നലമിയന്നിടുമീ വസുധയ്ക്കു തൻ
ഹരിതകോമളസസ്യജ ഗാത്രവും
വിമലമാം ജലവാഹിനി പുൽകിടും
കുളിരുമാർദ്രതയും ഇനി അന്യമോ?
പ്രിയതരുക്കൾ മറച്ചൊരു ദേഹമീ-
വിധമനർത്ഥദരാഞ്ഞു മുറിച്ചുവോ?
മറവിയായിതു
വാഹിനിയൊക്കെയും
തനു മെലിഞ്ഞു കിതച്ചൊഴുകുന്നിതേ.
അവനി തന്നുടെ മാറിട മൊന്നു ചൂ-
ഴ്ന്നവിടെയായ് പല ഗർത്തഗണങ്ങളും
പുതിയ നാമ്പുകളേറ്റി നടന്നൊരാ
ജനനിതന്നുടെ ഗർഭവവുമേങ്ങിയോ?
അതി വരൾച്ച തളിർത്ത തരുക്കളും
ജലകണം കിനിയാത്തൊരു കൂപവും
ഖഗകുലത്തിന് തേടിയ ദാഹനീ -
രുറവ വറ്റിയ നീർത്തടമേകുമോ ?
നരകുലദ്ദുരയാൽ വഴിതെറ്റിയ -
ങ്ങൊഴുകിടും പുഴ തന്നൊടു കൂടെയായ്
അപഹരിച്ച പ്രിയങ്കരമാകുമീ
നിവസനങ്ങൾ തകർത്ത മനങ്ങളും
മനുജരാഞ്ഞു വലിച്ചെറിയുന്നതാം
മലിനകമ്പളമേറ്റു
പയോനിധി
നരനുഭോജ്യമതാം
ജലജീവികൾ -
ക്കതൊരജൈവ വിഷാംശകഭോജനം
ഭരമെഴും നിലകൂടിയ കെട്ടിട -
ക്കനമതൊട്ടു സഹിക്കയസാധ്യമായ്
പെരുമഴക്കൊടു പെയ്ത്തിനിടയ്ക്കതാ
നിലകൾ തെറ്റി നിലം നിപതിച്ചിതേ.
വികസനങ്ങൾ വരേണമതെങ്കിലും
വിഭവചൂഷണമീവിധമാകൊലാ
നിയമവും സമനീതിയുമേറ്റി നാം
തടയണം ബഹു
ദുസ്ഥമനീതികൾ
സഹജമാം ദയയാർന്ന മനസ്സിനാൽ
കരുതലാവുക മാനവഹൃത്തടം
കുതികുതിക്കുക മുക്തിയിലേക്കു നീ
മഹിമയാർന്ന മദിയധരിത്രിയേ.
ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.