ഇന്ത്യയുടെ സാമ്പത്തിക വളർച്ചാ പ്രവചനം കുറയുമെന്ന് ധനകാര്യ ഗവേഷണ സ്ഥാപനമായ ഫിച്ച് റേറ്റിങ്സ്. 2022–23 വർഷം രാജ്യത്തിന്റെ മൊത്ത അഭ്യന്തര ഉല്പാദനം (ജിഡിപി) 7.8 ശതമാനമാകുമെന്നായിരുന്നു ജൂണിലെ പ്രവചനം. ഇത് ഏഴ് ശതമാനമായി കുറയുമെന്നാണ് പുതിയ വിലയിരുത്തൽ. 2024 സാമ്പത്തിക വർഷം 7.4 ശതമാനമാകുമെന്നുമായിരുന്നു പ്രവചനം. ഇത് 6.7 ശതമാനമായി കുറയും. ഉയർന്ന പണപ്പെരുപ്പവും പലിശ നിരക്കുമാണ് കാരണമെന്നും സെപ്റ്റംബറിലെ ആഗോള സാമ്പത്തിക അവലോകന റിപ്പോർട്ടില്‍ അമേരിക്ക ആസ്ഥാനമായ ഏജൻസി വ്യക്തമാക്കി.
യുകെയും യുഎസും സാമ്പത്തിക മാന്ദ്യത്തിലേക്ക് നീങ്ങുമെന്നും റിപ്പോര്‍ട്ട് പറയുന്നു. യൂറോസോണും ബ്രിട്ടണും ഈ വർഷാവസാനം മാന്ദ്യത്തിലേക്ക് കടക്കും. യൂറോപ്യൻ യൂണിയന്റെ ഭാഗമായ 19 രാജ്യങ്ങളുടെ സാമ്പത്തിക സഖ്യമാണ് യൂറോസോൺ. 2023 മധ്യത്തോടെ അമേരിക്കയില്‍ നേരിയ മാന്ദ്യം അനുഭവപ്പെടും. യൂറോപ്പിലെ വാതക പ്രതിസന്ധി, പലിശനിരക്കിലെ കുത്തനെയുള്ള മാറ്റം, ചൈനയിലെ മാന്ദ്യം എന്നിവയ്ക്കൊപ്പം ആഗോള സമ്പദ്‌വ്യവസ്ഥയില്‍ പ്രതിസന്ധിക്ക് സാധ്യത കാണുന്നതായി ഫിച്ച് റേറ്റിങ്ങിലെ ചീഫ് ഇക്കണോമിസ്റ്റ് ബ്രയാൻ കൗൾട്ടൺ പറഞ്ഞു.
ഇന്ത്യയുടെ സാമ്പത്തിക വളർച്ച നേരത്തെ പ്രവചിച്ചതിനേക്കാൾ കുറയുമെന്ന് മൂഡീസ്, സിറ്റിഗ്രൂപ്പ്, എസ്ബിഐ തുടങ്ങിയ ഏജൻസികള്‍ വ്യക്തമാക്കിയിരുന്നു. മൊത്തവില സൂചിക അടിസ്ഥാനമാക്കിയുള്ള പണപ്പെരുപ്പം കഴിഞ്ഞ മൂന്നുമാസമായി കുറയുകയാണെങ്കിലും രണ്ടക്കത്തില്‍ തുടരുകയാണ്. എന്നാൽ ചില്ലറ വില സൂചിക അടിസ്ഥാനമാക്കിയ പണപ്പെരുപ്പം ഏഴു ശതമാനമാണ്. ഭക്ഷ്യവസ്തുക്കളുടെ വില ഉയർന്നു നിൽക്കുന്നത് പ്രതികൂല ഘടകമാണെന്ന് ഫിച്ച് വിലയിരുത്തുന്നു.
ചില്ലറ വിലയുടെ അടിസ്ഥാനത്തിലുള്ള പണപ്പെരുപ്പം തുടർച്ചയായ എട്ടാം മാസവും റിസർവ് ബാങ്ക് നിശ്ചയിച്ച പരിധിയായ ആറ് ശതമാനത്തിന് മുകളിലാണ്. ചില്ലറ പണപ്പെരുപ്പം നിയന്ത്രിക്കാൻ ആർബിഐ ഈവർഷം മൂന്നു തവണ പലിശനിരക്ക് ഉയർത്തി. എങ്കിലും നടപ്പ് സാമ്പത്തിക വർഷം 7.2 ശതമാനം വളർച്ചയുണ്ടാകുമെന്നാണ് റിസർവ് ബാങ്കിന്റെ വിലയിരുത്തൽ. ഈ സാമ്പത്തിക വർഷത്തിന്റെ രണ്ടും മൂന്നും പാദങ്ങളിൽ പണപ്പെരുപ്പം ആറ് ശതമാനമെന്ന പരിധിക്ക് മുകളില്‍ തന്നെയായിരിക്കും. ആഗോള സാമ്പത്തിക സ്ഥിതിയില്‍ അനിശ്ചിതത്വവുമുള്ളതിനാൽ പണനയ സമിതി പലിശ നിരക്ക് ഉയർത്തുന്നത് എപ്പോൾ അവസാനിപ്പിക്കുമെന്നത് പ്രവചനാതീതമാണെന്നും റിസര്‍വ് ബാങ്ക് അറിയിച്ചിട്ടുണ്ട്.
English Summary: India’s economic growth will slow down
You may also like this video
ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.