ദിവസവും അന്വേഷണ സംഘത്തിന് മുന്നിൽ ഹാജരാകണമെന്നും അന്വേഷണവുമായി സഹകരിക്കണമെന്നും എൽദോസ് കുന്നപ്പിള്ളി എംഎൽഎയോട് ഹൈക്കോടതി. എൽദോസിനെതിരായ ബലാത്സംഗക്കേസ് പരിഗണിക്കവെയാണ് കോടതിയുടെ താക്കീത്. എൽദോസ് അന്വേഷണവുമായി സഹകരിക്കുന്നില്ലെന്ന് സർക്കാർ കോടതിയെ അറിയിച്ചിരുന്നു.
തുടർന്നാണ് ദിവസവും രാവിലെ ഒമ്പതിന് ഹാജരാകണമെന്ന് കോടതി നിർദ്ദേശം. അതേസമയം, എൽദോസിന്റെ മുൻകൂർ ജാമ്യം റദ്ദാക്കണമെന്ന സർക്കാരിന്റെ ഹർജി കോടതി പിന്നീട് പരിഗണിക്കാനായി മാറ്റി. ജസ്റ്റിസ് കൗസർ എടപ്പഗത്ത് അധ്യക്ഷനായ ബെഞ്ചാണ് കേസ് പരിഗണിച്ചത്. അതിനിടെ, എൽദോസിനും വക്കീലിനുമെതിരായ പരാതിക്കാരിയുടെ മൊഴി പുറത്തുവന്നു. വക്കീൽ ഓഫീസിൽ പൂട്ടിയിട്ട് ഭീഷണിപ്പെടുത്തിയെന്നും മർദ്ദിച്ചെന്നും പരാതിക്കാരി ആരോപിക്കുന്നു. മുദ്രപത്രത്തിൽ ഒപ്പിടാൻ ആവശ്യപ്പെട്ടായിരുന്നു മർദ്ദനമെന്നും മൊഴിയിൽ വ്യക്തമാക്കുന്നു.
ഒക്ടോബർ 20നാണ് തിരുവനന്തപുരം ജില്ലാ സെഷൻസ് കോടതി എൽദോസിന് കർശന ഉപാധികളോടെ ജാമ്യം അനുവദിച്ചത്. തട്ടിക്കൊണ്ടുപോയി ദേഹോപദ്രവം ചെയ്തതിനാണ് എംഎൽഎയ്ക്കെതിരെ പൊലീസ് ആദ്യം കേസെടുത്തത്. പിന്നീട് യുവതിയുടെ പരാതിയുടെ അടിസ്ഥാനത്തിൽ ലൈംഗിക അതിക്രമം, വധശ്രമം എന്നീ വകുപ്പുകൾ കൂടി ചുമത്തുകയായിരുന്നു.
കേസിൽ ഒളിവിൽ പോയ എൽദോസ് കുന്നപ്പിള്ളി മുൻകൂർ ജാമ്യം ലഭിച്ചതിന് ശേഷമാണ് പൊതുസമൂഹത്തിന് മുന്നിലെത്തിയത്. കേസിന് പിന്നാലെ എംഎൽഎയെ കെപിസിസി ആറ് മാസത്തേക്ക് സസ്പെൻഡ് ചെയ്തിരുന്നു. ആറ് മാസത്തേക്ക് കെപിസിസി, ഡിസിസി പരിപാടികളിൽ പങ്കെടുക്കരുതെന്നും നിർദ്ദേശമുണ്ട്.
English Summary: Eldos Kunnapilli should appear before the police daily
You may like this video also
ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.