കേന്ദ്ര‑സംസ്ഥാന സാമ്പത്തിക ബന്ധങ്ങളും കേരളത്തോടുള്ള അവഗണനയും

നമ്മുടെ ജനാധിപത്യ ചട്ടക്കൂടിന്റെ സുപ്രധാന ഘടകമായ ഫെഡറലിസം, ഇന്ത്യൻ ഭരണഘടനയുടെ 245–263 അനുച്ഛേദങ്ങളില്‍ നിന്നാണ് അതിന്റെ അധികാരം നേടിയെടുത്തത്. 1957ലെ ദേശീയോദ്ഗ്രഥന യോഗത്തിൽ ഫെഡറൽ ധനവ്യവസ്ഥ പൊളിച്ചെഴുതണമെന്ന് സിപിഐ ജനറൽ സെക്രട്ടറിയായിരുന്ന അജയഘോഷ് ആവശ്യപ്പെട്ടിരുന്നു. കേന്ദ്രത്തിന്റെയും സംസ്ഥാനങ്ങളുടെയും സുഗമമായ പ്രവർത്തനത്തിനുള്ള പ്രധാന ഘടകങ്ങളാണ് സമവായവും സഹകരണവും. എന്നാൽ കേന്ദ്ര സർക്കാർ ഏകപക്ഷീയവും രാഷ്ട്രീയ പ്രേരിതവുമായ സമീപനമാണ് സംസ്ഥാനങ്ങളോട് സ്വീകരിക്കുന്നത്. സമാനതകളില്ലാത്ത കേന്ദ്ര സർക്കാരിന്റെ സമീപനം കേരള സമ്പദ്‌വ്യവസ്ഥയെ കടുത്ത പ്രതിസന്ധിയിലേക്ക് തള്ളിവിടുന്ന സാഹചര്യമാണ് സംജാതമായിരിക്കുന്നത്. സാമൂഹ്യക്ഷേമത്തിന് ഊന്നൽ നൽകുന്ന കേരളത്തിന്റെ വികസന സമീപനത്തെ തകിടം മറിക്കുന്ന അവസ്ഥയിലേക്കാണ് എത്തുന്നത്. മുന്നൊരുക്കമില്ലാതെ ജിഎസ്‌ടി നടപ്പിലാക്കിയതിലൂടെ സംസ്ഥാനങ്ങൾക്ക് നികുതി വരുമാനത്തിൽ വൻ കുറവ് വന്നതിനൊപ്പം പതിനഞ്ചാം ധനകാര്യ കമ്മിഷന്റെ രീതിശാസ്ത്രത്തിലുള്ള മാറ്റവും കേരളത്തിന്റെ സമ്പദ്‌വ്യവസ്ഥയുടെ പ്രതിസന്ധിക്ക് ആക്കം കൂട്ടി. മോഡി സര്‍ക്കാര്‍ അധികാരത്തിൽ വന്നനാൾ മുതൽ തികച്ചും രാഷ്ട്രീയ വിവേചനത്തോടെയും ശത്രുതാ മനോഭാവത്തോടെയുമാണ് കേരളത്തോട് പെരുമാറുന്നത്.

ഇടതുപക്ഷത്തിന് സ്വാധീനമുണ്ടായിരുന്ന യുപിഎ സര്‍ക്കാരിന്റെ കാലത്തു മാത്രമാണ് ന്യായമായ പരിഗണന കേരളത്തിന് ലഭിച്ചിട്ടുള്ളത്. 2014 മുതലിങ്ങോട്ട് കേന്ദ്ര സര്‍ക്കാരിന്റെ എല്ലാ ഇനത്തിലുള്ള സംസ്ഥാന വിഹിതത്തിൽ ഗണ്യമായ കുറവുവന്നതായി കണക്കുകൾ പറയുന്നു. 2014–15 ൽ ധനകാര്യ കമ്മിഷൻ ശുപാർശ പ്രകാരം കേരളത്തിനു കിട്ടിയ ഫണ്ട് വിഹിതം 14 ശതമാനത്തിനു താഴെയായിരുന്നു. 2011 മുതൽ 14 വരെ കേന്ദ്രാവിഷ്കൃത പദ്ധതിയിൽ കേരളത്തിന് 100 കോടിയിലധികം ഗ്രാന്റായി ലഭിച്ചു. ബിജെപി സർക്കാർ അധികാരമേറ്റ ശേഷം 35 ശതമാനം കുറവാണ് ലഭ്യമായത്.
ഒരു സംസ്ഥാനത്തിന് എങ്ങനെ സാമ്പത്തിക വെല്ലുവിളികൾ നേരിടുമ്പോഴും മെച്ചപ്പെട്ട മാനവ വികസന ഫലങ്ങൾ കൈവരിക്കാമെന്നതിന്റെ പ്രത്യക്ഷ ഉദാഹരണമാണ് കേരളത്തിന്റെ വികസനാനുഭവങ്ങള്‍. പുരോഗമനപരമായ സാമൂഹിക നയങ്ങൾക്കും, ഉയർന്ന മാനവ വികസന സൂചികകൾക്കും പേരുകേട്ട കേരളം സമീപ വർഷങ്ങളിൽ സാമ്പത്തിക പ്രതിസന്ധിയെ അഭിമുഖീകരിക്കുകയാണ്. ഈ പ്രതിസന്ധി കേന്ദ്ര സർക്കാരിന്റെ നിഷേധാത്മക സമീപനത്തിന്റെ കൂടി ഫലമാണ്. മാനവ വികസനത്തിലെ ശ്രദ്ധേയമായ നേട്ടങ്ങളാണ് കേരളത്തിന്റെ സവിശേഷത. ഉയർന്ന സാക്ഷരതാ നിരക്ക്, ആയുർദൈർഘ്യം, ലിംഗസമത്വം എന്നിവ അഭിമാനിക്കാവുന്ന നിലയിലാണ്. സാമ്പത്തിക വെല്ലുവിളികൾക്കിടയിലും വിദ്യാഭ്യാസത്തിലും ആരോഗ്യ സംരക്ഷണത്തിലും സ്ഥിരമായ നിക്ഷേപം നടത്തിയതിനാലാണ് ഈ നേട്ടങ്ങൾ സാധ്യമായത്. സാർവത്രിക സാക്ഷരതാ നിരക്കിനൊപ്പം നല്ല വിദ്യാഭ്യാസമുള്ള ഒരു തൊഴിൽശക്തി സംസ്ഥാനത്തിന്റെ സാമ്പത്തിക പുരോഗതിക്ക് സംഭാവന നൽകിയിട്ടുണ്ട്.

ഇതുകൂടി വായിക്കൂ: ജനങ്ങളെ പരിഹസിക്കുന്ന കോര്‍പറേറ്റ് സര്‍ക്കാര്‍

ആരോഗ്യസംരക്ഷണ സംവിധാനം മറ്റൊരു വിജയഗാഥയാണ്. ഇത് ഉയർന്ന ഡോക്ടർ‑രോഗി അനുപാതം പ്രകടിപ്പിക്കുകയും മികച്ച ഫലങ്ങൾ കൈവരിക്കുകയും ചെയ്തു. ആരോഗ്യ സംരക്ഷണത്തിലെ ഈ നിക്ഷേപം ജീവിത നിലവാരം മെച്ചപ്പെടുത്തുകയും ആരോഗ്യകരവും കൂടുതൽ ഉല്പാദനക്ഷമതയുള്ളതുമായ ഒരു ജനതയ്ക്ക് സംഭാവന നൽകുകയും ചെയ്തു. സാർവത്രിക പൊതുവിതരണ സംവിധാനം (പിഡിഎസ്), സാമൂഹിക സുരക്ഷാ പെൻഷനുകൾ, സബ്സിഡിയുള്ള ആരോഗ്യ സംരക്ഷണം എന്നിവയുൾപ്പെടെ വിവിധ സാമൂഹിക ക്ഷേമ പരിപാടികൾ സംസ്ഥാനം നടപ്പാക്കിയിട്ടുണ്ട്. ഈ സംരംഭങ്ങൾ ദാരിദ്ര്യ നിരക്ക് ഗണ്യമായി കുറയ്ക്കുകയും പാർശ്വവൽക്കരിക്കപ്പെട്ട സമൂഹങ്ങളുടെ ജീവിത നിലവാരം മെച്ചപ്പെടുത്തുകയും ചെയ്തു. വിദ്യാഭ്യാസത്തിലൂടെയും തൊഴിലവസരങ്ങളിലൂടെയും സ്ത്രീകളെ ശാക്തീകരിക്കുന്നതിൽ കുതിപ്പുണ്ടാക്കി. ഉയർന്ന സ്ത്രീ സാക്ഷരതാ നിരക്കും തൊഴിൽശക്തിയിൽ സ്ത്രീകളുടെ പങ്കാളിത്തവും ഈ വികാസത്തിന്റെ തെളിവാണ്. സാമൂഹ്യക്ഷേമം ലക്ഷ്യം വച്ചുള്ള ഇടപെടലുകളിലൂടെ കേരളം ദാരിദ്ര്യ നിർമ്മാർജനം ഒരു പരിധിവരെ ഇല്ലായ്മ ചെയ്യാൻ സാധിച്ചു. വിദ്യാഭ്യാസത്തിലും ആരോഗ്യപരിപാലനത്തിലും ശ്രദ്ധ കേന്ദ്രീകരിക്കുന്നത് സുസ്ഥിരവും ദീർഘകാലവുമായ വികസനത്തിന് അടിത്തറ സൃഷ്ടിച്ചു. വിദ്യാഭ്യാസം, ആരോഗ്യം, സാമൂഹ്യക്ഷേമം എന്നിവയിൽ സംസ്ഥാനം കാര്യമായ നിക്ഷേപം നടത്തിയിട്ടുണ്ട്, മറ്റ് സംസ്ഥാനങ്ങളെ അപേക്ഷിച്ച് ഉയർന്ന സാക്ഷരതാ നിരക്കും മികച്ച ആരോഗ്യ നേട്ടങ്ങളും സംസ്ഥാനത്തിന്റെ മുതൽക്കൂട്ടാണ്. ഈ നിക്ഷേപങ്ങൾ സംസ്ഥാനത്തിന്റെ ധനകാര്യത്തിൽ സമ്മർദം ചെലുത്തിയെങ്കിലും മൊത്തത്തിലുള്ള വികസനത്തിന് സംഭാവന നൽകിയിട്ടുണ്ട്.
വിനോദസഞ്ചാര മേഖലയ്ക്ക് വരുമാനമുണ്ടാക്കാനുള്ള വലിയ സാധ്യതകളുണ്ട്. സംസ്ഥാനത്തിന്റെ പ്രകൃതി സൗന്ദര്യം, സാംസ്കാരിക സമൃദ്ധി, ആയുർവേദ ടൂറിസം എന്നിവയ്ക്ക് ആഭ്യന്തര-അന്തർദേശീയ വിനോദസഞ്ചാരികളെ ആകർഷിക്കാൻ കഴിയും. ഇത് സമ്പദ് വ്യവസ്ഥയ്ക്ക് ഉത്തേജനം നൽകും. വികസന വെല്ലുവിളികളെ ക്രിയാത്മകമായി നേരിടാനുള്ള കഴിവിൽ മാനവ വികസനത്തിന് മുൻഗണന നൽകാനും സുസ്ഥിര പുരോഗതി കൈവരിക്കാനും ശ്രമിക്കുന്ന മറ്റ് പ്രദേശങ്ങൾക്ക് മാതൃകയാണ് കേരളം.

കേന്ദ്ര ധനകൈമാറ്റങ്ങളിലെ വിവേചനം, പ്രത്യേകിച്ച് ഇന്ത്യൻ ഫെഡറൽ സംവിധാനത്തിന്റെ പശ്ചാത്തലത്തിൽ, ദീർഘകാലമായി ആശങ്കാജനകമാണ്. സംസ്ഥാന സർക്കാരുകൾക്ക് കേന്ദ്ര സർക്കാർ അനുവദിക്കുന്ന ഫണ്ടുകളുള്‍പ്പെടെയുള്ള ധനക്കൈമാറ്റങ്ങൾ സാമ്പത്തിക ആരോഗ്യത്തിലും വികസനത്തിലും നിർണായക പങ്ക് വഹിക്കുന്നു. കേന്ദ്ര കൈമാറ്റത്തിലെ വിവേചനത്തിന്റെ പ്രശ്നം കേരളം പലപ്പോഴും ഉന്നയിച്ചിട്ടുണ്ട്. മറ്റ് സംസ്ഥാനങ്ങളുമായി താരതമ്യം ചെയ്യുമ്പോൾ സംസ്ഥാനത്തിന് താരതമ്യേന ഉയർന്ന പ്രതിശീർഷ വരുമാനവും കൂടുതൽ മെച്ചപ്പെട്ട തനത് വരുമാന സ്രോതസുകളും ഉണ്ടെങ്കിലും കേന്ദ്ര ഫണ്ടുകളുടെ കുറഞ്ഞ വിഹിതമാണ് ലഭിക്കുന്നത്.
സംസ്ഥാനത്തിന്റെ തനതു നികുതി, നികുതിയേതര വരുമാനങ്ങള്‍ ചേർത്ത് മൊത്തം റവന്യു വരുമാനം ഇക്കാലയളവിൽ വലിയ കുതിപ്പുണ്ടാക്കിയിട്ടുണ്ട്. കഴിഞ്ഞ വർഷത്തെക്കാൾ 35.5 ശതമാനം വളർച്ചയാണ് നേടിയത്. മറ്റു പ്രമുഖ സംസ്ഥാനങ്ങളുടെ പ്രകടനവുമായി കേരളത്തെ താരതമ്യം ചെയ്യാവുന്നതാണ്. ഇക്കാര്യത്തിലെ അഖിലേന്ത്യാ ശരാശരി 30 ശതമാനമാണെന്ന് മനസിലാകുമ്പോഴാണ് കേരളത്തിന്റെ പ്രകടനം മികച്ചതാണെന്ന് വ്യക്തമാകുക‌.

ഇതുകൂടി വായിക്കൂ:  വേണ്ടത് വ്യക്തമായ നയതന്ത്രം

സംസ്ഥാനങ്ങളുടെ റവന്യൂ വരുമാനം 

മുകളിൽ കൊടുത്തിരിക്കുന്ന പട്ടിക വെളിപ്പെടുത്തുന്നത് കേരളത്തിന്റെ തനതു വരുമാനം 64 ശതമാനവും കേന്ദ്ര സർക്കാരിൽ നിന്നും ലഭിക്കുന്നത് 36 ശതമാനവും ആണ് എന്നാണ്. വലിയ സംസ്ഥാനങ്ങളുടെ സ്ഥിതി കേരളത്തെക്കാൾ പിന്നിലാണ്. ബിഹാർ (24ശതമാനം), ഉത്തർപ്രദേശ് (47ശതമാനം), മധ്യപ്രദേശ് (44 ശതമാനം), എന്നീ സംസ്ഥാനങ്ങളിലെ തനതു വരുമാനം 50 ശതമാനത്തിൽ താഴെയാണ്. കർണാടക (73 ശതമാനം), ഗുജറാത്ത് (72 ശതമാനം), മഹാരാഷ്ട്ര (71 ശതമാനം), തമിഴ്‌നാട് (69ശതമാനം), ഗോവ (66ശതമാനം) എന്നീ സംസ്ഥാനങ്ങളാണ് മുന്നിലുള്ളത്. രാജ്യത്തെ ശരാശരി (55ശതമാനം)യെക്കാളും കേരളം( 64ശതമാനം) മുന്നിലാണ്. കഴിഞ്ഞ കുറേവർഷങ്ങളായി കേന്ദ്ര സർക്കാരിൽ നിന്നുള്ള കൈമാറ്റത്തിന്റെ കണക്കുകള്‍ പരിശോധിച്ചാൽ കേന്ദ്ര അവഗണനയുടെ നേർച്ചിത്രം ലഭ്യമാകും. സംസ്ഥാനത്തിന്റെ റവന്യു വരുമാനത്തിലെ കേന്ദ്ര വിഹിതം 36 ശതമാനം മാത്രമാണ്. മറ്റ് സംസ്ഥാനങ്ങളുടെ ശരാശരി 45 ശതമാനമാണ്. എന്നിട്ടും കേരളത്തിന്റെ ധനസ്ഥിതി ശ്രീലങ്കയെക്കാളും അല്ലെങ്കിൽ പാകിസ്ഥാനെക്കാളും അപകടാവസ്ഥയിലാണെന്ന ആഖ്യാനം ബോധപൂർവം സൃഷ്ടിക്കുകയാണ് തല്പരകക്ഷികൾ ചെയ്യുന്നത്.
കേരളത്തിന്റെ റവന്യു പിരിച്ചെടുക്കുന്നതിലെ പ്രശ്നങ്ങൾ തനതായ വികസന യാത്രയുടെ നല്ല സൂചകങ്ങളാണ്. ഈ വെല്ലുവിളികൾ മറികടക്കാനാകാത്ത പ്രതിബന്ധങ്ങളല്ല, മറിച്ച് സംസ്ഥാനത്തിന്റെ മനുഷ്യവികസന മാതൃകയെ കൂടുതൽ ശക്തിപ്പെടുത്തുന്നതിനും, നികുതികൾ കാര്യക്ഷമമാക്കുന്നതിനുമുള്ള അവസരങ്ങളാണ്. സാമൂഹികക്ഷേമം, വിദ്യാഭ്യാസം, ആരോഗ്യം എന്നിവയ്ക്കുള്ള കേരളത്തിന്റെ പ്രതിബദ്ധത മറ്റ് പ്രദേശങ്ങൾക്ക് പ്രചോദനമായി തുടരുന്നു.

കേരളത്തിന്റെ വരുമാന സ്രോതസ്സുകള്‍

വരുമാന വർധനയെക്കാൾ ചെലവിലെ വളർച്ച അധികരിച്ചതാണ് സംസ്ഥാനങ്ങളുടെ ധനപ്രതിസന്ധിക്കു കാരണം. റവന്യു ചെലവുകൾ കുറയ്ക്കണമെന്ന നയമാണ് സ്വീകരിച്ചു പോരുന്നത്. കഴിഞ്ഞ ജനുവരിക്ക് മുമ്പുള്ള കണക്കുകൾ പരിശോധിച്ചാൽ റവന്യു ചെലവുകൾ കുറഞ്ഞുവെന്നു മാത്രമല്ല അതിന്റെ വളർച്ച 5.6 ശതമാനം മാത്രമാണ്. എല്ലാ സംസ്ഥാനങ്ങളുടെയും കണക്ക് വിശകലനം ചെയ്താൽ ഇക്കാര്യത്തിൽ 14.5 ശതമാനം വർധനയാണ് രേഖപ്പെടുത്തുന്നത്. ധനമേഖലയിൽ കേരളം മികച്ച രീതിയിൽ മുന്നോട്ട് പോകുന്നുവെന്നതിന് തെളിവാണിത്. പുരോഗമനപരമായ സാമൂഹിക നയങ്ങൾക്കും ഉയർന്ന മാനവിക വികസന സൂചികകൾക്കും ആഘോഷിക്കപ്പെടുന്ന കേരളം, വളർച്ചയ്ക്കും വികസനത്തിനുമുള്ള പ്രതിബദ്ധത പ്രതിഫലിപ്പിക്കുന്ന ചെലവുകൾക്കായി ബജറ്റിന്റെ ഒരു പ്രധാന ഭാഗം നീക്കിവയ്ക്കുന്നു.

കേരളത്തിന്റെ പ്രധാന ചെലവിനങ്ങള്‍

(അവസാനിക്കുന്നില്ല)