ഹിന്‍ഡന്‍ബര്‍ഗ് ആരോപണങ്ങളെ തുടര്‍ന്ന് അന്വേഷണ നിഴലിലായതിന് പിന്നാലെ ഗൗതം അഡാനിയുടെ മൂത്ത സഹോദരന്‍ വിനോദ് അഡാനി ഓസ്ട്രേലിയന്‍ ബന്ധമുള്ള മുന്നു ഖനികമ്പനികളിലെ ഡയറക്ടര്‍ സ്ഥാനമൊഴിഞ്ഞു. അഡാനി ഗ്രൂപ്പ് കമ്പനികള്‍ക്കെതിരെ അന്വേഷണം നടത്താന്‍ സുപ്രീം കോടതി ഉത്തരവിടുന്നതിന് തൊട്ടുമുമ്പാണ് വിനോദ് അഡാനി രാജി വച്ചതെന്ന് ബ്ലുംബര്‍ഗ് റിപ്പോര്‍ട്ട് ചെയ്തു. അഡാനി ഗ്രൂപ്പ് കമ്പനികളും വിനോദ് അഡാനിയുടെ ഉടമസ്ഥതയിലുള്ള കമ്പനികളും തമ്മിലുള്ള സാമ്പത്തിക ഇടപാട് വിവരങ്ങള്‍ നിക്ഷേപകരില്‍ നിന്നും മറച്ചുവച്ചിട്ടുണ്ടോയെന്ന് സെക്യുരിറ്റീസ് ആന്റ് എക്സേഞ്ച് ബോര്‍ഡ് ഓഫ് ഇന്ത്യ പരിശോധന നടത്തിവരികയാണ്.
കാര്‍മൈക്കല്‍ റെയില്‍ ആന്‍ഡ് പോര്‍ട്ട് സിംഗപ്പൂര്‍, കാര്‍മൈക്കല്‍ റെയില്‍, അബോട്ട് പോയിന്റ് ടെര്‍മിനല്‍ എക്സ്പാന്‍ഷന്‍ കമ്പനി എന്നിവയുടെ മാനേജിങ് ഡയറക്ടര്‍ സ്ഥാനമാണ് വിനോദ് അഡാനി രാജിവച്ചത്. വിനോദിന്റെ കമ്പനികളില്‍ നിന്നുള്ള പണമാണ് ഓസ്‌ട്രേലിയയിലെ ഖനന പദ്ധതിയില്‍ പ്രധാന പങ്ക് വഹിക്കുന്നതെന്നാണ് വിലയിരുത്തല്‍. അഡാനി ഗ്രൂപ്പ് കമ്പനികളുടെ കള്ളപ്പണമൊഴുക്കിന്റെ നേതൃത്വം വിനോദ് അഡാനിക്കാണെന്ന് ജനുവരിയില്‍ പുറത്തുവന്ന ഹിന്‍ഡന്‍ബര്‍ഗ് റിപ്പോര്‍ട്ടില്‍ ആരോപിച്ചിരുന്നു. മൗറീഷ്യസ് കേന്ദ്രീകരിച്ച് പ്രവര്‍ത്തിക്കുന്ന കടലാസ് കമ്പനികള്‍ നിക്ഷേപത്തിന് ഉപയോഗിച്ച് അഡാനി കമ്പനികളുടെ ഓഹരിവില പെരുപ്പിച്ചുകാണിക്കുന്നുവെന്നായിരുന്നു പ്രധാന ആരോപണം. ഹിന്‍ഡന്‍ബര്‍ഗ് റിപ്പോര്‍ട്ടില്‍ ഗൗതം അഡാനിയെക്കാള്‍ കൂടുതല്‍ പരാമര്‍ശിക്കുന്നതും വിനോദ് അഡാനി എന്ന പേരായിരുന്നു.
അതേസമയം കമ്പനി ലിസ്റ്റുചെയ്ത ഏതെങ്കിലും സ്ഥാപനങ്ങളിലോ അനുബന്ധ സ്ഥാപനങ്ങളിലോ വിനോദ് അഡാനി ഉന്നതപദവി വഹിക്കുന്നില്ലെന്നും കമ്പനിയുമായി യാതൊരു ബന്ധവുമില്ലെന്നുമായിരുന്നു അഡാനി ഗ്രൂപ്പിന്റെ അവകാശവാദം. എന്നാല്‍ കഴിഞ്ഞവര്‍ഷം സെപ്റ്റംബറില്‍ സ്വിസ് കമ്പനി ഹോള്‍സിമില്‍ നിന്ന് ഏറ്റെടുത്തുവെന്ന് അഡാനി ഗ്രൂപ്പ് പ്രഖ്യാപിച്ച എസിസി, അംബുജ സിമന്റ് കമ്പനികളുടെ യഥാര്‍ത്ഥ ഉടമ സഹോദരന്‍ വിനോദ് അഡാനിയാണെന്ന് അന്വേഷണത്തില്‍ കണ്ടെത്തി.
English Summary;Hindenburg; Vinod Adani is out
You may also like this video
ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.