്ള അന്വേഷണവുമായി മുന്നോട്ട് പോകാം.
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.