ഹെപ്പറ്റൈറ്റിസ് എ വൈറസ് കരളിനെ ബാധിക്കുകയും കരള് വീക്കത്തിന് കാരണമാവുകയും ചെയ്യുന്നതിനാല് വളരെ ശ്രദ്ധിക്കണമെന്ന് ആരോഗ്യ മന്ത്രി വീണാ ജോര്ജ്. മഞ്ഞപ്പിത്തം ബാധിച്ചവരില് ശ്രദ്ധിച്ചില്ലെങ്കില് അപൂര്വമായി രോഗം ഗുരുതരമാകും. ഇത് മരണം വരെ സംഭവിക്കാന് കാരണമാകുമെന്നതിനാല് രണ്ടാഴ്ച വളരെ നിര്ണായകമാണ്. പനി, ക്ഷീണം, ഛര്ദ്ദി തുടങ്ങിയ രോഗലക്ഷണങ്ങള് പ്രകടമായതിന് ശേഷം രണ്ടാഴ്ച വരെയും അല്ലെങ്കില് മഞ്ഞപ്പിത്തം ആരംഭിച്ചതിന് ശേഷം ഒരാഴ്ച വരെയും മറ്റുള്ളവരുമായി അടുത്ത സമ്പര്ക്കം ഒഴിവാക്കുക. മലിനമായ ജലസ്രോതസുകളിലൂടെയൂം, മലിനമായ ജലം ഉപയോഗിച്ച് നിര്മ്മിക്കുന്ന ഭക്ഷണ പാനീയങ്ങളിലൂടെയും രോഗം ബാധിച്ചവരുമായി അടുത്ത സമ്പര്ക്കം പുലര്ത്തുന്നതിലൂടെയുമാണ് ഹെപ്പറ്റൈറ്റിസ് എ പകരുന്നത്. അതിനാല് വളരെ ശ്രദ്ധിക്കണമെന്നും മന്ത്രി പറഞ്ഞു.
ഒരു സ്ഥലത്ത് മഞ്ഞപ്പിത്ത വ്യാപനമുണ്ടായാല് വീണ്ടും ആ സ്ഥലത്ത് അവരില് നിന്നും പൊതു സമൂഹത്തിലേക്ക് (ദ്വിതീയ തലത്തിലേക്ക്) രോഗം പകരാതിരിക്കാന് വളരെ ശ്രദ്ധിക്കണം. അതിനാല് ഹെപ്പറ്റൈറ്റിസ് എയുടെ ഇന്ക്യുബേഷന് പീരീഡായ ആറാഴ്ച വിശ്രമിക്കണം. രോഗം മൂര്ച്ഛിക്കാതിരിക്കാനും മറ്റുള്ളവരിലേക്ക് പകരാതിരിക്കാനും ഇത് പ്രധാനമാണ്. ഭക്ഷ്യ സ്ഥാപനങ്ങളില് ജീവനക്കാര്ക്ക് ഹെല്ത്ത് കാര്ഡ് നിര്ബന്ധമാണ്. ഹെല്ത്ത് കാര്ഡിന്റെ കാലാവധി തീര്ന്നവര് സമയബന്ധിതമായി പുതുക്കുക. രോഗം സംശയിക്കുന്നവര് ഒരു കാരണവശാലും ഭക്ഷ്യ സ്ഥാപനങ്ങളില് ജോലി ചെയ്യരുത്. ഭക്ഷ്യ സുരക്ഷാ പരിശോധനകള് കര്ശനമാക്കിയിട്ടുണ്ടെന്നും മന്ത്രി പറഞ്ഞു.
കുടിവെള്ള സ്രോതസുകള് സൂപ്പര് ക്ലോറിനേറ്റ് ചെയ്യുക വളരെ പ്രധാനമാണ്. പ്യൂരിഫയറുകളില് നടക്കുന്ന ശുദ്ധീകരണത്തിലൂടെ മാത്രമായി ഹെപ്പറ്റൈറ്റിസ് എ വൈറസ് നശിക്കുകയില്ല. അതിനാല് തിളപ്പിച്ചാറ്റിയ വെള്ളം കുടിക്കുന്നതാണ് സുരക്ഷിതം. പനി, ക്ഷീണം, ഛര്ദ്ദില്, മഞ്ഞപ്പിത്തം ഉള്പ്പെടെയുള്ള രോഗലക്ഷണങ്ങളാണ് പ്രധാനമായും കാണുക. രോഗലക്ഷണങ്ങള് കണ്ടാല് ഉടന് തന്നെ ശാസ്ത്രീയ ചികിത്സ തേടണം. വ്യാജ പ്രചരണങ്ങള്ക്ക് പിന്നാലെ പോയി രോഗം ഗുരുതരമാക്കരുത്. പ്രായമായവര്, ഗര്ഭിണികള്, കുട്ടികള്, മറ്റ് അനുബന്ധ രോഗങ്ങളുള്ളവര് വളരെ ശ്രദ്ധിക്കണമെന്നും മന്ത്രി കൂട്ടിച്ചേര്ത്തു.
ഹെപ്പറ്റൈറ്റിസ് രോഗം സ്ഥിരീകരിച്ചതോ, സംശയിക്കുന്നതോ ആയവരും, രോഗികളെ പരിപാലിക്കുന്നവരും ശ്രദ്ധിക്കേണ്ട കാര്യങ്ങള്
· രണ്ട് ആഴ്ച വരെയും അല്ലെങ്കില് മഞ്ഞപ്പിത്തം ആരംഭിച്ചതിന് ശേഷം ഒരാഴ്ച വരെയും മറ്റുള്ളവരുമായി അടുത്ത സമ്പര്ക്കം ഒഴിവാക്കുക. (ലൈംഗിക ബന്ധം ഉള്പ്പെടെ).
· ഭക്ഷണ, പാനീയങ്ങള് തയ്യാറാക്കുന്നതില് നിന്നും മാറി നില്ക്കുക.
· കൈകള് സോപ്പും വെള്ളവും ഉപയോഗിച്ച് കഴുകുന്നത് ശീലമാക്കുക, പ്രത്യേകിച്ച് മല‑മൂത്ര വിസര്ജനത്തിന് ശേഷവും ഭക്ഷണം കഴിക്കുന്നതിന് മുമ്പും.
· രോഗി ഉപയോഗിക്കുന്ന ശുചിമുറികളിലെ പ്രതലങ്ങള്, ബ്ലീച്ച് ലായനി ഉപയോഗിച്ച് വൃത്തിയാക്കിയതിന് ശേഷം മാത്രം മറ്റുള്ളവര് ഉപയോഗിക്കുക.
· ഹോസ്റ്റലുകള്, ഡോര്മിറ്ററികള് തുടങ്ങിയ സ്ഥാപനങ്ങളില് രോഗബാധിതരെ പ്രത്യേകമായി താമസിപ്പിക്കുക.
· രോഗി ഉപയോഗിച്ച വസ്ത്രങ്ങളും, പാത്രങ്ങളും മറ്റ് വസ്തുക്കളും മറ്റുളളവരുമായി പങ്കിടരുത്.
· രോഗി ഉപയോഗിച്ച വസ്ത്രങ്ങളും പാത്രങ്ങളും പ്രത്യേകം കഴുകേണ്ടതാണ്. അവ 0.5 ശതമാനം ബ്ലീച്ചിങ് ലായനി പോലുള്ള അണുനാശിനി ഉപയോഗിച്ച് വൃത്തിയാക്കുക. (15 ഗ്രാം അല്ലെങ്കില് മൂന്ന് ടീ സ്പൂണ് അല്ലെങ്കില് ഒരു ടേബിള് സ്പൂണ് ബ്ലീച്ചിങ് പൗഡര് ഒരു ലിറ്റര് വെള്ളത്തില് കലക്കിയാല് 0.5 ശതമാനം ബ്ലീച്ചിങ് ലായനി തയ്യാറാക്കാവുന്നതാണ്.)
· ആല്ക്കഹോള് അടങ്ങിയ ഹാന്ഡ് റബുകള് ഹെപ്പറ്റൈറ്റിസ് എ അണുനശീകരണത്തിന് ഫലപ്രദമല്ല.
English Summary:Jaundice can be serious in adults; Instructions should be followed: Minister Veena George
You may also like this video
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.