ടൂറിസം, ഐടി, സൂക്ഷ്മ, ചെറുകിട, ഇടത്തരം സംരംഭങ്ങൾ (എംഎസ്എംഇ), ഹരിത ഊർജം എന്നീ മേഖലകളിൽ ശക്തമായ മുന്നേറ്റം നടത്തി കേരളം, 2021–25ല് 70,916 കോടി രൂപയുടെ പുതിയ നിക്ഷേപ പദ്ധതികൾ ആകർഷിച്ചെന്ന് എംഎസ്എംഇ എക്സ്പോർട്ട് പ്രമോഷൻ കൗൺസിലിന്റെ പഠന റിപ്പോര്ട്ട്. 23,728 കോടി രൂപയുടെ നിക്ഷേപ പദ്ധതികൾ പൂർത്തിയായി. 10,780 കോടി രൂപയുടെ പദ്ധതികൾ പുനരുജ്ജീവിപ്പിച്ചു. വിവിധ ഘട്ടങ്ങളിലായി 3,03,720 കോടിയുടെ പദ്ധതികൾ നടപ്പിലാക്കിയെന്നും എംഎസ്എംഇ ഇപിസി ചെയർമാൻ ഡോ. ഡി എസ് റാവത്ത് പറഞ്ഞു. സെന്റർ ഫോർ മോണിറ്ററിങ് ഓഫ് ഇന്ത്യൻ ഇക്കണോമിയിൽ (സിഎംഐഇ) നിന്നാണ് ഈ ഡാറ്റ ശേഖരിച്ചത്.
വിവരസാങ്കേതിക വിദ്യ, ടൂറിസം, ആരോഗ്യ സംരക്ഷണം, വിദ്യാഭ്യാസം, എംഎസ്എംഇകൾ എന്നിവയിൽ സംസ്ഥാനം ശ്രദ്ധേയമായ പുരോഗതിക്ക് സാക്ഷ്യം വഹിച്ചു. അതേസമയം ഹരിത ഊർജം, വിജ്ഞാന സമ്പദ്വ്യവസ്ഥ, സ്റ്റാർട്ടപ്പുകൾ എന്നിവയിൽ പുതിയ അവസരങ്ങൾ ഉയർന്നുവരുന്നു. 2024–25ൽ, സർക്കാർ, സ്വകാര്യ മേഖല എന്നീ മേഖലകളിൽ പ്രഖ്യാപിച്ച പുതിയ പദ്ധതികൾ 11,544 കോടി രൂപ വിലമതിക്കുന്നവയായിരുന്നു. 2,944 കോടി രൂപയുടെ പൂർത്തീകരിച്ച പദ്ധതികളും 867 കോടി രൂപയുടെ പുനരുജ്ജീവിപ്പിച്ച പദ്ധതികളുമാണ് ഇതിലുൾപ്പെട്ടത്. ഇതിൽ സ്വകാര്യ മേഖലയുടെ സംഭാവന 8,119 കോടിയും പൂർത്തീകരിച്ച പദ്ധതികൾ 675 കോടിയും പുനരുജ്ജീവിപ്പിച്ച പദ്ധതികൾ 430 കോടിയുടേതുമാണ്. രണ്ട് വർഷത്തിനിടെ 15,000 കോടിയുടെ നിക്ഷേപം വരുന്ന 2.40 ലക്ഷം എംഎസ്എംഇകള് ആരംഭിച്ചു. ഇതിൽ 2.20 ലക്ഷം പേർക്ക് തൊഴിലവസരങ്ങളുമുണ്ടായി.
ആഭ്യന്തര, വിദേശ സന്ദർശകരുടെ എണ്ണത്തിൽ കേരളം മഹാമാരിക്ക് ശേഷം സുഖം പ്രാപിച്ചു. 2024ൽ 2.20 കോടിയിലധികം വിനോദസഞ്ചാരികൾ സംസ്ഥാനം സന്ദർശിച്ചു. ഇത് സംസ്ഥാന ജിഡിപിയിലേക്ക് 10–12% സംഭാവന ചെയ്തു. 24 ശതമാനത്തിലധികം തൊഴിലാളികൾക്ക്, അതായത് 15 ലക്ഷം ആളുകൾക്ക്, പ്രത്യക്ഷമായും പരോക്ഷമായും തൊഴിൽ നൽകി.
ഇന്ത്യയിലെ ഏറ്റവും സാമൂഹികമായി പുരോഗമിച്ച സംസ്ഥാനം എന്ന സ്ഥാനം ഉറപ്പിച്ചുകൊണ്ട് കേരളം പ്രധാന മേഖലകളിൽ സ്ഥിരമായ വളർച്ച രേഖപ്പെടുത്തുന്നത് തുടരുകയാണെന്നും പഠനം പറയുന്നു. മനുഷ്യ വികസനം, സുസ്ഥിരത, എല്ലാവരെയും ഉൾക്കൊള്ളുന്ന നയങ്ങൾ എന്നിവയിൽ ശക്തമായ ശ്രദ്ധ കേന്ദ്രീകരിച്ചുകൊണ്ട്, സാമ്പത്തിക വികാസവും സാമൂഹിക ക്ഷേമവും സംയോജിപ്പിക്കുന്ന സന്തുലിത പുരോഗതി കേരളം കൈവരിക്കുന്നു. അതേസമയം സംരംഭക മേഖലയില് വൈവിധ്യവൽക്കരിക്കുന്നതിനായി ഉല്പാദന എംഎസ്എംഇകളെ പ്രോത്സാഹിപ്പിക്കണമെന്നും വിപണനം, കയറ്റുമതി ഓറിയന്റേഷൻ, സാങ്കേതികവിദ്യ സ്വീകരിക്കൽ എന്നിവയിൽ പിന്തുണ മെച്ചപ്പെടുത്തേണ്ടതുണ്ടെന്നും പഠനം വിലയിരുത്തി.
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.