സംസ്ഥാനത്തെ നാല് ആരോഗ്യ സ്ഥാപനങ്ങള്ക്ക് കൂടി നാഷണല് ക്വാളിറ്റി അഷുറന്സ് സ്റ്റാന്ഡേര്ഡ്സ് (എന്ക്യുഎഎസ്) അംഗീകാരം ലഭിച്ചതായി ആരോഗ്യ മന്ത്രി വീണാ ജോര്ജ്.
കൊല്ലം ജില്ലയിലെ അലയമണ് കുടുംബാരോഗ്യ കേന്ദ്രം 94.77 ശതമാനം സ്കോറും, തിരുവനന്തപുരം ജില്ലയിലെ കോരണംകോട് ജനകീയ ആരോഗ്യ കേന്ദ്രത്തിന് 85.83, എറണാകുളം ജില്ലയിലെ കട്ടിങ് പ്ലാന്റേഷന് ജനകീയ ആരോഗ്യ കേന്ദ്രത്തിന് 88.47, വയനാട് വടക്കനാട് ജനകീയ ആരോഗ്യ കേന്ദ്രത്തിന് 90.55 ശതമാനം എന്നിങ്ങനെ സ്കോറുകള് നേടിയാണ് എന്ക്യുഎഎസ് കരസ്ഥമാക്കിയത്. കൂടുതല് ആശുപത്രികളെ ദേശീയ ഗുണനിലവാരത്തിലേക്ക് ഉയര്ത്താനുള്ള വികസന പ്രവര്ത്തനങ്ങളാണ് നടന്നുവരുന്നതെന്ന് മന്ത്രി പറഞ്ഞു.
സംസ്ഥാനത്ത് ആദ്യമായാണ് ജനകീയ ആരോഗ്യ കേന്ദ്രങ്ങള്ക്ക് ദേശീയ ഗുണനിലവാര അംഗീകാരം ലഭിക്കുന്നത്. 2023ല് ഈ സര്ക്കാരിന്റെ കാലത്താണ് ആര്ദ്രം മിഷന്റെ ഭാഗമായി 5415 ജനകീയ ആരോഗ്യ കേന്ദ്രങ്ങള് യാഥാര്ത്ഥ്യമാക്കിയത്. ജനകീയ ആരോഗ്യ കേന്ദ്രങ്ങളില് മെച്ചപ്പെട്ട ഭൗതിക സാഹചര്യങ്ങളും ഉപകരണങ്ങളും ആരോഗ്യ സേവനങ്ങളും 36 ഇനം മരുന്നുകളും 10 തരം ലാബ് പരിശോധനകളും ലഭ്യമാക്കുന്നു. ഇതിലൂടെ വാര്ഡ് തലം മുതലുള്ള ആരോഗ്യ സേവനങ്ങള് ശാക്തീകരിക്കുവാനാണ് സര്ക്കാര് ലക്ഷ്യമിടുന്നത്. ഈ പ്രവര്ത്തനങ്ങള്ക്കുള്ള അംഗീകാരം കൂടിയാണ് മൂന്ന് ജനകീയ ആരോഗ്യ കേന്ദ്രങ്ങള്ക്ക് ലഭിച്ച എന്ക്യുഎഎസ് അംഗീകാരം. കൂടുതല് ജനകീയ ആരോഗ്യ കേന്ദ്രങ്ങള് എന്ക്യുഎഎസ് അംഗീകാരം നേടാനുള്ള തയ്യാറെടുപ്പിലാണ്.
ഇതോടെ സംസ്ഥാനത്തെ 197 ആശുപത്രികള് എന്ക്യുഎഎസ് അംഗീകാരവും 83 ആശുപത്രികള് പുനഃഅംഗീകാരവും നേടിയെടുത്തു. അഞ്ച് ജില്ലാ ആശുപത്രികള്, നാല് താലൂക്ക് ആശുപത്രികള്, 11 സാമൂഹികാരോഗ്യ കേന്ദ്രങ്ങള്, 41 അര്ബന് പ്രൈമറി ഹെല്ത്ത് സെന്റര്, 133 കുടുംബാരോഗ്യ കേന്ദ്രങ്ങള്, മൂന്ന് ജനകീയ ആരോഗ്യ കേന്ദ്രങ്ങള് എന്നിവ എന്ക്യുഎഎസ് അംഗീകാരം നേടി.
എന്ക്യുഎഎസ് അംഗീകാരത്തിന് മൂന്ന് വര്ഷത്തെ കാലാവധിയാണുളളത്. മൂന്ന് വര്ഷത്തിന് ശേഷം ദേശീയ സംഘത്തിന്റെ പുനഃപരിശോധന ഉണ്ടാകും. കൂടാതെ വര്ഷാവര്ഷം സംസ്ഥാനതല പരിശോധനയുമുണ്ടാകും. എന്ക്യുഎഎസ് അംഗീകാരം ലഭിക്കുന്ന കുടുംബാരോഗ്യ കേന്ദ്രങ്ങള്ക്ക് രണ്ട് ലക്ഷം രൂപ വീതവും, ജനകീയ ആരോഗ്യ കേന്ദ്രങ്ങള്ക്ക് ഒരു പാക്കേജിന് 18,000 രൂപ വീതവും മറ്റ് അശുപത്രികള്ക്ക് ഒരു കിടക്കയ്ക്ക് 10,000 രൂപ എന്ന നിലയിലും വാര്ഷിക ഇന്സെന്റീവ് ലഭിക്കും.
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.