ഭൂപടത്തിൽ ഇല്ലാത്ത രണ്ടു പേർ
പ്രണയിക്കുമ്പോൾ
ഭൂഗോളം ഇരുവർക്കും ചുറ്റും
തിരിയുവാൻ തുടങ്ങുന്നു
പ്രണയത്തെക്കുറിച്ചു ഇത്രയും
പറയുവാനെന്ത് എന്നാകും ചോദ്യം
വളരെ ലളിതമായ സമവാക്യങ്ങൾ
ഉത്തരങ്ങളുടെ ബാഹുല്യം
കണ്ണിലേക്കുറ്റു നോക്കി
സ്വപ്നങ്ങളെ വ്യാഖ്യാനിക്കുവാൻ
പ്രവാചകരുടെ തുകൽ ചുരുളുകളിൽ
ഉത്തരങ്ങൾ തിരയുന്നു
വർഷങ്ങൾക്കു ശേഷം
ഭൂപടത്തിൽ ഇല്ലാത്ത രണ്ടു പേർ
പ്രണയമില്ലാത്ത ചെമ്മണ്ണ് വഴിയിൽ
രാജ്യത്തെ തെരയുന്നു
കണ്ണുകളിൽ നിന്നും കണ്ണീർ
ഹൃദയം തകർന്നു നുറുങ്ങി
ചിറകറ്റ ശലഭങ്ങൾ
ഭൂമിയിൽ നിപതിക്കുന്നു
സത്യത്തിൽ പ്രണയത്തെക്കുറിച്ചു
പറയുവാനെന്ത്?
പ്രണയമില്ലാത്ത രാജ്യത്ത്
ഇരുവരും മൂകമായിരിക്കുന്നു
വ്യാഖ്യാനിച്ചു മടുത്ത സ്വപ്നങ്ങൾ
ചിറകുകൾ മുളച്ചു പറന്നു
രാജ്യാതിർത്തികൾ കടന്നു
കവിതകൾ മൂളുന്നു
മറവിയുടെ കയങ്ങളിൽ
മുങ്ങിമരിച്ച രണ്ടുപേർ
ഭൂപടത്തിൽ ഇടം തേടാൻ കൊതിച്ചു
അന്ധരായി തുടരുന്നു
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.