മൂന്ന് വയസുകാരൻ ഓടയിൽ വീണ സംഭവത്തിൽ അഞ്ചു വയസുകാരനെ റോഡിൽ കിടത്തി പ്രതിഷേധിച്ച യൂത്ത് കോൺഗ്രസ് പ്രവർത്തകർക്കെതിരെ കേസ്. പൊലീസ് സ്വമേധയാ കേസെടുക്കുകയായിരുന്നു.
സംഭവത്തിൽ എറണാകുളം ശിശുക്ഷേമ സമിതി എറണാകുളം സെൻട്രൽ പൊലീസിൽ പരാതി നൽകിയിരുന്നു. അഞ്ചു വയസുകാരനായ കുട്ടിയെ അർധ നഗ്നനാക്കി നിലത്തുകിടത്തി ശരീരത്തിൽ ചുള്ളിക്കമ്പ് വച്ചായിരുന്നു കോർപറേഷനെതിരെയുളള യൂത്ത് കോൺഗ്രസിന്റെ പ്രതിഷേധം. ജുവൈനൽ ജസ്റ്റിസ് ആക്ട് പ്രകാരം യൂത്ത് കോൺഗ്രസ് പ്രവർത്തകർക്കെതിരെ നടപടിയെടുക്കണമെന്ന് ശിശുക്ഷേമ സമിതി പരാതിയിൽ ആവശ്യപ്പെട്ടിരുന്നു. ബാലാവകാശ നിയമങ്ങൾക്ക് വിരുദ്ധമായാണ് യൂത്ത് കോൺഗ്രസിന്റെ പ്രതിഷേധമെന്നും സമിതി ചൂണ്ടിക്കാട്ടി.
യൂത്ത് കോൺഗ്രസ് പ്രവർത്തകരുടെ നടപടിക്കെതിരെ വ്യാപക പ്രതിഷേധം ഉയർന്നിരുന്നു. പനമ്പിള്ളി നഗറില്‍ മൂന്നുവയസുകാരന്‍ കാനയില്‍ വീണ സംഭവം ദുഃഖകരമെന്ന് കൊച്ചി മേയര്‍ അനില്‍ കുമാര്‍ പറഞ്ഞിരുന്നു. കുട്ടിയുടെ ചികിത്സാ ചെലവ് ഏറ്റെടുക്കും. ഇത്തരം അപകടങ്ങള്‍ ഇനിയും ഉണ്ടാകാതിരിക്കാനുള്ള നടപടികള്‍ നഗരസഭ സ്വീകരിക്കുമെന്നും മേയര്‍ അറിയിച്ചു.
അപകടമുണ്ടായ ഓടയുടെ ഭാഗത്ത് കമ്പിവേലി കെട്ടുന്ന ജോലികൾ പുരോഗമിക്കുകയാണ്. രണ്ടാഴ്ചക്കകം ഓടകൾ അടയ്ക്കണമെന്ന് ഇന്നലെ ഹൈക്കോടതി നിർദ്ദേശിച്ചിരുന്നു. കാനകൾക്കും ഓടകൾക്കും സ്ലാബിടുന്ന പ്രവൃത്തികൾക്കുളള എസ്റ്റിമേറ്റ് ഉടൻ സമർപ്പിക്കുമെന്ന് കോർപറേഷൻ എൻജിനീയറിങ് വിഭാഗം അറിയിച്ചു. അപകടത്തിൽ പരിക്കേറ്റ കുട്ടിക്ക് രക്തത്തിൽ അണുബാധയുളളതിനാൽ ആശുപത്രിയിൽ തുടരുകയാണ്.
English Summary: Protest by turning the child into a cow; Case against Youth Congressmen
You may also like this video
ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.