വ്യോമസേനയ്ക്ക് വേണ്ടി തദ്ദേശീയമായി വികസിപ്പിച്ച് തേജസ് യുദ്ധവിമാനങ്ങള് വാങ്ങാന് തീരുമാനം. 97 തേജസ് മാര്ക്ക് 1 യുദ്ധ വിമാനങ്ങളാണ് വാങ്ങുക. ഇതിനായി 62,000 കോടിയുടെ പദ്ധതിക്ക് കേന്ദ്ര സര്ക്കാര് അനുമതി നല്കി. പൊതുമേഖല സ്ഥാപനമായ ഹിന്ദുസ്ഥാന് എയ്റോനോട്ടിക്സ് ലിമിറ്റഡില് (എച്ച് എഎല്) നിന്നാണ് യുദ്ധവിമാനങ്ങള് വാങ്ങുക. ഇതിനായുള്ള കരാര് ഉടന് ഒപ്പിടും. കാലപ്പഴക്കം ചെന്ന മിഗ്-21 യുദ്ധവിമാനങ്ങള് സേനയില്നിന്ന് ഒഴിവാക്കാനൊരുങ്ങുകയാണ്. ഇതിന് പകരമാണ് തേജസ് വിമാനങ്ങളെത്തുക.
97 വിമാനങ്ങള് വാങ്ങാനുള്ള കരാര് വരുന്നതോടെ തദ്ദേശീയ വിമാന നിര്മാണത്തിലൂടെ രാജ്യത്തെ ചെറുകിട സംരംഭങ്ങള്ക്കും വലിയ തൊഴിലവസരങ്ങളാണ് സൃഷ്ടിക്കപ്പെടുക. ഇതിനുമുമ്പ് 40 തേജസ് വിമാനങ്ങള് വ്യോമസേനയ്ക്ക് കൈമാറിയിരുന്നു. ഇതിനെ അപേക്ഷിച്ച് മാര്ക്ക് 1 പതിപ്പ് സാങ്കേതികമായി കൂടുതല് മികച്ചവയാണ്.
മെച്ചപ്പെട്ട ഏവിയോണിക്സ്, റഡാര് എന്നിവയാണ് തേജസ് മാര്ക്ക് 1 എ‑യുടെ പ്രത്യേകതകള്. ഇതിനുപുറമെ വിമാനത്തിന്റെ 65 ശതമാനവും തദ്ദേശീയമായി നിര്മിച്ച ഘടകങ്ങളാണ്. തേജസിന്റെ മാര്ക്ക് 2 പതിപ്പിന്റെ വികസനം അന്തിമഘട്ടത്തിലാണ്. തേജസ് മാര്ക്ക് 2‑വിന്റെ 200 യൂണിറ്റുകള് വ്യോമസേന വാങ്ങുമെന്നാണ് പ്രതീക്ഷിക്കുന്നത്. ഇതിന് പുറമെ, നിലവില് പ്രോട്ടോടൈപ്പ് ഘട്ടത്തിലുള്ള എഎംസിഎയുടെ ഉത്പാദനം തുടങ്ങിയാല് 200 വിമാനങ്ങള് വ്യോമസേന വാങ്ങിയേക്കും.
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.