വമ്പൻ ഞാനെൻ
കുംഭ നിറഞ്ഞിരിക്കുന്നു
നിറഞ്ഞ കുംഭയിൽ
ആരുടെയോ
നെല്‍വയലുകൾ
മെതിച്ചിരിക്കുന്നു
കിളിച്ചുണ്ടെൻ തോപ്പിലെ
മാമ്പഴമാംസമെല്ലാം
അയവിറക്കി രുചിച്ചു
മധുകിനിഞ്ഞുറങ്ങുന്നു
ഒരു കരിമ്പിൻ തോട്ടം
പിഴിഞ്ഞൊരു പുഴ
എന്നെ ലാളിച്ചൊഴുക്കിയുലാത്തുന്നു
എന്നുള്ളിൽ വിരിഞ്ഞ പൂവാൾ
സൗവർണ്ണ കോതമ്പു കാന്തിയെഴുതുന്നു
ഉറക്കത്തിലെൻ
നെറ്റി പൊട്ടിച്ചൊരു
കറുത്ത വണ്ടു പറന്നു പോയി
കറുത്തതോടതൊരു
കിരാത പർവ ചരിത കഥയിൽ
പൊട്ടുകുത്തിയിളകിയാടുന്നു
കാടും കാട്ടുപൊയ്കയും
കായും കനിയുമെനിക്കുമുളളതാണെന്നും
കഥപ്പുഴയിലൊരു
വഞ്ചിയമരത്തിൽ പാടുന്നയാൾ
ഉണർന്നു
ഞാനൊരു പച്ച വേഷമായി
കത്തി നിറച്ചുള്ളത്തിൽ
കരിവീശിയാടുന്നു
പിന്നണിയിലൊരുവൻ
നെല്ലു തിന്നാൽ
അവനെ തല്ലിക്കൊഴിച്ച്
വെറും കറ്റയാക്കീടും
ഞാൻ
അവനു നിങ്ങൾ
മധുവെന്ന് പേരിടും
ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.